Varaha Purana — Chapter 65

VrP 65.65

अगस्त्य उवाच । सार्वभौमव्रतं चान्यत् कथयामि समासतः । येन सम्यक्कृतेनाशु सार्वभौमो नृपो भवेत् कार्तिकस्य तु मासस्य दशमी शुक्लपक्षिका । तस्यां नक्ताशनो नित्यं दिक्षु शुद्धबलिं हरेत् विचित्रैः कुसुमैर्भक्त्या पूजयित्वा द्विजोत्तमान् । दिशां तु प्रार्थनां कुर्यान् मन्त्रेणानेन सुव्रतः । सर्वा भवन्त्यः सिद्ध्यन्तु मम जन्मनि जन्मनि एवमुक्त्वा बलिं तासु दत्त्वा शुद्धेन चेतसा । ततो रात्रौ तु भुञ्जीत दध्यन्नं तु सुसंस्कृतम् पूर्वं पश्चाद् यथेष्टं तु एवं संवत्सरं नृप । यः करोति नरो नित्यं तस्य दिग्विजयो भवेत् एकादश्यां तु यत्नेन नरः कुर्याद् यथाविधि । मार्गशीर्षे शुक्लपक्षादारभ्याब्दं विचक्षणः । तद् व्रत धनदस्येष्टं कृतं वित्तं प्रयच्छति एकादश्यां निराहारो यो भुङ्क्ते द्वादशीदिने । शुक्ले वाऽप्यथवा कृष्णे तद् व्रतं वैष्णवं महत् एवं चीर्ण सुघोराणि हन्ति पापानि रपार्थिव । त्रयोदश्यां तु नक्तेन धर्मव्रतमथोच्यते शुक्लपक्षे फाल्गुनस्य तथारभ्य विचक्षणः । रौद्रं व्रतं चतुर्दश्यां कृष्णपक्षे विशेषतः । माघमासादथारभ्य पूर्णं संवत्सरं नृप इन्दुव्रतं पञ्चदश्यां शुक्लायां नक्तभोजनम् । पितृव्रतममावास्यामिति राजन तथेरितम् दश पञ्च च वर्षाणि य एवं कुरुते नृप । तिथिव्रतानि कस्तस्य फलं व्रतप्रमाणतः अश्वमेधसहस्त्राणि राजसूयशतानि च । यष्टानि तेन राजेन्द्र कल्पोक्ताः क्रतवस्तथा एकमेव कृतं हन्ति व्रतं पापानि नित्यशः । यः पुनः सर्वमेतद्धि कुर्यान्नरवरात्मज । स शुद्धो विरजो लोकानाप्नोति सकलं नृप

agastya uvāca | sārvabhaumavrataṃ cānyat kathayāmi samāsataḥ | yena samyakkṛtenāśu sārvabhaumo nṛpo bhavet kārtikasya tu māsasya daśamī śuklapakṣikā | tasyāṃ naktāśano nityaṃ dikṣu śuddhabaliṃ haret vicitraiḥ kusumairbhaktyā pūjayitvā dvijottamān | diśāṃ tu prārthanāṃ kuryān mantreṇānena suvrataḥ | sarvā bhavantyaḥ siddhyantu mama janmani janmani evamuktvā baliṃ tāsu dattvā śuddhena cetasā | tato rātrau tu bhuñjīta dadhyannaṃ tu susaṃskṛtam pūrvaṃ paścād yatheṣṭaṃ tu evaṃ saṃvatsaraṃ nṛpa | yaḥ karoti naro nityaṃ tasya digvijayo bhavet ekādaśyāṃ tu yatnena naraḥ kuryād yathāvidhi | mārgaśīrṣe śuklapakṣādārabhyābdaṃ vicakṣaṇaḥ | tad vrata dhanadasyeṣṭaṃ kṛtaṃ vittaṃ prayacchati ekādaśyāṃ nirāhāro yo bhuṅkte dvādaśīdine | śukle vā'pyathavā kṛṣṇe tad vrataṃ vaiṣṇavaṃ mahat evaṃ cīrṇa sughorāṇi hanti pāpāni rapārthiva | trayodaśyāṃ tu naktena dharmavratamathocyate śuklapakṣe phālgunasya tathārabhya vicakṣaṇaḥ | raudraṃ vrataṃ caturdaśyāṃ kṛṣṇapakṣe viśeṣataḥ | māghamāsādathārabhya pūrṇaṃ saṃvatsaraṃ nṛpa induvrataṃ pañcadaśyāṃ śuklāyāṃ naktabhojanam | pitṛvratamamāvāsyāmiti rājana tatheritam daśa pañca ca varṣāṇi ya evaṃ kurute nṛpa | tithivratāni kastasya phalaṃ vratapramāṇataḥ aśvamedhasahastrāṇi rājasūyaśatāni ca | yaṣṭāni tena rājendra kalpoktāḥ kratavastathā ekameva kṛtaṃ hanti vrataṃ pāpāni nityaśaḥ | yaḥ punaḥ sarvametaddhi kuryānnaravarātmaja | sa śuddho virajo lokānāpnoti sakalaṃ nṛpa