Varaha Purana — Chapter 63

VrP 63.63

अगस्त्य उवाच । अथापरं महाराज पुत्रप्राप्तिव्रतं शुभम् । कथयामि समासेन तन्मे निगदतः श्रृणु मासे भाद्रपदे या तु कृष्णपक्षे नरेश्वर । अष्टम्यामुपवासेन पुत्रप्राप्तिव्रतं हि तत् षष्ठ्यां चैव तु संकल्प्य सप्तम्यामर्चयेद् हरिम् । देवक्युत्सङ्गगं देवं मातृभिः परिवेष्टितम् प्रभाते विमलेऽष्टम्यामर्चयेत् प्रयतो हरिम् । प्राग्विधानेन गोविन्दमर्चयित्वा विधानतः ततो यवैः कृष्णतिलैः सघृतैर्होमयेद् दधि । ब्राह्मणान् भोजयेद् भक्त्या यथाशक्त्या सदक्षिणान् ततः स्वयं तु भुञ्जीत प्रथमं बिल्वमुत्तमम् । पश्चाद् यथेष्टं भुञ्जीत स्नेहैः सर्वरसैर्युतम् प्रतिमासमनेनैव विधिनोपोष्य मानवः । कृष्णाष्टमीमपुत्रोऽपि लभेत् पुत्रं न संशयः श्रूयते च पुरा राजा शूरसेनः प्रतापवान् । स ह्यपुत्रस्तपस्तेपे हिमवत्पर्वतोत्तमे तस्यैवं कुर्वतो देवो व्रतमेतज्जगाद ह । सोऽप्येतत् कृतवान् राजा पुत्रं चैवोपलब्धवान् वसुदेवं महाभागमनेकक्रतुयाजिनम् । तं लब्ध्वा सोऽपि राजर्षिः परं निर्वाणमापत्वान् एवं कृष्णाष्टमी राजन् मया ते परिकीर्तिता । संवत्सरान्ते दातव्यं कृष्णयुग्मं द्विजातये एतत् पुत्रव्रतं नाम मया ते परिकीर्तितम् । एतत् कृत्वा नरः पापैः सर्वैरेव प्रमुच्यते

agastya uvāca | athāparaṃ mahārāja putraprāptivrataṃ śubham | kathayāmi samāsena tanme nigadataḥ śrṛṇu māse bhādrapade yā tu kṛṣṇapakṣe nareśvara | aṣṭamyāmupavāsena putraprāptivrataṃ hi tat ṣaṣṭhyāṃ caiva tu saṃkalpya saptamyāmarcayed harim | devakyutsaṅgagaṃ devaṃ mātṛbhiḥ pariveṣṭitam prabhāte vimale'ṣṭamyāmarcayet prayato harim | prāgvidhānena govindamarcayitvā vidhānataḥ tato yavaiḥ kṛṣṇatilaiḥ saghṛtairhomayed dadhi | brāhmaṇān bhojayed bhaktyā yathāśaktyā sadakṣiṇān tataḥ svayaṃ tu bhuñjīta prathamaṃ bilvamuttamam | paścād yatheṣṭaṃ bhuñjīta snehaiḥ sarvarasairyutam pratimāsamanenaiva vidhinopoṣya mānavaḥ | kṛṣṇāṣṭamīmaputro'pi labhet putraṃ na saṃśayaḥ śrūyate ca purā rājā śūrasenaḥ pratāpavān | sa hyaputrastapastepe himavatparvatottame tasyaivaṃ kurvato devo vratametajjagāda ha | so'pyetat kṛtavān rājā putraṃ caivopalabdhavān vasudevaṃ mahābhāgamanekakratuyājinam | taṃ labdhvā so'pi rājarṣiḥ paraṃ nirvāṇamāpatvān evaṃ kṛṣṇāṣṭamī rājan mayā te parikīrtitā | saṃvatsarānte dātavyaṃ kṛṣṇayugmaṃ dvijātaye etat putravrataṃ nāma mayā te parikīrtitam | etat kṛtvā naraḥ pāpaiḥ sarvaireva pramucyate