Taittiriya Samhita (Black Yajurveda) — Kanda 7 — Chapter 3

TS 7 3.1.1

प्रजवं वा एतेन यन्ति यद् दशमम् अहर् । पापावहीयं वा एतेन भवन्ति यद् दशमम् अहर् यो वै प्रजवं यताम् अपथेन प्रतिपद्यते य स्थाणुꣳ हन्ति यो भ्रेषं न्येति स हीयते स यो वै दशमे ऽहन्न् अविवाक्य उपहन्यते स हीयते तस्मै य उपहताय व्याह तम् एवान्वारभ्य सम् अश्नुते । अथ यो व्याह सः

prajavaṃ vā etena yanti yad daśamam ahar | pāpāvahīyaṃ vā etena bhavanti yad daśamam ahar yo vai prajavaṃ yatām apathena pratipadyate ya sthāṇuṃ hanti yo bhreṣaṃ nyeti sa hīyate sa yo vai daśame 'hann avivākya upahanyate sa hīyate tasmai ya upahatāya vyāha tam evānvārabhya sam aśnute | atha yo vyāha saḥ

TS 7 3.1.2

हीयते तस्माद् दशमे ऽहन्न् अविवाक्य उपहताय न व्युच्यम् अथो खल्व् आहुर् यज्ञस्य वै समृद्धेन देवाः सुवर्गं लोकम् आयन् यज्ञस्य व्यृद्धेनासुरान् पराऽभावयन्न् इति यत् खलु वै यज्ञस्य समृद्धं तद् यजमानस्य यद् व्यृद्धं तद् भ्रातृव्यस्य स यो वै दशमे ऽहन्न् अविवाक्य उपहन्यते स एवाति रेचयति ते ये बाह्या दृशीकवः

hīyate tasmād daśame 'hann avivākya upahatāya na vyucyam atho khalv āhur yajñasya vai samṛddhena devāḥ suvargaṃ lokam āyan yajñasya vyṛddhenāsurān parā'bhāvayann iti yat khalu vai yajñasya samṛddhaṃ tad yajamānasya yad vyṛddhaṃ tad bhrātṛvyasya sa yo vai daśame 'hann avivākya upahanyate sa evāti recayati te ye bāhyā dṛśīkavaḥ

TS 7 3.1.3

स्युस् ते वि ब्रूयुः । यदि तत्र न विन्देयुर् अन्तःसदसाद् व्युच्यम् । तद् व्युच्यम् एव । अथ वा एतत् सर्पराज्ञिया ऋग्भिः स्तुवन्ति । इयं वै सर्पतो राज्ञी यद् वा अस्यां किं चार्चन्ति यद् आनृचुस् तेनेयꣳ सर्पराज्ञी ते यद् एव किं च वाचाऽऽनृचुर् यद् अतो ऽध्य् अर्चितारः

syus te vi brūyuḥ | yadi tatra na vindeyur antaḥsadasād vyucyam | tad vyucyam eva | atha vā etat sarparājñiyā ṛgbhiḥ stuvanti | iyaṃ vai sarpato rājñī yad vā asyāṃ kiṃ cārcanti yad ānṛcus teneyaṃ sarparājñī te yad eva kiṃ ca vācā''nṛcur yad ato 'dhy arcitāraḥ

TS 7 3.1.4

तद् उभयम् आप्त्वाऽवरुध्योत् तिष्ठामेति ताभिर् मनसा स्तुवते न वा इमाम् अश्वरथो नाश्वतरीरथः सद्यः पर्याप्तुम् अर्हति मनो वा इमाꣳ सद्यः पर्याप्तुम् अर्हति मनः परिभवितुम् अथ ब्रह्म वदन्ति परिमिता वा ऋचः परिमितानि सामानि परिमितानि यजूꣳष्य् अथैतस्यैवान्तो नास्ति यद् ब्रह्म तत् प्रतिगृणत आ चक्षीत स प्रतिगरः ॥

tad ubhayam āptvā'varudhyot tiṣṭhāmeti tābhir manasā stuvate na vā imām aśvaratho nāśvatarīrathaḥ sadyaḥ paryāptum arhati mano vā imāṃ sadyaḥ paryāptum arhati manaḥ paribhavitum atha brahma vadanti parimitā vā ṛcaḥ parimitāni sāmāni parimitāni yajūṃṣy athaitasyaivānto nāsti yad brahma tat pratigṛṇata ā cakṣīta sa pratigaraḥ ||

TS 7 3.2.1

ब्रह्मवादिनो वदन्ति किं द्वादशाहस्य प्रथमेनाह्नर्त्विजां यजमानो वृङ्क्त इति तेज इन्द्रियम् इति किं द्वितीयेनेति प्राणान् अन्नाद्यम् इति किं तृतीयेनेति त्रीन् इमाँल्लोकान् इति किं चतुर्थेनेति चतुष्पदः पशून् इति किम् पञ्चमेनेति पञ्चाक्षराम् पङ्क्तिम् इति किꣳ षष्ठेनेति षड् ऋतून् इति किꣳ सप्तमेनेति सप्तपदाꣳ शक्वरीम् इति

brahmavādino vadanti kiṃ dvādaśāhasya prathamenāhnartvijāṃ yajamāno vṛṅkta iti teja indriyam iti kiṃ dvitīyeneti prāṇān annādyam iti kiṃ tṛtīyeneti trīn imāṃllokān iti kiṃ caturtheneti catuṣpadaḥ paśūn iti kim pañcameneti pañcākṣarām paṅktim iti kiṃ ṣaṣṭheneti ṣaḍ ṛtūn iti kiṃ saptameneti saptapadāṃ śakvarīm iti

TS 7 3.2.2

किम् अष्टमेनेति । अष्टाक्षरां गायत्रीम् इति किं नवमेनेति त्रिवृतꣳ स्तोमम् इति किं दशमेनेति दशाक्षरां विराजम् इति किम् एकादशेनेति । एकादशाक्षरां त्रिष्टुभम् इति किं द्वादशेनेति द्वादशाक्षरां जगतीम् इति । एतावद् वा अस्ति यावद् एतत् । यावद् एवास्ति तद् एषां वृङ्क्ते ॥

kim aṣṭameneti | aṣṭākṣarāṃ gāyatrīm iti kiṃ navameneti trivṛtaṃ stomam iti kiṃ daśameneti daśākṣarāṃ virājam iti kim ekādaśeneti | ekādaśākṣarāṃ triṣṭubham iti kiṃ dvādaśeneti dvādaśākṣarāṃ jagatīm iti | etāvad vā asti yāvad etat | yāvad evāsti tad eṣāṃ vṛṅkte ||

TS 7 3.3.1

एष वा आप्तो द्वादशाहो यत् त्रयोदशरात्रः समानꣳ ह्य् एतद् अहर् यत् प्रायणीयश् चोदयनीयश् च त्र्यतिरात्रो भवति त्रय इमे लोकाः । एषां लोकानाम् आप्त्यै प्राणो वै प्रथमो ऽतिरात्रो व्यानो द्वितीयो ऽपानस् तृतीयः प्राणापानोदानेष्व् एवान्नाद्ये प्रति तिष्ठन्ति सर्वम् आयुर् यन्ति य एवं विद्वाꣳसस् त्रयोदशरात्रम् आसते तद् आहुः । वाग् वा एषा वितता

eṣa vā āpto dvādaśāho yat trayodaśarātraḥ samānaṃ hy etad ahar yat prāyaṇīyaś codayanīyaś ca tryatirātro bhavati traya ime lokāḥ | eṣāṃ lokānām āptyai prāṇo vai prathamo 'tirātro vyāno dvitīyo 'pānas tṛtīyaḥ prāṇāpānodāneṣv evānnādye prati tiṣṭhanti sarvam āyur yanti ya evaṃ vidvāṃsas trayodaśarātram āsate tad āhuḥ | vāg vā eṣā vitatā

TS 7 3.3.2

यद् द्वादशाहस् तां वि छिन्द्युर् यन् मध्ये ऽतिरात्रं कुर्युर् उपदासुका गृहपतेर् वाक् स्यात् । उपरिष्टाच् छन्दोमानाम् महाव्रतं कुर्वन्ति संतताम् एव वाचम् अव रुन्द्धे ऽनुपदासुका गृहपतेर् वाग् भवति पशवो वै छन्दोमा अन्नम् महाव्रतम् । यद् उपरिष्टाच् छन्दोमानाम् महाव्रतं कुर्वन्ति पशुषु चैवान्नाद्ये च प्रति तिष्ठन्ति ॥

yad dvādaśāhas tāṃ vi chindyur yan madhye 'tirātraṃ kuryur upadāsukā gṛhapater vāk syāt | upariṣṭāc chandomānām mahāvrataṃ kurvanti saṃtatām eva vācam ava runddhe 'nupadāsukā gṛhapater vāg bhavati paśavo vai chandomā annam mahāvratam | yad upariṣṭāc chandomānām mahāvrataṃ kurvanti paśuṣu caivānnādye ca prati tiṣṭhanti ||

TS 7 3.4.1

आदित्या अकामयन्त । उभयोर् लोकयोर् ऋध्नुयामेति त एतं चतुर्दशरात्रम् अपश्यन् तम् आहरन् तेनायजन्त ततो वै त उभयोर् लोकयोर् आर्ध्नुवन्न् अस्मिꣳश् चामुष्मिꣳश् च य एवं विद्वाꣳसश् चतुर्दशरात्रम् आसत उभयोर् एव लोकयोर् ऋध्नुवन्त्य् अस्मिꣳश् चामुष्मिꣳश् च चतुर्दशरात्रो भवति सप्त ग्राम्या ओषधयः सप्तारण्या उभयीषाम् अवरुद्ध्यै यत् पराचीनानि पृष्ठानि

ādityā akāmayanta | ubhayor lokayor ṛdhnuyāmeti ta etaṃ caturdaśarātram apaśyan tam āharan tenāyajanta tato vai ta ubhayor lokayor ārdhnuvann asmiṃś cāmuṣmiṃś ca ya evaṃ vidvāṃsaś caturdaśarātram āsata ubhayor eva lokayor ṛdhnuvanty asmiṃś cāmuṣmiṃś ca caturdaśarātro bhavati sapta grāmyā oṣadhayaḥ saptāraṇyā ubhayīṣām avaruddhyai yat parācīnāni pṛṣṭhāni

TS 7 3.4.2

भवन्त्य् अमुम् एव तैर् लोकम् अभि जयन्ति यत् प्रतीचीनानि पृष्ठानि भवन्तीमम् एव तैर् लोकम् अभि जयन्ति त्रयस्त्रिꣳशौ मध्यत स्तोमौ भवतः साम्राज्यम् एव गच्छन्ति । अधिराजौ भवतो ऽधिराजा एव समानानाम् भवन्ति । अतिरात्रावभितो भवतः परिगृहीत्यै ॥

bhavanty amum eva tair lokam abhi jayanti yat pratīcīnāni pṛṣṭhāni bhavantīmam eva tair lokam abhi jayanti trayastriṃśau madhyata stomau bhavataḥ sāmrājyam eva gacchanti | adhirājau bhavato 'dhirājā eva samānānām bhavanti | atirātrāvabhito bhavataḥ parigṛhītyai ||

TS 7 3.5.1

प्रजापतिः सुवर्गं लोकम् ऐत् तं देवा अन्व् आयन् तान् आदित्याश् च पशवश् चान्वायन् ते देवा अब्रुवन् यान् पशून् उपाजीविष्म त इमे ऽन्वाग्मन्न् इति तेभ्य एतं चतुर्दशरात्रम् प्रत्य् औहन् त आदित्याः पृष्ठैः सुवर्गं लोकम् आरोहन् त्र्यहाभ्याम् अस्मिम्̐ लोके पशून् प्रत्य् औहन् पृष्ठैर् आदित्या अमुष्मिम्̐ लोक आर्ध्नुवन् त्र्यहाभ्याम् अस्मिन्

prajāpatiḥ suvargaṃ lokam ait taṃ devā anv āyan tān ādityāś ca paśavaś cānvāyan te devā abruvan yān paśūn upājīviṣma ta ime 'nvāgmann iti tebhya etaṃ caturdaśarātram praty auhan ta ādityāḥ pṛṣṭhaiḥ suvargaṃ lokam ārohan tryahābhyām asmiṃ loke paśūn praty auhan pṛṣṭhair ādityā amuṣmiṃ loka ārdhnuvan tryahābhyām asmin

TS 7 3.5.2

लोके पशवः । य एवं विद्वाꣳसश् चतुर्दशरात्रम् आसत उभयोर् एव लोकयोर् ऋध्नुवन्त्य् अस्मिꣳश् चामुष्मिꣳश् च पृष्ठैर् एवामुष्मिम्̐ लोक ऋध्नुवन्ति त्र्यहाभ्याम् अस्मिम्̐ लोके ज्योतिर् गौर् आयुर् इति त्र्यहो भवति । इयं वाव ज्योतिर् अन्तरिक्षं गौर् असाव् आयुः । इमान् एव लोकान् अभ्यारोहन्ति यद् अन्यतः पृष्ठानि स्युर् विविवधꣳ स्यात् । मध्ये पृष्ठानि भवन्ति सविवधत्वाय ॥

loke paśavaḥ | ya evaṃ vidvāṃsaś caturdaśarātram āsata ubhayor eva lokayor ṛdhnuvanty asmiṃś cāmuṣmiṃś ca pṛṣṭhair evāmuṣmiṃ loka ṛdhnuvanti tryahābhyām asmiṃ loke jyotir gaur āyur iti tryaho bhavati | iyaṃ vāva jyotir antarikṣaṃ gaur asāv āyuḥ | imān eva lokān abhyārohanti yad anyataḥ pṛṣṭhāni syur vivivadhaṃ syāt | madhye pṛṣṭhāni bhavanti savivadhatvāya ||

TS 7 3.5.3

ओजो वै वीर्यम् पृष्ठानि । ओज एव वीर्यम् मध्यतो दधते बृहद्रथंतराभ्यां यन्ति । इयं वाव रथंतरम् असौ बृहत् । आभ्याम् एव यन्ति । अथो अनयोर् एव प्रति तिष्ठन्ति । एते वै यज्ञस्याञ्जसायनी स्रुती ताभ्याम् एव सुवर्गं लोकं यन्ति पराञ्चो वा एते सुवर्गं लोकम् अभ्यारोहन्ति ये पराचीनानि पृष्ठान्य् उपयन्ति प्रत्यञ् त्र्यहो भवति प्रत्यवरूढ्या अथो प्रतिष्ठित्यै । उभयोर् लोकयोर् ऋद्ध्वोत् तिष्ठन्ति चतुर्दशैताः । तासां या दश दशाक्षरा विराड् अन्नं विराड् विराजैवान्नाद्यम् अव रुन्धते याश् चतस्रश् चतस्रो दिशो दिक्ष्व् एव प्रति तिष्ठन्ति । अतिरात्राव् अभितो भवतः परिगृहीत्यै ॥

ojo vai vīryam pṛṣṭhāni | oja eva vīryam madhyato dadhate bṛhadrathaṃtarābhyāṃ yanti | iyaṃ vāva rathaṃtaram asau bṛhat | ābhyām eva yanti | atho anayor eva prati tiṣṭhanti | ete vai yajñasyāñjasāyanī srutī tābhyām eva suvargaṃ lokaṃ yanti parāñco vā ete suvargaṃ lokam abhyārohanti ye parācīnāni pṛṣṭhāny upayanti pratyañ tryaho bhavati pratyavarūḍhyā atho pratiṣṭhityai | ubhayor lokayor ṛddhvot tiṣṭhanti caturdaśaitāḥ | tāsāṃ yā daśa daśākṣarā virāḍ annaṃ virāḍ virājaivānnādyam ava rundhate yāś catasraś catasro diśo dikṣv eva prati tiṣṭhanti | atirātrāv abhito bhavataḥ parigṛhītyai ||

TS 7 3.6.1

इन्द्रो वै सदृङ् देवताभिर् आसीत् स न व्यावृतम् अगच्छत् स प्रजापतिम् उपाधावत् तस्मा एतम् पञ्चदशरात्रम् प्रायच्छत् तम् आहरत् तेनायजत ततो वै सो ऽन्याभिर् देवताभिर् व्यावृतम् अगच्छत् । य एवं विद्वाꣳसः पञ्चदशरात्रम् आसते व्यावृतम् एव पाप्मना भ्रातृव्येण गच्छन्ति ज्योतिर् गौर् आयुर् इति त्र्यहो भवति । इयं वाव ज्योतिर् अन्तरिक्षम्

indro vai sadṛṅ devatābhir āsīt sa na vyāvṛtam agacchat sa prajāpatim upādhāvat tasmā etam pañcadaśarātram prāyacchat tam āharat tenāyajata tato vai so 'nyābhir devatābhir vyāvṛtam agacchat | ya evaṃ vidvāṃsaḥ pañcadaśarātram āsate vyāvṛtam eva pāpmanā bhrātṛvyeṇa gacchanti jyotir gaur āyur iti tryaho bhavati | iyaṃ vāva jyotir antarikṣam

TS 7 3.6.2

गौर् असाव् आयुः । एष्व् एव लोकेषु प्रति तिष्ठन्ति । असत्त्रं वा एतद् यद् अच्छन्दोमम् । यच् छन्दोमा भवन्ति तेन सत्त्रम् । देवता एव पृष्ठैर् अव रुन्धते पशूञ् छन्दोमैः । ओजस्य् एव वीर्ये पशुषु प्रति तिष्ठन्ति पञ्चदशरात्रो भवति पञ्चदशो वज्रः । वज्रम् एव भ्रातृव्येभ्यः प्र हरन्ति । अतिरात्राव् अभितो भवतः । इन्द्रियस्य परिगृहीत्यै ॥

gaur asāv āyuḥ | eṣv eva lokeṣu prati tiṣṭhanti | asattraṃ vā etad yad acchandomam | yac chandomā bhavanti tena sattram | devatā eva pṛṣṭhair ava rundhate paśūñ chandomaiḥ | ojasy eva vīrye paśuṣu prati tiṣṭhanti pañcadaśarātro bhavati pañcadaśo vajraḥ | vajram eva bhrātṛvyebhyaḥ pra haranti | atirātrāv abhito bhavataḥ | indriyasya parigṛhītyai ||

TS 7 3.7.1

इन्द्रो वै शिथिल इवाप्रतिष्ठित आसीत् सो ऽसुरेभ्यो ऽबिभेत् स प्रजापतिम् उपाधावत् तस्मा एतम् पञ्चदशरात्रं वज्रम् प्रायच्छत् तेनासुरान् पराभाव्य विजित्य श्रियम् अगच्छत् । अग्निष्टुता पाप्मानं निर् अदहत पञ्चदशरात्रेणौजो बलम् इन्द्रियं वीर्यम् आत्मन्न् अधत्त य एवं विद्वाꣳसः पञ्चदशरात्रम् आसते भ्रातृव्यान् एव पराभाव्य विजित्य श्रियं गच्छन्ति । अग्निष्टुता पाप्मानं निः

indro vai śithila ivāpratiṣṭhita āsīt so 'surebhyo 'bibhet sa prajāpatim upādhāvat tasmā etam pañcadaśarātraṃ vajram prāyacchat tenāsurān parābhāvya vijitya śriyam agacchat | agniṣṭutā pāpmānaṃ nir adahata pañcadaśarātreṇaujo balam indriyaṃ vīryam ātmann adhatta ya evaṃ vidvāṃsaḥ pañcadaśarātram āsate bhrātṛvyān eva parābhāvya vijitya śriyaṃ gacchanti | agniṣṭutā pāpmānaṃ niḥ

TS 7 3.7.2

दहन्ते पञ्चदशरात्रेणौजो बलम् इन्द्रियं वीर्यम् आत्मन् दधते । एता एव पशव्याः पञ्चदश वा अर्धमासस्य रात्रयः । अर्धमासशः संवत्सर आप्यते संवत्सरम् पशवो ऽनु प्र जायन्ते तस्मात् पशव्याः । एता एव सुवर्ग्याः पञ्चदश वा अर्धमासस्य रात्रयः । अर्धमासशः संवत्सर आप्यते संवत्सरः सुवर्गो लोकस् तस्माद् सुवर्ग्याः । ज्योतिर् गौर् आयुर् इति त्र्यहो भवति । इयं वाव ज्योतिर् अन्तरिक्षम्

dahante pañcadaśarātreṇaujo balam indriyaṃ vīryam ātman dadhate | etā eva paśavyāḥ pañcadaśa vā ardhamāsasya rātrayaḥ | ardhamāsaśaḥ saṃvatsara āpyate saṃvatsaram paśavo 'nu pra jāyante tasmāt paśavyāḥ | etā eva suvargyāḥ pañcadaśa vā ardhamāsasya rātrayaḥ | ardhamāsaśaḥ saṃvatsara āpyate saṃvatsaraḥ suvargo lokas tasmād suvargyāḥ | jyotir gaur āyur iti tryaho bhavati | iyaṃ vāva jyotir antarikṣam

TS 7 3.7.3

गौर् असाव् आयुः । इमान् एव लोकान् अभ्यारोहन्ति यद् अन्यतः पृष्ठानि स्युर् विविवधꣳ स्यात् । मध्ये पृष्ठानि भवन्ति सविवधत्वाय । ओजो वै वीर्यम् पृष्ठानि । ओज एव वीर्यम् मध्यतो दधते बृहद्रथंतराभ्यां यन्ति । इयं वाव रथंतरम् असौ बृहत् । आभ्याम् एव यन्ति । अथो अनयोर् एव प्रति तिष्ठन्ति । एते वै यज्ञस्याञ्जसायनी स्रुती ताभ्याम् एव सुवर्गं लोकम्

gaur asāv āyuḥ | imān eva lokān abhyārohanti yad anyataḥ pṛṣṭhāni syur vivivadhaṃ syāt | madhye pṛṣṭhāni bhavanti savivadhatvāya | ojo vai vīryam pṛṣṭhāni | oja eva vīryam madhyato dadhate bṛhadrathaṃtarābhyāṃ yanti | iyaṃ vāva rathaṃtaram asau bṛhat | ābhyām eva yanti | atho anayor eva prati tiṣṭhanti | ete vai yajñasyāñjasāyanī srutī tābhyām eva suvargaṃ lokam

TS 7 3.7.4

यन्ति पराञ्चो वा एते सुवर्गं लोकम् अभ्यारोहन्ति ये पराचीनानि पृष्ठान्य् उपयन्ति प्रत्यञ् त्र्यहो भवति प्रत्यवरूढ्या अथो प्रतिष्ठित्यै । उभयोर् लोकयोर् ऋद्ध्वोत् तिष्ठन्ति पञ्चदशैतास् तासां या दश दशाक्षरा विराड् अन्नं विराड् विराजैवान्नाद्यम् अव रुन्धते याः पञ्च पञ्च दिशः दिक्ष्व् एव प्रति तिष्ठन्ति । अतिरात्राव् अभितो भवतः । इन्द्रियस्य वीर्यस्य प्रजायै पशूनाम् परिगृहीत्यै ॥

yanti parāñco vā ete suvargaṃ lokam abhyārohanti ye parācīnāni pṛṣṭhāny upayanti pratyañ tryaho bhavati pratyavarūḍhyā atho pratiṣṭhityai | ubhayor lokayor ṛddhvot tiṣṭhanti pañcadaśaitās tāsāṃ yā daśa daśākṣarā virāḍ annaṃ virāḍ virājaivānnādyam ava rundhate yāḥ pañca pañca diśaḥ dikṣv eva prati tiṣṭhanti | atirātrāv abhito bhavataḥ | indriyasya vīryasya prajāyai paśūnām parigṛhītyai ||

TS 7 3.8.1

प्रजापतिर् अकामयत । अन्नादः स्याम् इति स एतꣳ सप्तदशरात्रम् अपश्यत् तम् आहरत् तेनायजत ततो वै सो ऽन्नादो ऽभवत् । य एवं विद्वाꣳसः सप्तदशरात्रम् आसते ऽन्नादा एव भवन्ति पञ्चाहो भवति पञ्च वा ऋतवः संवत्सरः । ऋतुष्व् एव संवत्सरे प्रति तिष्ठन्ति । अथो पञ्चाक्षरा पङ्क्तिः पाङ्क्तो यज्ञः । यज्ञम् एवाव रुन्धते । असत्त्रं वा एतत्

prajāpatir akāmayata | annādaḥ syām iti sa etaṃ saptadaśarātram apaśyat tam āharat tenāyajata tato vai so 'nnādo 'bhavat | ya evaṃ vidvāṃsaḥ saptadaśarātram āsate 'nnādā eva bhavanti pañcāho bhavati pañca vā ṛtavaḥ saṃvatsaraḥ | ṛtuṣv eva saṃvatsare prati tiṣṭhanti | atho pañcākṣarā paṅktiḥ pāṅkto yajñaḥ | yajñam evāva rundhate | asattraṃ vā etat

TS 7 3.8.2

यद् अच्छन्दोमम् । यच् छन्दोमा भवन्ति तेन सत्त्रम् । देवता एव पृष्ठैर् अव रुन्धते पशूञ् छन्दोमैः । ओजस्य् एव वीर्ये पशुषु प्रति तिष्ठन्ति सप्तदशरात्रो भवति सप्तदशः प्रजापतिः प्रजापतेर् आप्त्यै । अतिरात्राव् अभितो भवतः । अन्नाद्यस्य परिगृहीत्यै ॥

yad acchandomam | yac chandomā bhavanti tena sattram | devatā eva pṛṣṭhair ava rundhate paśūñ chandomaiḥ | ojasy eva vīrye paśuṣu prati tiṣṭhanti saptadaśarātro bhavati saptadaśaḥ prajāpatiḥ prajāpater āptyai | atirātrāv abhito bhavataḥ | annādyasya parigṛhītyai ||

TS 7 3.9.1

सा विराड् विक्रम्यातिष्ठद् ब्रह्मणा देवेष्व् अन्नेनासुरेषु ते देवा अकामयन्त । उभयꣳ सं वृञ्जीमहि ब्रह्म चान्नं चेति त एता विꣳशतिꣳ रात्रीर् अपश्यन् ततो वै त उभयꣳ सम् अवृञ्जत ब्रह्म चान्नं च ब्रह्मवर्चसिनो ऽन्नादा अभवन् य एवं विद्वाꣳस एता आसत उभयम् एव सं वृञ्जते ब्रह्म चान्नं च ।

sā virāḍ vikramyātiṣṭhad brahmaṇā deveṣv annenāsureṣu te devā akāmayanta | ubhayaṃ saṃ vṛñjīmahi brahma cānnaṃ ceti ta etā viṃśatiṃ rātrīr apaśyan tato vai ta ubhayaṃ sam avṛñjata brahma cānnaṃ ca brahmavarcasino 'nnādā abhavan ya evaṃ vidvāṃsa etā āsata ubhayam eva saṃ vṛñjate brahma cānnaṃ ca |

TS 7 3.9.2

ब्रह्मवर्चसिनो ऽन्नादा भवन्ति द्वे वा एते विराजौ तयोर् एव नाना प्रति तिष्ठन्ति विꣳशो वै पुरुषो दश हस्त्या अङ्गुलयो दश पद्याः । यावान् एव पुरुषस् तम् आप्त्वोत् तिष्ठन्ति ज्योतिर् गौर् आयुर् इति त्र्यहा भवन्ति । इयं वाव ज्योतिर् अन्तरिक्षं गौर् असाव् आयुः । इमान् एव लोकान् अभ्यारोहन्ति । अभिपूर्वं त्र्यहा भवन्ति । अभिपूर्वम् एव सुवर्गम्

brahmavarcasino 'nnādā bhavanti dve vā ete virājau tayor eva nānā prati tiṣṭhanti viṃśo vai puruṣo daśa hastyā aṅgulayo daśa padyāḥ | yāvān eva puruṣas tam āptvot tiṣṭhanti jyotir gaur āyur iti tryahā bhavanti | iyaṃ vāva jyotir antarikṣaṃ gaur asāv āyuḥ | imān eva lokān abhyārohanti | abhipūrvaṃ tryahā bhavanti | abhipūrvam eva suvargam

TS 7 3.9.3

लोकम् अभ्यारोहन्ति यद् अन्यतः पृष्ठानि मध्ये पृष्ठानि भवन्ति सविवधत्वाय ॥ ओजो वै वीर्यम् पृष्ठानि । ओज एव वीर्यम् मध्यतो दधते बृहद्रथंतराभ्यां यन्ति । इयं वाव रथंतरम् असौ बृहत् । आभ्याम् एव यन्ति । अथो अनयोर् एव प्रति तिष्ठन्ति । एते वै यज्ञस्याञ्जसायनी स्रुती ताभ्याम् एव सुवर्गं लोकं यन्ति पराञ्चो वा एते सुवर्गं लोकम् अभ्यारोहन्ति ये पराचीनानि पृष्ठान्य् उपयन्ति प्रत्यञ् त्र्यहो भवति प्रत्यवरूढ्या अथो प्रतिष्ठित्यै । उभयोर् लोकयोर् ऋद्ध्वोत् तिष्ठन्ति । अतिरात्राव् अभितो भवतः । ब्रह्मवर्चसस्यान्नाद्यस्य परि गृहीत्यै ॥

lokam abhyārohanti yad anyataḥ pṛṣṭhāni madhye pṛṣṭhāni bhavanti savivadhatvāya || ojo vai vīryam pṛṣṭhāni | oja eva vīryam madhyato dadhate bṛhadrathaṃtarābhyāṃ yanti | iyaṃ vāva rathaṃtaram asau bṛhat | ābhyām eva yanti | atho anayor eva prati tiṣṭhanti | ete vai yajñasyāñjasāyanī srutī tābhyām eva suvargaṃ lokaṃ yanti parāñco vā ete suvargaṃ lokam abhyārohanti ye parācīnāni pṛṣṭhāny upayanti pratyañ tryaho bhavati pratyavarūḍhyā atho pratiṣṭhityai | ubhayor lokayor ṛddhvot tiṣṭhanti | atirātrāv abhito bhavataḥ | brahmavarcasasyānnādyasya pari gṛhītyai ||

TS 7 3.10.1

असाव आदित्यो ऽस्मिम्̐ लोक आसीत् तं देवाः पृष्ठैः परिगृह्य सुवर्गं लोकम् अगमयन् परैर् अवस्तात् पर्य् अगृह्णन् दिवाकीर्त्येन सुवर्गे लोके प्रत्य् अस्थापयन् परैः परस्तात् पर्य् अगृह्णन् पृष्ठैर् उपावारोहन् । स वा असाव् आदित्यो ऽमुष्मिम्̐ लोके परैर् उभयतः परिगृहीतः । यत् पृष्ठानि भवन्ति सुवर्गम् एव तैर् लोकं यजमाना यन्ति परैर् अवस्तात् परि गृह्णन्ति दिवाकीर्त्येन

asāva ādityo 'smiṃ loka āsīt taṃ devāḥ pṛṣṭhaiḥ parigṛhya suvargaṃ lokam agamayan parair avastāt pary agṛhṇan divākīrtyena suvarge loke praty asthāpayan paraiḥ parastāt pary agṛhṇan pṛṣṭhair upāvārohan | sa vā asāv ādityo 'muṣmiṃ loke parair ubhayataḥ parigṛhītaḥ | yat pṛṣṭhāni bhavanti suvargam eva tair lokaṃ yajamānā yanti parair avastāt pari gṛhṇanti divākīrtyena

TS 7 3.10.2

सुवर्गे लोके प्रति तिष्ठन्ति परैः परस्तात् परि गृह्णन्ति पृष्ठैर् उपावरोहन्ति यत् परे परस्तान् न स्युः पराञ्चः सुवर्गाल् लोकान् निष्पद्येरन् यद् अवस्तान् न स्युः प्रजा निर् दहेयुः । अभितो दिवाकीर्त्यम् परःसामानो भवन्ति सुवर्ग एवैनाम्̐ लोक उभयतः परि गृह्णन्ति यजमाना वै दिवाकीर्त्यम् । संवत्सरः परःसामानः । अभितो दिवाकीर्त्यम् परःसामानो भवन्ति संवत्सर एवोभयतः

suvarge loke prati tiṣṭhanti paraiḥ parastāt pari gṛhṇanti pṛṣṭhair upāvarohanti yat pare parastān na syuḥ parāñcaḥ suvargāl lokān niṣpadyeran yad avastān na syuḥ prajā nir daheyuḥ | abhito divākīrtyam paraḥsāmāno bhavanti suvarga evaināṃ loka ubhayataḥ pari gṛhṇanti yajamānā vai divākīrtyam | saṃvatsaraḥ paraḥsāmānaḥ | abhito divākīrtyam paraḥsāmāno bhavanti saṃvatsara evobhayataḥ

TS 7 3.10.3

प्रति तिष्ठन्ति पृष्ठं वै दिवाकीर्त्यम् पार्श्वे परःसामानः । अभितो दिवाकीर्त्यम् परःसामानो भवन्ति तस्मादभितः पृष्ठम् पार्श्वे भूयिष्ठा ग्रहा गृह्यन्ते भूयिष्ठꣳ शस्यते यज्ञस्यैव तन् मध्यतो ग्रन्थिं ग्रथ्नन्त्य् अविस्रꣳसाय सप्त गृह्यन्ते सप्त वै शीर्षण्याः प्राणाः प्राणान् एव यजमानेषु दधति यत् पराचीनानि पृष्ठानि भवन्त्य् अमुम् एव तैर् लोकम् अभ्यारोहन्ति यद् इमं लोकं न

prati tiṣṭhanti pṛṣṭhaṃ vai divākīrtyam pārśve paraḥsāmānaḥ | abhito divākīrtyam paraḥsāmāno bhavanti tasmādabhitaḥ pṛṣṭham pārśve bhūyiṣṭhā grahā gṛhyante bhūyiṣṭhaṃ śasyate yajñasyaiva tan madhyato granthiṃ grathnanty avisraṃsāya sapta gṛhyante sapta vai śīrṣaṇyāḥ prāṇāḥ prāṇān eva yajamāneṣu dadhati yat parācīnāni pṛṣṭhāni bhavanty amum eva tair lokam abhyārohanti yad imaṃ lokaṃ na

TS 7 3.10.4

प्रत्यवरोहेयुर् उद् वा माद्येयुर् यजमानाः प्र वा मीयेरन् यत् प्रतीचीनानि पृष्ठानि भवन्ति । इमम् एव तैर् लोकम् प्रत्यवरोहन्ति । अथो अस्मिन्न् एव लोके प्रति तिष्ठन्त्य् अनुन्मादाय । इन्द्रो वा अप्रतिष्ठित आसीत् स प्रजापतिम् उपाधावत् तस्मा एतम् एकविꣳशतिरात्रम् प्रायच्छत् तम् आहरत् तेनायजत ततो वै स प्रत्य् अतिष्ठत् । ये बहुयाजिनो ऽप्रतिष्ठिताः

pratyavaroheyur ud vā mādyeyur yajamānāḥ pra vā mīyeran yat pratīcīnāni pṛṣṭhāni bhavanti | imam eva tair lokam pratyavarohanti | atho asminn eva loke prati tiṣṭhanty anunmādāya | indro vā apratiṣṭhita āsīt sa prajāpatim upādhāvat tasmā etam ekaviṃśatirātram prāyacchat tam āharat tenāyajata tato vai sa praty atiṣṭhat | ye bahuyājino 'pratiṣṭhitāḥ

TS 7 3.10.5

स्युस् त एकविꣳशतिरात्रम् आसीरन् द्वादश मासाः पञ्चर्तवस् त्रय इमे लोका असाव् आदित्य एकविꣳशः । एतावन्तो वै देवलोकास् तेष्व् एव यथापूर्वम् प्रति तिष्ठन्ति । असाव् आदित्यो न व्यरोचत स प्रजापतिम् उपाधावत् तस्मा एतम् एकविꣳशति रात्रम् प्रायच्छत् तम् आहरत् तेनायजत ततो वै सो ऽरोचत य एवं विद्वाꣳस एकविꣳशतिरात्रम् आसते रोचन्त एव । एकविꣳशतिरात्रो भवति रुग् वा एकविꣳशः । रुचम् एव गच्छन्त्य् अथो प्रतिष्ठाम् एव प्रतिष्ठा ह्य् एकविꣳशः । अतिरात्राव् अभितो भवतो ब्रह्मवर्चसस्य परिगृहीत्यै ॥

syus ta ekaviṃśatirātram āsīran dvādaśa māsāḥ pañcartavas traya ime lokā asāv āditya ekaviṃśaḥ | etāvanto vai devalokās teṣv eva yathāpūrvam prati tiṣṭhanti | asāv ādityo na vyarocata sa prajāpatim upādhāvat tasmā etam ekaviṃśati rātram prāyacchat tam āharat tenāyajata tato vai so 'rocata ya evaṃ vidvāṃsa ekaviṃśatirātram āsate rocanta eva | ekaviṃśatirātro bhavati rug vā ekaviṃśaḥ | rucam eva gacchanty atho pratiṣṭhām eva pratiṣṭhā hy ekaviṃśaḥ | atirātrāv abhito bhavato brahmavarcasasya parigṛhītyai ||

TS 7 3.11.1

अर्वाङ् यज्ञः सं क्रामत्व् अमुष्माद् अधि माम् अभि । ऋषीणां यः पुरोहितः । निर्देवं निर्वीरं कृत्वा विष्कन्धं तस्मिन् हीयतां यो ऽस्मान् द्वेष्टि शरीरं यज्ञशमलं कुसीदं तस्मिन्त् सीदतु यो ऽस्मान् द्वेष्टि । यज्ञ यज्ञस्य यत् तेजस् तेन सं क्राममाम् अभि । ब्राह्मणान् ऋत्विजो देवान् यज्ञस्य तपसा ते सवाहम् आ हुवे । इष्टेन पक्व प

arvāṅ yajñaḥ saṃ krāmatv amuṣmād adhi mām abhi | ṛṣīṇāṃ yaḥ purohitaḥ | nirdevaṃ nirvīraṃ kṛtvā viṣkandhaṃ tasmin hīyatāṃ yo 'smān dveṣṭi śarīraṃ yajñaśamalaṃ kusīdaṃ tasmint sīdatu yo 'smān dveṣṭi | yajña yajñasya yat tejas tena saṃ krāmamām abhi | brāhmaṇān ṛtvijo devān yajñasya tapasā te savāham ā huve | iṣṭena pakva pa

TS 7 3.11.2

ते हुवे सवाहम् । सं ते वृञ्जे सुकृतꣳ सम् प्रजाम् पशून् । प्रैषान्त् सामिधेनीर् आघाराव् आज्यभागाव् आश्रुतम् प्रत्याश्रुतम् आ शृणामि ते । प्रयाजानूयाजान्त् स्विष्टकृतम् इडाम् आशिष आ वृञ्जे सुवः । अग्निनेन्द्रेण सोमेन सरस्वत्या विष्णुना देवताभिः । याज्यानुवाक्याभ्याम् उप ते हुवे सवाहं यज्ञम् आ ददे ते वषट्कृतम् । स्तुतꣳ शस्त्रम् प्रतिगरं ग्रहम् इडाम् आशिषः ।

te huve savāham | saṃ te vṛñje sukṛtaṃ sam prajām paśūn | praiṣānt sāmidhenīr āghārāv ājyabhāgāv āśrutam pratyāśrutam ā śṛṇāmi te | prayājānūyājānt sviṣṭakṛtam iḍām āśiṣa ā vṛñje suvaḥ | agninendreṇa somena sarasvatyā viṣṇunā devatābhiḥ | yājyānuvākyābhyām upa te huve savāhaṃ yajñam ā dade te vaṣaṭkṛtam | stutaṃ śastram pratigaraṃ graham iḍām āśiṣaḥ |

TS 7 3.11.3

आ वृञ्जे सुवः । पत्नीसंयाजान् उप ते हुवे सवाहꣳ समिष्टयजुर् आ ददे तव ॥ पशून्त् सुतम् पुरोडाशान्त् सवनान्य् ओत यज्ञम् । देवान्त् सेन्द्रान् उप ते हुवे सवाहम् अग्निमुखान्त् सोमवतो ये च विश्वे ॥

ā vṛñje suvaḥ | patnīsaṃyājān upa te huve savāhaṃ samiṣṭayajur ā dade tava || paśūnt sutam puroḍāśānt savanāny ota yajñam | devānt sendrān upa te huve savāham agnimukhānt somavato ye ca viśve ||

TS 7 3.12.1

भूतम् भव्यम् भविष्यद् वषट् स्वाहा नमः । ऋक् साम यजुर् वषट् स्वाहा नमः । गायत्री त्रिष्टुब् जगती वषट् स्वाहा नमः पृथिव्यन्तरिक्षं द्यौर् वषट् स्वाहा नमः । अग्निर् वायुः सूर्यो वषट् स्वाहा नमः प्राणो व्यानो ऽपानो वषट् स्वाहा नमः । अन्नं कृषिर् वृष्टिर् वषट् स्वाहा नमः पिता पुत्रः पौत्रो वषट् स्वाहा नमः । भूर् भुवः सुवर् वषट् स्वाहा नमः ॥

bhūtam bhavyam bhaviṣyad vaṣaṭ svāhā namaḥ | ṛk sāma yajur vaṣaṭ svāhā namaḥ | gāyatrī triṣṭub jagatī vaṣaṭ svāhā namaḥ pṛthivyantarikṣaṃ dyaur vaṣaṭ svāhā namaḥ | agnir vāyuḥ sūryo vaṣaṭ svāhā namaḥ prāṇo vyāno 'pāno vaṣaṭ svāhā namaḥ | annaṃ kṛṣir vṛṣṭir vaṣaṭ svāhā namaḥ pitā putraḥ pautro vaṣaṭ svāhā namaḥ | bhūr bhuvaḥ suvar vaṣaṭ svāhā namaḥ ||

TS 7 3.13.1

आ मे गृहा भवन्त्व् आ प्रजा म आ मा यज्ञो विशतु वीर्यावान् । आपो देवीर् यज्ञिया मा विशन्तु सहस्रस्य मा भूमा मा प्र हासीत् । आ मे ग्रहो भवत्व् आ पुरोरुक् स्तुतशस्त्रे मा विशताꣳ समीची । आदित्या रुद्रा वसवो मे सदस्याः सहस्रस्य मा भूमा मा प्र हासीत् । आ माग्निष्टोमो विशतूक्थ्यश् चातिरात्रो मा विशत्व् आपिशर्वरः । तिरोअह्निया मा सुहुता आ विशन्तु सहस्रस्य मा भूमा मा प्र हासीत् ॥

ā me gṛhā bhavantv ā prajā ma ā mā yajño viśatu vīryāvān | āpo devīr yajñiyā mā viśantu sahasrasya mā bhūmā mā pra hāsīt | ā me graho bhavatv ā puroruk stutaśastre mā viśatāṃ samīcī | ādityā rudrā vasavo me sadasyāḥ sahasrasya mā bhūmā mā pra hāsīt | ā māgniṣṭomo viśatūkthyaś cātirātro mā viśatv āpiśarvaraḥ | tiroahniyā mā suhutā ā viśantu sahasrasya mā bhūmā mā pra hāsīt ||

TS 7 3.14.1

अग्निना तपो ऽन्व् अभवत् । वाचा ब्रह्म मणिना रूपाणि । इन्द्रेण देवान् वातेन प्राणान् । सूर्येण द्याम् । चन्द्रमसा नक्षत्राणि यमेन पितॄन् राज्ञा मनुष्यान् फलेन नादेयान् अजगरेण सर्पान् व्याघ्रेणाऽऽरण्यान् पशून् । श्येनेन पतत्रिणः । वृष्णाऽश्वान् ऋषभेण गाः । बस्तेनाजाः । वृष्णिनाऽवीः । व्रीहिणाऽन्नानि यवेनौषधीः । न्यग्रोधेन वनस्पतीन् उदुम्बरेणोर्जम् । गायत्रिया छन्दाꣳसि त्रिवृता स्तोमान् ब्राह्मणेन वाचम् ॥

agninā tapo 'nv abhavat | vācā brahma maṇinā rūpāṇi | indreṇa devān vātena prāṇān | sūryeṇa dyām | candramasā nakṣatrāṇi yamena pitṝn rājñā manuṣyān phalena nādeyān ajagareṇa sarpān vyāghreṇā''raṇyān paśūn | śyenena patatriṇaḥ | vṛṣṇā'śvān ṛṣabheṇa gāḥ | bastenājāḥ | vṛṣṇinā'vīḥ | vrīhiṇā'nnāni yavenauṣadhīḥ | nyagrodhena vanaspatīn udumbareṇorjam | gāyatriyā chandāṃsi trivṛtā stomān brāhmaṇena vācam ||

TS 7 3.15.1

स्वाहाऽऽधिम् आधीताय स्वाहा स्वाहाऽऽधीतम् मनसे स्वाहा स्वाहा मनः प्रजापतये स्वाहा काय स्वाहा कस्मै स्वाहा कतमस्मै स्वाहा । अदित्यै स्वाहा । अदित्यै मह्यै स्वाहा । अदित्यै सुमृडीकायै स्वाहा सरस्वत्यै स्वाहा सरस्वत्यै बृहत्यै स्वाहा सरस्वत्यै पावकायै स्वाहा पूष्णे स्वाहा पूष्णे प्रपथ्याय स्वाहा पूष्णे नरंधिषाय स्वाहा त्वष्ट्रे स्वाहा त्वष्ट्रे तुरीपाय स्वाहा त्वष्ट्रे पुरुरूपाय स्वाहा विष्णवे स्वाहा विष्णवे निखुर्यपाय स्वाहा विष्णवे निभूयपाय स्वाहा ॥

svāhā''dhim ādhītāya svāhā svāhā''dhītam manase svāhā svāhā manaḥ prajāpataye svāhā kāya svāhā kasmai svāhā katamasmai svāhā | adityai svāhā | adityai mahyai svāhā | adityai sumṛḍīkāyai svāhā sarasvatyai svāhā sarasvatyai bṛhatyai svāhā sarasvatyai pāvakāyai svāhā pūṣṇe svāhā pūṣṇe prapathyāya svāhā pūṣṇe naraṃdhiṣāya svāhā tvaṣṭre svāhā tvaṣṭre turīpāya svāhā tvaṣṭre pururūpāya svāhā viṣṇave svāhā viṣṇave nikhuryapāya svāhā viṣṇave nibhūyapāya svāhā ||

TS 7 3.16.1

दद्भ्यः स्वाहा हनूभ्याꣳ स्वाहा ओष्ठाभ्याꣳ स्वाहा मुखाय स्वाहा नासिकाभ्याꣳ स्वाहा । अक्षीभ्याꣳ स्वाहा कर्णाभ्याꣳ स्वाहा पार इक्षवो ऽवार्येभ्यः पक्ष्मभ्यः स्वाहा । अवार इक्षवः पार्येभ्यः पक्ष्मभ्यः स्वाहा शीर्ष्णे स्वाहा भ्रूभ्याꣳ स्वाहा ललाटाय स्वाहा मूर्ध्ने स्वाहा मस्तिष्काय स्वाहा केशेभ्यः स्वाहा वहाय स्वाहा ग्रीवाभ्यः स्वाहा स्कन्धेभ्यः स्वाहा कीकसाभ्यः स्वाहा पृष्टीभ्यः स्वाहा पाजस्याय स्वाहा पार्श्वाभ्याꣳ स्वाहा

dadbhyaḥ svāhā hanūbhyāṃ svāhā oṣṭhābhyāṃ svāhā mukhāya svāhā nāsikābhyāṃ svāhā | akṣībhyāṃ svāhā karṇābhyāṃ svāhā pāra ikṣavo 'vāryebhyaḥ pakṣmabhyaḥ svāhā | avāra ikṣavaḥ pāryebhyaḥ pakṣmabhyaḥ svāhā śīrṣṇe svāhā bhrūbhyāṃ svāhā lalāṭāya svāhā mūrdhne svāhā mastiṣkāya svāhā keśebhyaḥ svāhā vahāya svāhā grīvābhyaḥ svāhā skandhebhyaḥ svāhā kīkasābhyaḥ svāhā pṛṣṭībhyaḥ svāhā pājasyāya svāhā pārśvābhyāṃ svāhā

TS 7 3.16.2

अꣳसाभ्याꣳ स्वाहा दोषभ्याꣳ स्वाहा बाहुभ्याꣳ स्वाहा जङ्घाभ्याꣳ स्वाहा श्रोणीभ्याꣳ स्वाहा ऊरुभ्याꣳ स्वाहा अष्ठीवद्भ्याꣳ स्वाहा जङ्घाभ्याꣳ स्वाहा भसदे स्वाहा शिखण्डेभ्यः स्वाहा वालधानाय स्वाहा । आण्डाभ्याꣳ स्वाहा शेपाय स्वाहा रेतसे स्वाहा प्रजाभ्यः स्वाहा प्रजननाय स्वाहा पद्भ्यः स्वाहा शफेभ्यः स्वाहा लोमभ्यः स्वाहा त्वचे स्वाहा लोहिताय स्वाहा माꣳसाय स्वाहा स्नावभ्यः स्वाहा । अस्थभ्यः स्वाहा मज्जभ्यः स्वाहा । अङ्गेभ्यः स्वाहा । आत्मने स्वाहा सर्वस्मै स्वाहा ॥

aṃsābhyāṃ svāhā doṣabhyāṃ svāhā bāhubhyāṃ svāhā jaṅghābhyāṃ svāhā śroṇībhyāṃ svāhā ūrubhyāṃ svāhā aṣṭhīvadbhyāṃ svāhā jaṅghābhyāṃ svāhā bhasade svāhā śikhaṇḍebhyaḥ svāhā vāladhānāya svāhā | āṇḍābhyāṃ svāhā śepāya svāhā retase svāhā prajābhyaḥ svāhā prajananāya svāhā padbhyaḥ svāhā śaphebhyaḥ svāhā lomabhyaḥ svāhā tvace svāhā lohitāya svāhā māṃsāya svāhā snāvabhyaḥ svāhā | asthabhyaḥ svāhā majjabhyaḥ svāhā | aṅgebhyaḥ svāhā | ātmane svāhā sarvasmai svāhā ||

TS 7 3.17.1

अञ्ज्येताय स्वाहा । अञ्जिसक्थाय स्वाहा शितिपदे स्वाहा शितिककुदे स्वाहा शितिरन्ध्राय स्वाहा शितिपृष्ठाय स्वाहा शित्यꣳसाय स्वाहा पुष्पकर्णाय स्वाहा शित्योष्ठाय स्वाहा शितिभ्रवे स्वाहा शितिभसदे स्वाहा श्वेतानूकाशाय स्वाहा । अञ्जये स्वाहा ललामाय स्वाहा । असितज्ञवे स्वाहा कृष्णैताय स्वाहा रोहितैताय स्वाहा । अरुणैताय स्वाहा । ईदृशाय स्वाहा कीदृशाय स्वाहा तादृशाय स्वाहा सदृशाय स्वाहा विसदृशाय स्वाहा सुसदृशाय स्वाहा रूपाय स्वाहा सर्वस्मै स्वाहा ॥

añjyetāya svāhā | añjisakthāya svāhā śitipade svāhā śitikakude svāhā śitirandhrāya svāhā śitipṛṣṭhāya svāhā śityaṃsāya svāhā puṣpakarṇāya svāhā śityoṣṭhāya svāhā śitibhrave svāhā śitibhasade svāhā śvetānūkāśāya svāhā | añjaye svāhā lalāmāya svāhā | asitajñave svāhā kṛṣṇaitāya svāhā rohitaitāya svāhā | aruṇaitāya svāhā | īdṛśāya svāhā kīdṛśāya svāhā tādṛśāya svāhā sadṛśāya svāhā visadṛśāya svāhā susadṛśāya svāhā rūpāya svāhā sarvasmai svāhā ||

TS 7 3.18.1

कृष्णाय स्वाहा श्वेताय स्वाहा पिशंगाय स्वाहा सारंगाय स्वाहा । अरुणाय स्वाहा गौराय स्वाहा बभ्रवे स्वाहा नकुलाय स्वाहा रोहिताय स्वाहा शोणाय स्वाहा श्यावाय स्वाहा श्यामाय स्वाहा पाकलाय स्वाहा सुरूपाय स्वाहा । अनुरूपाय स्वाहा विरूपाय स्वाहा सरूपाय स्वाहा प्रतिरूपाय स्वाहा शबलाय स्वाहा कमलाय स्वाहा पृश्नये स्वाहा पृश्निसक्थाय स्वाहा सर्वस्मै स्वाहा ॥

kṛṣṇāya svāhā śvetāya svāhā piśaṃgāya svāhā sāraṃgāya svāhā | aruṇāya svāhā gaurāya svāhā babhrave svāhā nakulāya svāhā rohitāya svāhā śoṇāya svāhā śyāvāya svāhā śyāmāya svāhā pākalāya svāhā surūpāya svāhā | anurūpāya svāhā virūpāya svāhā sarūpāya svāhā pratirūpāya svāhā śabalāya svāhā kamalāya svāhā pṛśnaye svāhā pṛśnisakthāya svāhā sarvasmai svāhā ||

TS 7 3.19.1

ओषधीभ्यः स्वाहा मूलेभ्यः स्वाहा तूलेभ्यः स्वाहा काण्डेभ्यः स्वाहा वल्शेभ्यः स्वाहा पुष्पेभ्यः स्वाहा फलेभ्यः स्वाहा गृहीतेभ्यः स्वाहा । अगृहीतेभ्यः स्वाहा । अवपन्नेभ्यः स्वाहा शयानेभ्यः स्वाहा सर्वस्मै स्वाहा ॥

oṣadhībhyaḥ svāhā mūlebhyaḥ svāhā tūlebhyaḥ svāhā kāṇḍebhyaḥ svāhā valśebhyaḥ svāhā puṣpebhyaḥ svāhā phalebhyaḥ svāhā gṛhītebhyaḥ svāhā | agṛhītebhyaḥ svāhā | avapannebhyaḥ svāhā śayānebhyaḥ svāhā sarvasmai svāhā ||

TS 7 3.20.1

वनस्पतिभ्यः स्वाहा मूलेभ्यः स्वाहा तूलेभ्यः स्वाहा स्कन्धोभ्यः स्वाहा शाखाभ्यः स्वाहा पर्णेभ्यः स्वाहा पुष्पेभ्यः स्वाहा फलेभ्यः स्वाहा गृहीतेभ्यः स्वाहा । अगृहीतेभ्यः स्वाहा । अवपन्नेभ्यः स्वाहा शयानेभ्यः स्वाहा शिष्टाय स्वाहा । अतिशिष्टाय स्वाहा परिशिष्टाय स्वाहा सꣳशिष्टाय स्वाहा । उच्छिष्टाय स्वाहा रिक्ताय स्वाहा । अरिक्ताय स्वाहा प्ररिक्ताय स्वाहा सꣳरिक्ताय स्वाहा । उद्रिक्ताय स्वाहा सर्वस्मै स्वाहा ॥

vanaspatibhyaḥ svāhā mūlebhyaḥ svāhā tūlebhyaḥ svāhā skandhobhyaḥ svāhā śākhābhyaḥ svāhā parṇebhyaḥ svāhā puṣpebhyaḥ svāhā phalebhyaḥ svāhā gṛhītebhyaḥ svāhā | agṛhītebhyaḥ svāhā | avapannebhyaḥ svāhā śayānebhyaḥ svāhā śiṣṭāya svāhā | atiśiṣṭāya svāhā pariśiṣṭāya svāhā saṃśiṣṭāya svāhā | ucchiṣṭāya svāhā riktāya svāhā | ariktāya svāhā prariktāya svāhā saṃriktāya svāhā | udriktāya svāhā sarvasmai svāhā ||