Varaha Purana — Chapter 36

VrP 36.36

महातपा उवाच । आदित्रेतासु राजानो मणिजा ये प्रकीर्त्तिताः । कथयिष्यामि तान् राजन् यत्र जातोऽपि पार्थिव योऽसौ सुप्रभनामासीत् स त्वं राजन् कृते युगे । जातोऽसि नाम्ना विख्यातः प्रजापालेति शोभनः शेषास्त्रेतायुगे राजन् भविष्यन्ति महाबलाः । यो दीप्ततेजा मणिजः स शन्तेति प्रकीर्तितः सुरश्मिर्भविता राजा शशकर्णो महाबलः । शुभदर्शनः पाञ्चालो भविष्यति नराधिपः सुशान्तिरङ्गवंशे वै सुन्दरोऽप्यङ्ग इत्युत । सुन्दश्च मुचुकुन्दोऽभूत्सुद्युम्नस्तुर एव च सुमनाः सोमदत्तस्तु शुभः संवरणोऽभवत् । सुशीलो वसुदानस्तु सुखदो सुपतिर्भवत् शम्भुः सेनापतिरभूत् सुकान्तो दशरथः स्मृतः । सोमोऽभूज्जनको राजा एते त्रेतायुगे नृप सर्वे भूमिमिमां राजन् भुक्त्वा ते वसुधाधिपाः । इष्ट्वा च विविधैर्यज्ञैर्दिवं प्राप्स्यन्त्यसंशयम् श्रीवराह उवाच । एवं श्रुत्वा स राजर्षिर्ब्रह्मविद्याऽमृतं प्रभुः । आख्यानं परमं प्रीतस्तपश्चर्तुमियाद् वनम् ऋषिरध्यात्मयोगेन विहायेदं कलेवरम् । ब्रह्मभूतोऽभवद्धात्रि हरौ लयमवाप च वृन्दावनं च राजाऽसौ तपोऽर्थं गतवान् प्रभुः । तत्र गोविन्दनामानं हरिं स्तोतुमथारभत् राजोवाच । नमामि देवं जगतां च मूर्त्तिं गोपेन्द्रमिन्द्रानुजमप्रमेयम् । संसारचक्रक्रमणैकदक्षं क्षितीधरं देववरं नमामि भवोदधौ दुःखशतोर्म्मिभीमे जरावर्त्ते कृष्णपातालमूले । तदन्तमेको दधते सुखं मे नमोऽस्तु ते गोपतिरप्रमेय व्याध्यादियुक्तः पुरुषैर्ग्रहैश्च सङ्घट्टमानं पुनरेव देव । नमोऽस्तु ते युद्धरते महात्मा जनार्दनो गोपतिरुग्रबाहुः त्वमुत्तमः सर्वविदां सुरेश त्वया ततं विश्वमिदं समस्तम् । गोपेन्द्र मां पाहि महानुभाव भवाद्भीतं तिग्मरथाङ्गपाणे परोऽसि देव प्रवरः सुराणां पुंसः स्वरूपोऽसि शशिप्रकाशः । हुताशवक्त्राच्युत तीव्रभाव गोपेन्द्र मां पाहि भवे पतन्तम् संसारचक्रक्रमणान्यनेका - न्याविर्भवन्त्यच्युत देहिनां यत् । त्वन्मायया मोहितानां सुरेश कस्ते मायां तरते द्वन्द्वधामा अगोत्रमस्पर्शमरूपगन्ध - मनामनिर्देशमजं वरेण्यम् । गोपेन्द्र त्वां यद्युपासन्ति धीरा - स्ते मुक्तिभाजो भवबन्धमुक्ताः शब्दातिगं व्योमरूपं विमूर्त्तिं विकर्म्मिणां शुभभावं वरेण्यम् । चक्राब्जपाणिं तु तथोपचारा- दुक्तं पुराणे सततं नमामि त्रिविक्रमं क्रान्तजगत्त्रयं च चतुर्मूर्त्तिं विश्वगतां क्षितीशम् । शम्भुं विभुं भूतपतिं सुरेशं नमाम्यहं विष्णुमनन्तमूर्त्तिम् त्वं देव सर्वाणि चराचराणि सृजस्यथो संहरसे त्वमेव । मां मुक्तिकामं नय देव शीघ्रं यस्मिन् गता योगिनो नापयान्ति जयस्व गोविन्द महानुभाव जयस्व विष्णो जय पद्मनाभ । जयस्व सर्वज्ञ जयाप्रमेय जयस्व विश्वेश्वर विश्वमूर्त्ते श्रीवराह उवाच । एवं स्तुत्वा तदा राजा निधाय स्वं कलेवरम् । परमात्मनि गोविन्दे लयमागाच्च शाश्वते

mahātapā uvāca | āditretāsu rājāno maṇijā ye prakīrttitāḥ | kathayiṣyāmi tān rājan yatra jāto'pi pārthiva yo'sau suprabhanāmāsīt sa tvaṃ rājan kṛte yuge | jāto'si nāmnā vikhyātaḥ prajāpāleti śobhanaḥ śeṣāstretāyuge rājan bhaviṣyanti mahābalāḥ | yo dīptatejā maṇijaḥ sa śanteti prakīrtitaḥ suraśmirbhavitā rājā śaśakarṇo mahābalaḥ | śubhadarśanaḥ pāñcālo bhaviṣyati narādhipaḥ suśāntiraṅgavaṃśe vai sundaro'pyaṅga ityuta | sundaśca mucukundo'bhūtsudyumnastura eva ca sumanāḥ somadattastu śubhaḥ saṃvaraṇo'bhavat | suśīlo vasudānastu sukhado supatirbhavat śambhuḥ senāpatirabhūt sukānto daśarathaḥ smṛtaḥ | somo'bhūjjanako rājā ete tretāyuge nṛpa sarve bhūmimimāṃ rājan bhuktvā te vasudhādhipāḥ | iṣṭvā ca vividhairyajñairdivaṃ prāpsyantyasaṃśayam śrīvarāha uvāca | evaṃ śrutvā sa rājarṣirbrahmavidyā'mṛtaṃ prabhuḥ | ākhyānaṃ paramaṃ prītastapaścartumiyād vanam ṛṣiradhyātmayogena vihāyedaṃ kalevaram | brahmabhūto'bhavaddhātri harau layamavāpa ca vṛndāvanaṃ ca rājā'sau tapo'rthaṃ gatavān prabhuḥ | tatra govindanāmānaṃ hariṃ stotumathārabhat rājovāca | namāmi devaṃ jagatāṃ ca mūrttiṃ gopendramindrānujamaprameyam | saṃsāracakrakramaṇaikadakṣaṃ kṣitīdharaṃ devavaraṃ namāmi bhavodadhau duḥkhaśatormmibhīme jarāvartte kṛṣṇapātālamūle | tadantameko dadhate sukhaṃ me namo'stu te gopatiraprameya vyādhyādiyuktaḥ puruṣairgrahaiśca saṅghaṭṭamānaṃ punareva deva | namo'stu te yuddharate mahātmā janārdano gopatirugrabāhuḥ tvamuttamaḥ sarvavidāṃ sureśa tvayā tataṃ viśvamidaṃ samastam | gopendra māṃ pāhi mahānubhāva bhavādbhītaṃ tigmarathāṅgapāṇe paro'si deva pravaraḥ surāṇāṃ puṃsaḥ svarūpo'si śaśiprakāśaḥ | hutāśavaktrācyuta tīvrabhāva gopendra māṃ pāhi bhave patantam saṃsāracakrakramaṇānyanekā - nyāvirbhavantyacyuta dehināṃ yat | tvanmāyayā mohitānāṃ sureśa kaste māyāṃ tarate dvandvadhāmā agotramasparśamarūpagandha - manāmanirdeśamajaṃ vareṇyam | gopendra tvāṃ yadyupāsanti dhīrā - ste muktibhājo bhavabandhamuktāḥ śabdātigaṃ vyomarūpaṃ vimūrttiṃ vikarmmiṇāṃ śubhabhāvaṃ vareṇyam | cakrābjapāṇiṃ tu tathopacārā- duktaṃ purāṇe satataṃ namāmi trivikramaṃ krāntajagattrayaṃ ca caturmūrttiṃ viśvagatāṃ kṣitīśam | śambhuṃ vibhuṃ bhūtapatiṃ sureśaṃ namāmyahaṃ viṣṇumanantamūrttim tvaṃ deva sarvāṇi carācarāṇi sṛjasyatho saṃharase tvameva | māṃ muktikāmaṃ naya deva śīghraṃ yasmin gatā yogino nāpayānti jayasva govinda mahānubhāva jayasva viṣṇo jaya padmanābha | jayasva sarvajña jayāprameya jayasva viśveśvara viśvamūrtte śrīvarāha uvāca | evaṃ stutvā tadā rājā nidhāya svaṃ kalevaram | paramātmani govinde layamāgācca śāśvate