Varaha Purana — Chapter 76

VrP 76.76

रुद्र उवाच । तस्यैव मेरोः पूर्वे तु देशे परमवर्चसे । चक्रवाटपरिक्षिप्ते नानाधातुविराजिते तत्र सर्वामरपुरं चक्रवाटसमुद्धतम् । दुर्धर्षं बलदृप्तानां देवदानवरक्षसाम् । तत्र जाम्बूनदमयः सुप्राकारः सुतोरणः तस्याप्युत्तरपूर्वे तु देशे परमवर्चसे । अलोकजनसंपूर्णा विमानशतसंकुला महावापिसमायुक्ता नित्यं प्रमुदिता शुभा । शोभिता पुष्पशबलैः पताकाध्वजमालिनी देवैर्यक्षोप्सरोभिश्च ऋषिभिश्च सुशोभिता । पुरन्दरपुरी रम्या समृद्धा त्वमरावती तस्या मध्येऽमरावत्या वज्रवैदूर्यवेदिका । त्रैलोक्यगुणविख्याता सुधर्मा नाम वै सभा तत्रास्ते श्रीपतेः श्रीमान् सहस्त्राक्षः शचीपतिः । सिद्धादिभिः परिवृतः सर्वाभिर्देवयोनिभिः तत्र चैव सुवंशः स्याद् भास्करस्य महात्मनः । साक्षात् तत्र सुराध्यक्षः सर्वदेवनमस्कृतः तस्याश्च दिक्षु विस्तीर्णा तत्तद्गुणसमन्विता । तेजोवती नाम पुरी हुताशस्य महात्मनः तत्तद्गुणवती रम्या पुरी वैवस्वतस्य च । नाम्ना संयमनी नाम पुरी त्रैलोक्यविश्रुता तथा चतुर्थे दिग्भागे नैर्ऋताधिपतेः शुभा । नाम्ना कृष्णावती नाम विरूपाक्षस्य धीमतः पञ्चमे ह्युत्तरपुटे नाम्ना शुद्धवती पुरी । उदकाधिपतेः ख्याता वरुणस्य महात्मनः तथा पञ्चोत्तरे देवस्वस्योत्तरपुटे पुरी । वायोर्गन्धवती नाम ख्याता सर्वगुणोत्तरा तस्योत्तरपुटे रम्या गुह्यकाधिपतेः पुरी । नाम्ना महोदया नाम शुभा वैदूर्यवेदिका तथाष्टमेऽन्तरपुटे ईशानस्य महात्मनः । पुरी मनोहरा नाम भूतैर्नानाविधैर्युता । पुष्पैर्धन्यैश्च विविधैर्वनैराश्रमसंस्थितैः प्रार्थ्यते देवलोकोऽयं स स्वर्ग इति कीर्तितः

rudra uvāca | tasyaiva meroḥ pūrve tu deśe paramavarcase | cakravāṭaparikṣipte nānādhātuvirājite tatra sarvāmarapuraṃ cakravāṭasamuddhatam | durdharṣaṃ baladṛptānāṃ devadānavarakṣasām | tatra jāmbūnadamayaḥ suprākāraḥ sutoraṇaḥ tasyāpyuttarapūrve tu deśe paramavarcase | alokajanasaṃpūrṇā vimānaśatasaṃkulā mahāvāpisamāyuktā nityaṃ pramuditā śubhā | śobhitā puṣpaśabalaiḥ patākādhvajamālinī devairyakṣopsarobhiśca ṛṣibhiśca suśobhitā | purandarapurī ramyā samṛddhā tvamarāvatī tasyā madhye'marāvatyā vajravaidūryavedikā | trailokyaguṇavikhyātā sudharmā nāma vai sabhā tatrāste śrīpateḥ śrīmān sahastrākṣaḥ śacīpatiḥ | siddhādibhiḥ parivṛtaḥ sarvābhirdevayonibhiḥ tatra caiva suvaṃśaḥ syād bhāskarasya mahātmanaḥ | sākṣāt tatra surādhyakṣaḥ sarvadevanamaskṛtaḥ tasyāśca dikṣu vistīrṇā tattadguṇasamanvitā | tejovatī nāma purī hutāśasya mahātmanaḥ tattadguṇavatī ramyā purī vaivasvatasya ca | nāmnā saṃyamanī nāma purī trailokyaviśrutā tathā caturthe digbhāge nairṛtādhipateḥ śubhā | nāmnā kṛṣṇāvatī nāma virūpākṣasya dhīmataḥ pañcame hyuttarapuṭe nāmnā śuddhavatī purī | udakādhipateḥ khyātā varuṇasya mahātmanaḥ tathā pañcottare devasvasyottarapuṭe purī | vāyorgandhavatī nāma khyātā sarvaguṇottarā tasyottarapuṭe ramyā guhyakādhipateḥ purī | nāmnā mahodayā nāma śubhā vaidūryavedikā tathāṣṭame'ntarapuṭe īśānasya mahātmanaḥ | purī manoharā nāma bhūtairnānāvidhairyutā | puṣpairdhanyaiśca vividhairvanairāśramasaṃsthitaiḥ prārthyate devaloko'yaṃ sa svarga iti kīrtitaḥ