Taittiriya Upanishad — Chapter 1
TaUp 1.1.1
oṃ śaṃ no mitraḥ śaṃ varuṇaḥ / śaṃ no bhavatvaryamā / śaṃ na indro bṛhaspatiḥ / śaṃ no viṣṇururukramaḥ / namo brahmaṇe / namaste vāyo / tvameva pratyakṣaṃ brahmāsi / tvāmevapratyakṣaṃ brahma vadiṣyāmi / ṛtaṃ vadiṣyāmi / satyaṃ vadiṣyāmi / tanmāmavatu / tadvaktāramavatu / avatu mām / avatu vaktāram // oṃ śāntiḥ śāntiḥ śāntiḥ // iti śikṣādhyāye prathamo 'nuvākaḥ
TaUp 1.2.1
oṃ śīkṣāṃ vyākhyāsyāmaḥ / varṇaḥ svaraḥ / mātrā balam / sāma santānaḥ / ityuktaḥ śīkṣādhyāyaḥ // iti dvitīyo 'nuvādakaḥ
TaUp 1.3.1
saha nau yaśaḥ / saha nau brahmavarcasam / athātaḥ saṃhitāyā upaniṣidaṃ vyākhyāsyāmaḥ / pañcasvadhikaraṇeṣu / adhilokamadhijyautiṣamadhividyamadhiprajamadhyātmam / tā mahāsaṃhitāyā ityācakṣate / athādhilokam / pṛthivī pūrvarūpam / dyauruttararūpam / ākāśaḥ sandhiḥ
TaUp 1.3.2
vāyuḥ sandhānam / ityadhilokam / athādhijautiṣam / agniḥ pūrvarūpam / āditya uttararūpam / āpaḥ sandhiḥ / vaidyutaḥ sandhānam / ityadhijyautiṣam / athādhividyam / ācāryaḥ pūrvarūpam
TaUp 1.3.3
antevāsyuttararūpam / vidyā sandhiḥ / pravacanaṃ sandhānam / ityadhividyam / athādhiprajam / mātā pūrvarūpam / pitottararūpam / prajā sandhiḥ / prajananaṃ sandhānam / ityadhiprajam
TaUp 1.3.4
athādhyātmam / adharā hanuḥ pūrvarūpam / uttarā hanuruttara rūpam / vāksandhiḥ / jihvāsandhānam / ityadhyātmam / itīmā mahāsaṃhitāḥ / ya evametā mahāsaṃhitā vyākhyātā veda / sandhīyate prajayā paśubhiḥ / brahmavarcasenānnādyena suvargyeṇa lokena
TaUp 1.4.1
yaśchandasāmṛṣabho viśvarūpaḥ / chandobhyo 'dhyamṛtātsaṃbabhūva / sa mendro medhayā spṛṇotu / amṛtasya deva dhāraṇo bhūyāsam / śarīraṃ me vicarṣaṇam / jihvā me madhumattamā / karṇābhyāṃ bhūri viśruvam / brahmaṇaḥ kośo 'si medhayā pihitaḥ / śrutaṃ me gopāya
TaUp 1.4.2
āvahantī vitanvānā kurvāṇācīramātmanaḥ / vāsāṃsi mama gāvaśca / annapāne ca sarvadā / tato me śriyamāvaha / lomaśāṃ paśubhiḥ saha svāhā / āmāyantu brahmacāriṇaḥ svāhā / vimāyantu brahmacāriṇaḥ svāhā / pramayantu brahmacāriṇaḥ svāhā / damāyantu brahmacāriṇaḥ svāhā / śamāyantu brahmacāriṇaḥ svāhā // śāmāyantu brahmacāriṇaḥ svāhā
TaUp 1.4.3
yaśo jane 'sāni svāhā / śreyān vasyaso 'sāni svāhā / taṃ tvā bhaga praviśāni svāhā / sa mā bhaga praviśa svāhā / tasmin sahasraśākhe nibhagāhaṃ tvayi mṛje svāhā / yathāpaḥ pravatā yanti yathā māsā aharjaram / evaṃ māṃ brahmacāriṇaḥ / dhātarāyantu sarvataḥ svāhā / prativeśo 'si pra mā bhāhi pra mā padyasva
TaUp 1.5.1
bhūrbhuvaḥ suvariti vā etāstisro vyāhṛtayaḥ / tāsāmu ha smaitāṃ caturthīm / māhācamasyaḥ pravedayate / maha iti / tat brahma / sa ātmā / aṅgānyanyā devatāḥ / bhūriti vā ayaṃ lokaḥ / bhuva ityantarikṣam / suvarityasau lokaḥ
TaUp 1.5.2
maha ityādityaḥ / ādityena vāva sarve loka mahīyante / bhūriti vā agniḥ / bhuva iti vāyuḥ / suvarityādityaḥ / maha iti candramāḥ / candramasā vāva sarvāṇi jyotiṃṣi mahīyante / bhūriti vā ṛcaḥ / bhuva iti sāmāni / suvariti yajūṃṣi
TaUp 1.5.3
maha iti brahma / brahmaṇā vāva sarve vedā mahīyante / bhūriti vai prāṇaḥ / bhuva ityapānaḥ / suvariti vyānaḥ / maha ityannam / annena vāva sarve prāṇa mahīyante / tā vā etāścatasraścaturdha / catasraścatasro vyāhṛtayaḥ / tā yo veda / sa veda brahma / sarve 'smai devā balimāvahanti
TaUp 1.6.1
sa ya eṣo 'ntarahṛdaya ākāśaḥ / tasminnayaṃ puruṣo manomayaḥ / amṛto hiraṇmayaḥ / antareṇa tāluke / ya eṣa stana ivāvalaṃbate / sendrayoniḥ / yatrāsau keśānto vivartate / vyapohya śīrṣakapāle / bhūrityagnau pratitiṣṭhati / bhuva iti vāyau
TaUp 1.6.2
suvarityāditye / maha iti brahmaṇi / āpnoti svārājyam / āpnoti manasaspatim / vākpatiścakṣuṣpatiḥ / śrotraptirvijñānapatiḥ / etattato bhavati / ākāśaśarīraṃ brahma / satyātma prāṇārāmaṃ mana ānandam / śānti samṛddhamamṛtam / iti prācīnayogyopāssva
TaUp 1.7.1
pṛthivyantarikṣaṃ dyaurdiśo 'vāntaradiśāḥ / agnirvāyurādityaścandramā nakṣatrāṇi / āpa oṣadhayo vanaspataya ākāśa ātmā / ityadhibhūtam / athādhyātmam / prāṇo vyāno 'pāna udānaḥ samānaḥ / cakṣuḥ śrotraṃ mano vāk tvak / carma māṃsaṃ snāvāsthi majjā / etadadhividhāya ṛṣiravocat / pāṅktaṃ vā idaṃ sarvam / pāṅktenaiva pāṅktaṃ spṛṇotīti
TaUp 1.8.1
omiti brahma / omitīdaṃ sarvam / omityetadanukṛtirha sma vā apyo śrāvayetyāśrāvayanti / omiti sāmāni gāyanti / oṃśomiti śastrāṇi śaṃsanti / omityadhvaryuḥ pratigaraṃ pratigṛṇāti / omiti brahmā prasauti / omityagnihotramanujānāti / omiti brāhmaṇaḥ pravakṣyannāha brahmopāpnavānīti / brahmaivopāpnoti
TaUp 1.9.1
ṛtaṃ ca svādhyāyapravacane ca / satyaṃ ca svādhyāyapravacane ca / tapaśca svādhyāyapravacane ca / damaśca svādhyāyapravacane ca / śamaśca svādhyāyapravacane ca / agnayaśca svādhyāyapravacane ca / agnihotraṃ ca svādhyāyapravacane ca / atithayaśca svādhyāyapravacane ca / mānuṣaṃ ca svādhyāyapravacane ca / prajā ca svādhyāyapravacane ca / prajanaśca svādhyāyapravacane ca / prajātiśca svādhyāyapravacane ca / satyamiti satyavacā rāthītaraḥ / tapa iti taponityaḥ pauruśiṣṭiḥ / svādhyāyapravacane eveti nāko maudagalyaḥ / taddhi tapastaddhi tapaḥ
TaUp 1.10.1
ahaṃ vṛkṣasya rerivā / kīrtiḥ pṛṣṭhaṃ gireriva / ūrdhvapavitro vājinīva svamṛtamasmi / draviṇaṃ savarcasam / sumedha amṛtokṣitaḥ / iti triśaṅkorvedānuvacanam
TaUp 1.11.1
vedamanūcyācāryontevāsinamanuśāsti / satyaṃ vada / dharmaṃ cara / svādhyāyānmā pramadaḥ / ācāryāya priyaṃ dhanamāhṛtya prajātantuṃ mā vyavacchetsīḥ / satyānna pramaditavyam / dharmānna pramaditavyam / kuśalānna pramaditavyam / bhūtyaina pramaditavyam / svādhyāyapravacanābhyāṃ na pramaditavyam
TaUp 1.11.2
devapitṛkāryābhyāṃ na pramaditavyam / mātṛdevo bhava / pitṛdevo bhava / ācāryadevo bhava / atithidevo bhava / yānyanavadyāni karmāṇi / tāni sevitavyāni / no itarāṇi / yānyasmākaṃ sucaritāni / tāni tvayopāsyāni
TaUp 1.11.3
no itarāṇi / ye ke cārumacchreyāṃso brāhmaṇāḥ / teṣāṃ tvayāsanena praśvasitavyam / śraddhayā deyam / aśraddhayādeyam / śriyā deyam / hriyā deyam / bhiyā deyam / saṃvidā deyam / atha yadi te karmavicikitsā vā vṛttavicikitsā vā syāt
TaUp 1.11.4
ye tatra brāhmaṇāḥ saṃmarśinaḥ / yuktā āyuktāḥ / alūkṣā dharmakāmāḥ syuḥ / yathā te tatra varteran / tathā tatra vartethāḥ / athābhyākhyāteṣu / ye tatra brāhmaṇāḥ saṃmarśinaḥ / yuktā āyuktāḥ / alūkṣā dharmakāmāḥ syuḥ / yathā te teṣu varteran / tathā teṣu vartethāḥ / eṣa ādeśaḥ / eṣa upadeśaḥ / eṣā vedopaniṣat / etadanuśāsanam / evamupāsitavyam / evamu caitadupāsyam
TaUp 1.12.1
śaṃ no mitraḥ śaṃ varuṇaḥ / śaṃ no bhavatvaryamā / śaṃ na indro bṛhaspatiḥ / śaṃ no viṣṇururukramaḥ / namo brahmaṇe / namaste vāyo / tvameva pratyakṣaṃ brahmāsi / tvāmeva pratyakṣaṃ brahmāvādiṣam / ṛtamavādiṣam / satyamavādiṣam / tanmāmāvīt / tadvaktāramāvīt / āvīnmām / āvīt vaktāram / oṃ śāntiḥ śāntiḥ śāntiḥ