Varaha Purana — Chapter 61

VrP 61.61

अगस्त्य उवाच । कामव्रतं महाराज श्रृणु मे गदतोऽधुना । येन कामाः समृद्ध्यन्ते मनसा चिन्तिता अपि षष्ठ्यां फलाशनो यस्तु वर्षमेकं व्रतं चरेत् । पौषमाससिते पक्षे चतुर्थ्यां कृतभोजनः षष्ठ्यां तु पारयेद् धीमान् प्रथमं तु फलं नृप । ततो भुञ्जीत यत्नेन वाग्यतः शुद्धमोदनम् ब्राह्मणैः सह राजेन्द्र अथवा केवलैः फलैः । तमेकं दिवसं स्थित्वा सप्तम्यां पारयेन्नृप अग्निकार्यं तु कुर्वीत गुहरूपेण केशवम् । पूजयित्वाभिधानेन वर्षमेकं व्रतं चरेत् षड्वक्त्र कार्त्तिक गुह सेनानी कृत्तिकासुत । कुमार स्कन्द इत्येवं पूज्यो विष्णुः स्वनामभिः षण्मुखं सर्वसौवर्णं ब्राह्मणाय निवेदयेत् सर्वे कामाः समृद्ध्यन्तां मम देव कुमारक । त्वत्प्रसादादिमं भक्त्या गृह्यतां विप्र माचिरम् अनेन दत्त्वा मन्त्रेण ब्राह्मणाय सयुग्मकम् । ततः कामाः समृद्ध्यन्ते सर्वे वै इह जन्मनि अपुत्रो लभते पुत्रमधनो लभते धनम् । भ्रष्टराज्यो लभेद् राज्यं नात्र कार्या विचारणा एतद् व्रतं पुरा चीर्णं नलेन नृपसत्तम । ऋतुपर्णस्य विषये वसता व्रतचर्यया तथा राज्यच्युतैरन्यैर्बहुभिर्नृपसत्तमैः । पौराणिकं व्रतं चैव सिद्ध्यर्थं नृपसत्तम

agastya uvāca | kāmavrataṃ mahārāja śrṛṇu me gadato'dhunā | yena kāmāḥ samṛddhyante manasā cintitā api ṣaṣṭhyāṃ phalāśano yastu varṣamekaṃ vrataṃ caret | pauṣamāsasite pakṣe caturthyāṃ kṛtabhojanaḥ ṣaṣṭhyāṃ tu pārayed dhīmān prathamaṃ tu phalaṃ nṛpa | tato bhuñjīta yatnena vāgyataḥ śuddhamodanam brāhmaṇaiḥ saha rājendra athavā kevalaiḥ phalaiḥ | tamekaṃ divasaṃ sthitvā saptamyāṃ pārayennṛpa agnikāryaṃ tu kurvīta guharūpeṇa keśavam | pūjayitvābhidhānena varṣamekaṃ vrataṃ caret ṣaḍvaktra kārttika guha senānī kṛttikāsuta | kumāra skanda ityevaṃ pūjyo viṣṇuḥ svanāmabhiḥ ṣaṇmukhaṃ sarvasauvarṇaṃ brāhmaṇāya nivedayet sarve kāmāḥ samṛddhyantāṃ mama deva kumāraka | tvatprasādādimaṃ bhaktyā gṛhyatāṃ vipra māciram anena dattvā mantreṇa brāhmaṇāya sayugmakam | tataḥ kāmāḥ samṛddhyante sarve vai iha janmani aputro labhate putramadhano labhate dhanam | bhraṣṭarājyo labhed rājyaṃ nātra kāryā vicāraṇā etad vrataṃ purā cīrṇaṃ nalena nṛpasattama | ṛtuparṇasya viṣaye vasatā vratacaryayā tathā rājyacyutairanyairbahubhirnṛpasattamaiḥ | paurāṇikaṃ vrataṃ caiva siddhyarthaṃ nṛpasattama