Varaha Purana — Chapter 90

VrP 90.90

श्रीवराह उवाच । श्रृणु चान्यं वरारोहे तस्या देव्या महाविधिम् । या सा त्रिशक्तिरुद्दिष्टा शिवेन परमेष्ठिना तत्र सृष्टिः पुरा प्रोक्ता श्वेतवर्णा स्वरूपिणी । एकाक्षरेति विख्याता सर्वाक्षरमयी शुभा वागीशेति समाख्याता क्वचिद् देवी सरस्वती । सैव विद्येश्वरी देवी सैव क्वाप्यमिताक्षरा । सैव ज्ञानविधिः क्वापि सैव देवी विभावरी यानि सौम्यानि नामानि यानि ज्ञानोद्भवानि च । तानि तस्या विशालाक्षि द्रष्टव्यानि वरानने या वैष्णवी विशालाक्षी रक्तवर्णा सुरूपिणी । अपरा सा समाख्याता रौद्री चैव परापरा एतास्त्रयोऽपि सिद्ध्यन्ते यो रुद्रं वेत्ति तत्त्वतः । सर्वगेयं वरारोहे एकैव त्रिविधा स्मृता एषा सृष्टिर्वरारोहे कथिता ते पुरातनी । तया सर्वमिदं व्याप्तं जगत् स्थावरजङ्गमम् या साऽऽदौ वर्द्धिता सृष्टिर्ब्रह्मणोऽव्यक्तजन्मनः । तया तुल्यां स्तुतिं चक्रे तस्या देव्याः पितामहः ब्रह्मोवाच । जयस्व सत्यसंभूते ध्रुवे देवि वराक्षरे । सर्वगे सर्वजननि सर्वभूतमहेश्वरि सर्वज्ञे त्वं वरारोहे सर्वसिद्धिप्रदायिनी । सिद्धिबुद्धिकरी देवि प्रसूतिः परमेश्वरि त्वं स्वाहा त्वं स्वधा देवि त्वमुत्पत्तिर्वरानने । त्वमोङ्कारस्थिता देवि वेदोत्पत्तिस्त्वमेव च देवानां दानवानां च यक्षगन्धर्वरक्षसाम् । पशूनां वीरुधां चापि त्वमुत्पत्तिर्वरानने विद्या विद्येश्वरी सिद्धा प्रसिद्धा त्वं सुरेश्वरि । सर्वज्ञा त्वं वरारोहे सर्वसिद्धिप्रदायिनी सर्वगा गतसंदेहा सर्वशत्रुनिबर्हिणी । सर्वविद्येश्वरी देवी नमस्ते स्वस्तिकारिणि ऋतुस्नातां स्त्रियं गच्छेद् यस्त्वां स्तुत्वा वरानने । तस्यावश्यं भवेत् सृष्टिस्त्वत्प्रसादात् प्रजेश्वरि । स्वरूपा विजया भद्रा सर्वशत्रुप्रमोहिनि

śrīvarāha uvāca | śrṛṇu cānyaṃ varārohe tasyā devyā mahāvidhim | yā sā triśaktiruddiṣṭā śivena parameṣṭhinā tatra sṛṣṭiḥ purā proktā śvetavarṇā svarūpiṇī | ekākṣareti vikhyātā sarvākṣaramayī śubhā vāgīśeti samākhyātā kvacid devī sarasvatī | saiva vidyeśvarī devī saiva kvāpyamitākṣarā | saiva jñānavidhiḥ kvāpi saiva devī vibhāvarī yāni saumyāni nāmāni yāni jñānodbhavāni ca | tāni tasyā viśālākṣi draṣṭavyāni varānane yā vaiṣṇavī viśālākṣī raktavarṇā surūpiṇī | aparā sā samākhyātā raudrī caiva parāparā etāstrayo'pi siddhyante yo rudraṃ vetti tattvataḥ | sarvageyaṃ varārohe ekaiva trividhā smṛtā eṣā sṛṣṭirvarārohe kathitā te purātanī | tayā sarvamidaṃ vyāptaṃ jagat sthāvarajaṅgamam yā sā''dau varddhitā sṛṣṭirbrahmaṇo'vyaktajanmanaḥ | tayā tulyāṃ stutiṃ cakre tasyā devyāḥ pitāmahaḥ brahmovāca | jayasva satyasaṃbhūte dhruve devi varākṣare | sarvage sarvajanani sarvabhūtamaheśvari sarvajñe tvaṃ varārohe sarvasiddhipradāyinī | siddhibuddhikarī devi prasūtiḥ parameśvari tvaṃ svāhā tvaṃ svadhā devi tvamutpattirvarānane | tvamoṅkārasthitā devi vedotpattistvameva ca devānāṃ dānavānāṃ ca yakṣagandharvarakṣasām | paśūnāṃ vīrudhāṃ cāpi tvamutpattirvarānane vidyā vidyeśvarī siddhā prasiddhā tvaṃ sureśvari | sarvajñā tvaṃ varārohe sarvasiddhipradāyinī sarvagā gatasaṃdehā sarvaśatrunibarhiṇī | sarvavidyeśvarī devī namaste svastikāriṇi ṛtusnātāṃ striyaṃ gacched yastvāṃ stutvā varānane | tasyāvaśyaṃ bhavet sṛṣṭistvatprasādāt prajeśvari | svarūpā vijayā bhadrā sarvaśatrupramohini