Varaha Purana — Chapter 45

VrP 45.45

दुर्वासा उवाच । ज्येष्ठमासेऽप्येवमेवं संकल्प्य विधिना नरः । अर्चयेत् परमं देवं पुष्पैर्नानाविधैः शुभैः नमो रामाभिरामाय पादौ पूर्वं समर्चयेत् । त्रिविक्रमायेति कटिं धृतविश्वाय चोदरम् उरः संवत्सरायेति कण्ठं संवर्त्तकाय च । सर्वास्त्रधारिणे बाहू स्वनाम्नाऽब्जरथाङ्गकौ सहस्त्रशिरसेऽभ्यर्च्य शिरस्तस्य महात्मनः । एवमभ्यर्च्य विधिवत् प्रागुक्तं कुम्भं विन्यसेत् प्राग्वद् वस्त्रयुगच्छन्नौ सौवर्णौ रामलक्ष्मणौ । अर्चयित्वा विधानेन प्रभाते ब्राह्मणाय तौ । दातव्यौ मनसा काममीहता पुरुषेण तु अपुत्रेण पुरा पृष्टो राज्ञा दशरथेन च । पुत्रकामपरः पश्चाद् वसिष्ठः परमार्चितः इदमेव विधानं तु कथयामास स द्विजः । प्राग्रहस्यं विदित्वा तु स राजा कृतवानिदम् तस्य पुत्रः स्वयं जज्ञे रामनामा सुतो बली । चतुर्द्धा सोऽव्ययो विष्णुः परितुष्टो महामुने । एतदैहिकमाख्यातं पारत्रिकमतः श्रृणु तावद् भोगान् भुञ्जते स्वर्गसंस्थो यावदिन्द्रा दश च द्विद्विसंख्या । अतीतकाले पुनरेत्य मर्त्त्यो भवेत राजा शतयज्ञयाजी । नश्यन्ति पापानि च तस्य पुंसः प्राप्नोति निर्वाणमलं च शाश्वतम्

durvāsā uvāca | jyeṣṭhamāse'pyevamevaṃ saṃkalpya vidhinā naraḥ | arcayet paramaṃ devaṃ puṣpairnānāvidhaiḥ śubhaiḥ namo rāmābhirāmāya pādau pūrvaṃ samarcayet | trivikramāyeti kaṭiṃ dhṛtaviśvāya codaram uraḥ saṃvatsarāyeti kaṇṭhaṃ saṃvarttakāya ca | sarvāstradhāriṇe bāhū svanāmnā'bjarathāṅgakau sahastraśirase'bhyarcya śirastasya mahātmanaḥ | evamabhyarcya vidhivat prāguktaṃ kumbhaṃ vinyaset prāgvad vastrayugacchannau sauvarṇau rāmalakṣmaṇau | arcayitvā vidhānena prabhāte brāhmaṇāya tau | dātavyau manasā kāmamīhatā puruṣeṇa tu aputreṇa purā pṛṣṭo rājñā daśarathena ca | putrakāmaparaḥ paścād vasiṣṭhaḥ paramārcitaḥ idameva vidhānaṃ tu kathayāmāsa sa dvijaḥ | prāgrahasyaṃ viditvā tu sa rājā kṛtavānidam tasya putraḥ svayaṃ jajñe rāmanāmā suto balī | caturddhā so'vyayo viṣṇuḥ parituṣṭo mahāmune | etadaihikamākhyātaṃ pāratrikamataḥ śrṛṇu tāvad bhogān bhuñjate svargasaṃstho yāvadindrā daśa ca dvidvisaṃkhyā | atītakāle punaretya marttyo bhaveta rājā śatayajñayājī | naśyanti pāpāni ca tasya puṃsaḥ prāpnoti nirvāṇamalaṃ ca śāśvatam