Taittiriya Upanishad — Chapter 3
TaUp 3.1.1
bhṛgurvai vāruṇiḥ / varuṇaṃ pitaramupasasāra / adhīhi bhagavo brahmeti / tasmā etatprovāca / annaṃ prāṇaṃ cakṣuḥ śrotraṃ mano vācamiti / taṃ hovāca / yato vā imāni bhūtāni jāyante / yena jātāni jīvanti / yatprayanyabhisaṃviśanti / tadvijijñāsasva / tadbrahmeti / sa tapo 'tapyata / sa tapastaptvā
TaUp 3.2.1
annaṃ brahmeti vyajānāt / annādadhyeva khalvimāni bhutāni jāyante / annena jātāni jīvanti / annaṃ prayantyabhisaṃviśantīti / tadvijñāya / punareva varuṇaṃ pitaramupasasāra / adhīhi bhagavo brahmeti / taṃ hovāca / tapasā brahma vijijñāsasva / tapo brahmeti / sa tapo 'tapyata / sa tapastaptvā
TaUp 3.3.1
prāṇo brahmeti vyajānāt / prāṇādadhyeva khalvimāni bhūtāni jāyante / prāṇena jātāni jīvanti / prāṇaṃ prayantyabhisaṃviśantīti / tadvijñāya / punareva varuṇaṃ pitaramupasasāra / adhīhi bhagavo brahmeti / taṃ hovāca / tapasā brahma vijijñāsasva / tapo brahmeti / sa tapo 'tapyata / sa tapastaptvā // 1
TaUp 3.4.1
mano brahmeti vyajānāt / manaso hyeva khalvimāni bhūtāni jāyante / manasā jātāni jīvanti / manaḥ prayantyabhisaṃviśantīti / tadvijñāya / punareva varuṇaṃ pitaramupasasāra / adhīhi bhagavo brahmeti / taṃ hovāca / tapasā brahma vijijñāsasva / tapo brahmeti / sa tapo 'tapyata / sa tapastaptvā
TaUp 3.5.1
vijñānaṃ brahmeti vyajānāt / vijñānādadhyeva khalvimāni bhūtāni jāyante / vijñānena jātāni jīvanti / vijñānaṃ prayantyabhisaṃviśantīti / tadvijñāya / punareva varuṇaṃ pitaramupasasāra / adhīhi bhagavo brahmeti / taṃ hovāca / tapasā brahma vijijñāsasva / tapo brahmeti / sa tapo 'tapyata / sa tapastaptvā
TaUp 3.6.1
ānando brahmeti vyajānāt / ānandādhyeva khalvimāni bhūtāni jāyante / ānandena jātāni jīvanti / ānandaṃ prayantyabhisaṃviśantīti / saiṣā bhārgavī vāruṇī vidyā / parame vyomanpratiṣṭhitā / sa ya evaṃ veda pratitiṣṭhati / annavānannādo bhavati / mahānbhavati prajayā paśubhirbrahmavarcasena / mahān kīrtyā
TaUp 3.7.1
annaṃ na nindyāt / tadavratam / prāṇo vā annam / śarīramannādam / prāṇe śarīraṃ pratiṣṭhitam / śarīre prāṇaḥ pratiṣṭhitaḥ / tadetadannmanne pratiṣṭhitam / sa ya etadannamanne pratiṣṭhitaṃ veda pratitiṣṭhati / annavānannādo bhavati / mahānbhavati prajayā paśubhirbrahmavarcasena / mahān kīrtyā
TaUp 3.8.1
annaṃ na paricakṣīta / tadavratam / āpo vā annam / jyotirannādam / apsu jyotiḥ pratiṣṭhitam / jyotiṣyāpaḥ pratiṣṭhitāḥ / tadetadannamanne pratiṣṭhitam /sa ya etadannamanne pratiṣṭhitaṃ veda pratitiṣṭhati / annavānannādo bhavati / mahānbhavati prajayā paśubhirbrahmavarcasena / mahān kīrtyā
TaUp 3.9.1
annaṃ bahu kurvīta / tadavratam / pṛthivī vā annam / ākāśo 'nnādaḥ / pṛthivyāmākāśaḥ pratiṣṭhitaḥ / ākāśe pṛthivī pratiṣṭhitā / tadetadannamanne pratiṣṭhitam / sa ya etadannamanne pratiṣṭhitaṃ veda pratitiṣṭhati / annavānannādo bhavati / mahānbhavati prajayā paśubhirbrahmavarcasena / mahānkīrtyā
TaUp 3.10.1
na kañcana vasatau pratyācakṣīta / tadavratam / tasmādyayā kayā ca vidhayā bahvannaṃ prāpnuyāt / arādhyasmā annamityācakṣate / etadvai mukhato 'naṃ rāddham / mukhato 'smā annaṃ rādhyate / etadvai madhyato 'naṃ rāddham / madhyato 'smā annaṃ rādhyate / edadvai antato 'nnaṃ rāddham / antato 'smā annaṃ rādhyate
TaUp 3.10.2
kṣema iti vāci / yogakṣema iti prāṇāpānayoḥ / karmeti hastayoḥ / gatiriti pādayoḥ / vimuktiriti pāyau / iti mānuṣīḥ samājñāḥ / atha daivīḥ / tṛptiriti vṛṣṭau / balamiti vidyuti
TaUp 3.10.3
yaśa iti paśuṣu / jyotiriti nakṣatreṣu / prajātiramṛtamānanda ityupasthe / sarvamityākāśe / tatpratiṣṭhetyupāsīta / pratiṣṭhāvān bhavati / tanmaha ityupāsīta / mahānbhavati / tanmana ityupāsīta / mānavānbhavati
TaUp 3.10.4
tannama ityupāsīta / namyante 'smai kāmāḥ / tadabrahmetyupāsīta / brahmavānbhavati / tadabrahmaṇaḥ parimara ityupāsīta / paryeṇaṃ mriyante dviṣantaḥ sapatnāḥ / pari ye 'priyā bhrātṛvyāḥ / sa yaścāyaṃ puruṣe / yaścāsāvāditye / sa ekaḥ
TaUp 3.10.5
sa ya evaṃvit / asmāllokātpretya / etamannamayamātmānamupasaṅkramya /etaṃ prāṇamayamātmānamupasaṅkramya / etaṃ manomayamātmānamupasaṅkramya / etaṃ vijñānamayamātmānamupasaṅkramya / etamānandamayamātmānamupasaṅkramya / imāṃllokankāmānnī kāmarūpyanusañcaran / etat sāma gāyannāste / hā3vu hā3vu hā3vu
TaUp 3.10.6
ahamannamahamannamahamannam / ahamannādo3 'hamannādo3 'hamannādaḥ / ahaṃ ślokakṛdahaṃ ślokakṛdahaṃ ślokakṛt / ahamasmi prathamajā ṛtā3sya / pūrvaṃ devebhyo 'mṛtasya nā3bhāyi / yo mā dadāti sa ideva mā3vāḥ / ahamannamannamadantamā3dmi / ahaṃ viśvaṃ bhuvanamabhyabhavā3m / suvarna jyotiḥ / ya evaṃ veda / ityupaniṣat