Taittiriya Samhita (Black Yajurveda) — Kanda 7 — Chapter 2

TS 7 2.1.1

साध्या वै देवाः सुवर्गकामा एतꣳ षड्रात्रम् अपश्यन् तम् आहरन् तेनायजन्त ततो वै ते सुवर्गं लोकम् आयन् य एवं विद्वाꣳसः षड्रात्रम् आसते सुवर्गम् एव लोकं यन्ति देवसत्त्रं वै षड्रात्रः प्रत्यक्षꣳ ह्य् एतानि पृष्ठानि य एवं विद्वाꣳसः षड्रात्रम् आसते साक्षाद् एव देवता अभ्यारोहन्ति षड्रात्रो भवति षड् वा ऋतवः षट् पृष्ठानि

sādhyā vai devāḥ suvargakāmā etaṃ ṣaḍrātram apaśyan tam āharan tenāyajanta tato vai te suvargaṃ lokam āyan ya evaṃ vidvāṃsaḥ ṣaḍrātram āsate suvargam eva lokaṃ yanti devasattraṃ vai ṣaḍrātraḥ pratyakṣaṃ hy etāni pṛṣṭhāni ya evaṃ vidvāṃsaḥ ṣaḍrātram āsate sākṣād eva devatā abhyārohanti ṣaḍrātro bhavati ṣaḍ vā ṛtavaḥ ṣaṭ pṛṣṭhāni

TS 7 2.1.2

पृष्ठैर् एवर्तून् अन्वारोहन्त्य् ऋतुभिः संवत्सरम् । ते संवत्सर एव प्रति तिष्ठन्ति बृहद्रथंतराभ्यां यन्ति । इयं वाव रथंतरम् असौ बृहत् । आभ्याम् एव यन्ति । अथो अनयोर् एव प्रति तिष्ठन्ति । एते वै यज्ञस्याञ्जसायनी स्रुती ताभ्याम् एव सुवर्गं लोकं यन्ति त्रिवृद् अग्निष्टोमो भवति तेज एवाव रुन्धते पञ्चदशो भवति । इन्द्रियम् एवाव रुन्धते सप्तदशः

pṛṣṭhair evartūn anvārohanty ṛtubhiḥ saṃvatsaram | te saṃvatsara eva prati tiṣṭhanti bṛhadrathaṃtarābhyāṃ yanti | iyaṃ vāva rathaṃtaram asau bṛhat | ābhyām eva yanti | atho anayor eva prati tiṣṭhanti | ete vai yajñasyāñjasāyanī srutī tābhyām eva suvargaṃ lokaṃ yanti trivṛd agniṣṭomo bhavati teja evāva rundhate pañcadaśo bhavati | indriyam evāva rundhate saptadaśaḥ

TS 7 2.1.3

भवति । अन्नाद्यस्यावरुद्ध्यै । अथो प्रैव तेन जायन्ते । एकविꣳशो भवति प्रतिष्ठित्यै । अथो रुचम् एवात्मन् दधते त्रिणवो भवति विजित्यै त्रयस्त्रिꣳशो भवति प्रतिष्ठित्यै सदोहविर्धानिन एतेन षड्रात्रेण यजेरन् । आश्वत्थी हविर्धानं चाग्नीध्रं च भवतस् तद् धि सुवर्ग्यम् । चक्रीवती भवतः सुवर्गस्य लोकस्य समष्ट्यै । उलूखलबुध्नो यूपो भवति प्रतिष्ठित्यै प्राञ्चो यान्ति प्राङ् इव हि सुवर्गः

bhavati | annādyasyāvaruddhyai | atho praiva tena jāyante | ekaviṃśo bhavati pratiṣṭhityai | atho rucam evātman dadhate triṇavo bhavati vijityai trayastriṃśo bhavati pratiṣṭhityai sadohavirdhānina etena ṣaḍrātreṇa yajeran | āśvatthī havirdhānaṃ cāgnīdhraṃ ca bhavatas tad dhi suvargyam | cakrīvatī bhavataḥ suvargasya lokasya samaṣṭyai | ulūkhalabudhno yūpo bhavati pratiṣṭhityai prāñco yānti prāṅ iva hi suvargaḥ

TS 7 2.1.4

लोकः सरस्वत्या यान्ति । एष वै देवयानः पन्थास् तम् एवान्वारोहन्ति । आक्रोशन्तो यान्ति । अवर्तिम् एवान्यस्मिन् प्रतिषज्य प्रतिष्ठां गच्छन्ति यदा दश शतं कुर्वन्त्य् अथैकम् उत्थानम् । शतायुः पुरुषः शतेन्द्रियः । आयुष्य् एवेन्द्रिये प्रति तिष्ठन्ति यदा शतꣳ सहस्रं कुर्वन्त्य् अथैकम् उत्थानम् । सहस्रसम्मितो वा असौ लोकः । अमुम् एव लोकम् अभि जयन्ति यदैषाम् प्रमीयेत यदा वा जीयेरन्न् अथैकम् उत्थानम् । तद् धि तीर्थम् ॥

lokaḥ sarasvatyā yānti | eṣa vai devayānaḥ panthās tam evānvārohanti | ākrośanto yānti | avartim evānyasmin pratiṣajya pratiṣṭhāṃ gacchanti yadā daśa śataṃ kurvanty athaikam utthānam | śatāyuḥ puruṣaḥ śatendriyaḥ | āyuṣy evendriye prati tiṣṭhanti yadā śataṃ sahasraṃ kurvanty athaikam utthānam | sahasrasammito vā asau lokaḥ | amum eva lokam abhi jayanti yadaiṣām pramīyeta yadā vā jīyerann athaikam utthānam | tad dhi tīrtham ||

TS 7 2.2.1

कुसुरुबिन्द औद्दालकिर् अकामयत पशुमान्त् स्याम् इति स एतꣳ सप्तरात्रम् आहरत् तेनायजत तेन वै स यावन्तो ग्राम्याः पशवस् तान् अवारुन्द्ध य एवं विद्वान्त् सप्तरात्रेण यजते यावन्त एव ग्राम्याः पशवस् तान् एवाव रुन्द्धे सप्तरात्रो भवति सप्त ग्राम्याः पशवः सप्तारण्याः सप्त छन्दाꣳसि । उभयस्यावरुद्ध्यै त्रिवृद् अग्निष्टोमो भवति तेजः

kusurubinda auddālakir akāmayata paśumānt syām iti sa etaṃ saptarātram āharat tenāyajata tena vai sa yāvanto grāmyāḥ paśavas tān avārunddha ya evaṃ vidvānt saptarātreṇa yajate yāvanta eva grāmyāḥ paśavas tān evāva runddhe saptarātro bhavati sapta grāmyāḥ paśavaḥ saptāraṇyāḥ sapta chandāṃsi | ubhayasyāvaruddhyai trivṛd agniṣṭomo bhavati tejaḥ

TS 7 2.2.2

एवाव रुन्द्धे पञ्चदशो भवति । इन्द्रियम् एवाव रुन्द्धे सप्तदशो भवति । अन्नाद्यस्यावरुद्ध्यै । अथो प्रैव तेन जायते । एकविꣳशो भवति प्रतिष्ठित्यै । अथो रुचम् एवात्मन् धत्ते त्रिणवो भवति विजित्यै पञ्चविꣳशो ऽग्निष्टोमो भवति प्रजापतेर् आप्त्यै महाव्रतवान् अन्नाद्यस्यावरुद्ध्यै विश्वजित् सर्वपृष्ठो ऽतिरात्रो भवति सर्वस्याभिजित्यै यत् प्रत्यक्षम् पूर्वेष्व् अहःसु पृष्ठान्य् उपेयुः प्रत्यक्षम्

evāva runddhe pañcadaśo bhavati | indriyam evāva runddhe saptadaśo bhavati | annādyasyāvaruddhyai | atho praiva tena jāyate | ekaviṃśo bhavati pratiṣṭhityai | atho rucam evātman dhatte triṇavo bhavati vijityai pañcaviṃśo 'gniṣṭomo bhavati prajāpater āptyai mahāvratavān annādyasyāvaruddhyai viśvajit sarvapṛṣṭho 'tirātro bhavati sarvasyābhijityai yat pratyakṣam pūrveṣv ahaḥsu pṛṣṭhāny upeyuḥ pratyakṣam

TS 7 2.2.3

विश्वजिति यथा दुग्धाम् उपसीदत्य् एवम् उत्तमम् अहः स्यात् । नैकरात्रश् चन स्यात् । बृहद्रथन्तरे पूर्वेष्व् अहःसूप यन्ति । इयं वाव रथंतरम् असौ बृहत् । आभ्याम् एव न यन्त्य् अथो अनयोर् एव प्रति तिष्ठन्ति यत् प्रत्यक्षं विश्वजिति पृष्ठान्य् उपयन्ति यथा प्रत्तां दुहे तादृग् एव तत् ॥

viśvajiti yathā dugdhām upasīdaty evam uttamam ahaḥ syāt | naikarātraś cana syāt | bṛhadrathantare pūrveṣv ahaḥsūpa yanti | iyaṃ vāva rathaṃtaram asau bṛhat | ābhyām eva na yanty atho anayor eva prati tiṣṭhanti yat pratyakṣaṃ viśvajiti pṛṣṭhāny upayanti yathā prattāṃ duhe tādṛg eva tat ||

TS 7 2.3.1

बृहस्पतिर् अकामयत ब्रह्मवर्चसी स्याम् इति स एतम् अष्टरात्रम् अपश्यत् तम् आहरत् तेनायजत ततो वै स ब्रह्मवर्चस्य् अभवत् । य एवं विद्वान् अष्टरात्रेण यजते ब्रह्मवर्चस्य् एव भवति । अष्टरात्रो भवति । अष्टाक्षरा गायत्री गायत्री ब्रह्मवर्चसम् । गायत्रियैव ब्रह्मवर्चसम् अव रुन्द्धे । अष्टरात्रो भवति चतस्रो वै दिशः । चतस्रो ऽवान्तरदिशाः । दिग्भ्य एव ब्रह्मवर्चसम् अव रुन्द्धे ॥

bṛhaspatir akāmayata brahmavarcasī syām iti sa etam aṣṭarātram apaśyat tam āharat tenāyajata tato vai sa brahmavarcasy abhavat | ya evaṃ vidvān aṣṭarātreṇa yajate brahmavarcasy eva bhavati | aṣṭarātro bhavati | aṣṭākṣarā gāyatrī gāyatrī brahmavarcasam | gāyatriyaiva brahmavarcasam ava runddhe | aṣṭarātro bhavati catasro vai diśaḥ | catasro 'vāntaradiśāḥ | digbhya eva brahmavarcasam ava runddhe ||

TS 7 2.3.2

त्रिवृद् अग्निष्टोमो भवति तेज एवाव रुन्द्धे पञ्चदशो भवति । इन्द्रियम् एवाव रुन्द्धे सप्तदशो भवत्य् अन्नाद्यस्यावरुद्ध्यै । अथो प्रैव तेन जायते । एकविꣳशो भवति प्रतिष्ठित्यै । अथो रुचम् एवात्मन् धत्ते त्रिणवो भवति विजित्यै त्रयस्त्रिꣳशो भवति प्रतिष्ठित्यै पञ्चविꣳशो ऽग्निष्टोमो भवति प्रजापतेर् आप्त्यै महाव्रतवान् अन्नाद्यस्यावरुद्ध्यै विश्वजित् सर्वपृष्ठो ऽतिरात्रो भवति सर्वस्याभिजित्यै ॥

trivṛd agniṣṭomo bhavati teja evāva runddhe pañcadaśo bhavati | indriyam evāva runddhe saptadaśo bhavaty annādyasyāvaruddhyai | atho praiva tena jāyate | ekaviṃśo bhavati pratiṣṭhityai | atho rucam evātman dhatte triṇavo bhavati vijityai trayastriṃśo bhavati pratiṣṭhityai pañcaviṃśo 'gniṣṭomo bhavati prajāpater āptyai mahāvratavān annādyasyāvaruddhyai viśvajit sarvapṛṣṭho 'tirātro bhavati sarvasyābhijityai ||

TS 7 2.4.1

प्रजापतिः प्रजा असृजत ताः सृष्टाः क्षुधं न्य् आयन् । स एतं नवरात्रम् अपश्यत् तम् आहरत् तेनायजत ततो वै प्रजाभ्यो ऽकल्पत यर्हि प्रजाः क्षुधं निगच्छेयुस् तर्हि नवरात्रेण यजेत । इमे हि वा एतासां लोका अक्लृप्ता अथैताः क्षुधं नि गच्छन्ति । इमान् एवाभ्यो लोकान् कल्पयति तान् कल्पमानान् प्रजाभ्यो ऽनु कल्पते कल्पन्ते

prajāpatiḥ prajā asṛjata tāḥ sṛṣṭāḥ kṣudhaṃ ny āyan | sa etaṃ navarātram apaśyat tam āharat tenāyajata tato vai prajābhyo 'kalpata yarhi prajāḥ kṣudhaṃ nigaccheyus tarhi navarātreṇa yajeta | ime hi vā etāsāṃ lokā aklṛptā athaitāḥ kṣudhaṃ ni gacchanti | imān evābhyo lokān kalpayati tān kalpamānān prajābhyo 'nu kalpate kalpante

TS 7 2.4.2

अस्मा इमे लोका ऊर्जम् प्रजासु दधाति त्रिरात्रेणैवेमं लोकं कल्पयति त्रिरात्त्रेणान्तरिक्षं त्रिरात्रेणामुं लोकम् । यथा गुणे गुणम् अन्वस्यत्य् एवम् एव तल् लोके लोकम् अन्व् अस्यति धृत्या अशिथिलम्भावाय ज्योतिर् गौर् आयुर् इति ज्ञाता स्तोमा भवन्ति । इयं वाव ज्योतिर् अन्तरिक्षं गौर् असाव् आयुः । एष्व् एव लोकेषु प्रति तिष्ठन्ति ज्ञात्रं प्रजानां

asmā ime lokā ūrjam prajāsu dadhāti trirātreṇaivemaṃ lokaṃ kalpayati trirāttreṇāntarikṣaṃ trirātreṇāmuṃ lokam | yathā guṇe guṇam anvasyaty evam eva tal loke lokam anv asyati dhṛtyā aśithilambhāvāya jyotir gaur āyur iti jñātā stomā bhavanti | iyaṃ vāva jyotir antarikṣaṃ gaur asāv āyuḥ | eṣv eva lokeṣu prati tiṣṭhanti jñātraṃ prajānāṃ

TS 7 2.4.3

गच्छति नवरात्रो भवति । अभिपूर्वम् एवास्मिन् तेजो दधाति यो ज्योगामयावी स्यात् स नवरात्रेण यजेत प्राणा हि वा एतस्याधृताः । अथैतस्य ज्योग् आमयति प्राणान् एवास्मिन् दाधार । उत यदीतासुर् भवति जीवत्य् एव ॥

gacchati navarātro bhavati | abhipūrvam evāsmin tejo dadhāti yo jyogāmayāvī syāt sa navarātreṇa yajeta prāṇā hi vā etasyādhṛtāḥ | athaitasya jyog āmayati prāṇān evāsmin dādhāra | uta yadītāsur bhavati jīvaty eva ||

TS 7 2.5.1

प्रजापतिर् अकामयत प्र जायेयेति स एतं दशहोतारम् अपश्यत् तम् अजुहोत् तेन दशरात्रम् असृजत तेन दशरात्रेण प्राजायत दशरात्राय दीक्षिष्यमाणो दशहोतारं जुहुयात् । दशहोत्रैव दशरात्रꣳ सृजते तेन दशरात्रेण प्र जायते वैराजो वा एष यज्ञो यद् दशरात्रः । य एवं विद्वान् दशरात्रेण यजते विराजम् एव गच्छति प्राजापत्यो वा एष यज्ञो यद् दशरात्रः ॥

prajāpatir akāmayata pra jāyeyeti sa etaṃ daśahotāram apaśyat tam ajuhot tena daśarātram asṛjata tena daśarātreṇa prājāyata daśarātrāya dīkṣiṣyamāṇo daśahotāraṃ juhuyāt | daśahotraiva daśarātraṃ sṛjate tena daśarātreṇa pra jāyate vairājo vā eṣa yajño yad daśarātraḥ | ya evaṃ vidvān daśarātreṇa yajate virājam eva gacchati prājāpatyo vā eṣa yajño yad daśarātraḥ ||

TS 7 2.5.2

य एवं विद्वान् दशरात्रेण यजते प्रैव जायते । इन्द्रो वै सदृङ् देवताभिर् आसीत् स न व्यावृतम् अगच्छत् स प्रजापतिम् उपाधावत् तस्मा एतं दशरात्रम् प्रायच्छत् तम् आहरत् तेनायजत ततो वै सो ऽन्याभिर् देवताभिर् व्यावृतम् अगच्छत् । य एवं विद्वान् दशरात्रेण यजते व्यावृतम् एव पाप्मना भ्रातृव्येण गच्छति त्रिककुद् वै

ya evaṃ vidvān daśarātreṇa yajate praiva jāyate | indro vai sadṛṅ devatābhir āsīt sa na vyāvṛtam agacchat sa prajāpatim upādhāvat tasmā etaṃ daśarātram prāyacchat tam āharat tenāyajata tato vai so 'nyābhir devatābhir vyāvṛtam agacchat | ya evaṃ vidvān daśarātreṇa yajate vyāvṛtam eva pāpmanā bhrātṛvyeṇa gacchati trikakud vai

TS 7 2.5.3

एष यज्ञो यद् दशरात्रः ककुत् पञ्चदशः ककुद् एकविꣳशः ककुत् त्रयस्त्रिꣳशः । य एवं विद्वान् दशरात्रेण यजते त्रिककुद् एव समानानाम् भवति यजमानः पञ्चदशो यजमान एकविꣳशो यजमानस् त्रयस्त्रिꣳशः पुर इतराः अभिचर्यमाणो दशरात्रेण यजेत देवपुरा एव पर्यूहते तस्य न कुतश् चनोपाव्याधो भवति नैनम् अभिचरन्त् स्तृणुते देवासुराः संयत्ता आसन् ते देवा एताः

eṣa yajño yad daśarātraḥ kakut pañcadaśaḥ kakud ekaviṃśaḥ kakut trayastriṃśaḥ | ya evaṃ vidvān daśarātreṇa yajate trikakud eva samānānām bhavati yajamānaḥ pañcadaśo yajamāna ekaviṃśo yajamānas trayastriṃśaḥ pura itarāḥ abhicaryamāṇo daśarātreṇa yajeta devapurā eva paryūhate tasya na kutaś canopāvyādho bhavati nainam abhicarant stṛṇute devāsurāḥ saṃyattā āsan te devā etāḥ

TS 7 2.5.4

देवपुरा अपश्यन् यद् दशरात्रस् ताः पर्य् औहन्त तेषां न कुतश् चनोपाव्याधो ऽभवत् ततो देवा अभवन् पराऽसुराः । यो भ्रातृव्यवान्त् स्यात् स दशरात्रेण यजेत देवपुरा एव पर्यूहते तस्य न कुतश् चनोपाव्याधो भवति भवत्य् आत्मना परास्य भ्रातृव्यो भवति स्तोम स्तोमस्योपस्तिर् भवति भ्रातृव्यम् एवोपस्तिं कुरुते जामि वै

devapurā apaśyan yad daśarātras tāḥ pary auhanta teṣāṃ na kutaś canopāvyādho 'bhavat tato devā abhavan parā'surāḥ | yo bhrātṛvyavānt syāt sa daśarātreṇa yajeta devapurā eva paryūhate tasya na kutaś canopāvyādho bhavati bhavaty ātmanā parāsya bhrātṛvyo bhavati stoma stomasyopastir bhavati bhrātṛvyam evopastiṃ kurute jāmi vai

TS 7 2.5.5

एतत् कुर्वन्ति यज् ज्यायाꣳसꣳ स्तोमम् उपेत्य कनीयाꣳसम् उपयन्ति यद् अग्निष्टोमसामान्य् अवस्ताच् च परस्ताच् च भवन्त्य् अजामित्वाय त्रिवृद् अग्निष्टोमो ऽग्निष्टुद् आग्नेयीषु भवति तेज एवाव रुन्द्धे पञ्चदश उक्थ्य ऐन्द्रीषु । इन्द्रियम् एवाव रुन्द्धे त्रिवृद् अग्निष्टोमो वैश्वदेवीषु पुष्टिम् एवाव रुन्द्धे सप्तदशो ऽग्निष्टोमः प्राजापत्यासु तीव्रसोमः । अन्नाद्यस्यावरुद्ध्यै । अथो प्रैव तेन जायते ॥

etat kurvanti yaj jyāyāṃsaṃ stomam upetya kanīyāṃsam upayanti yad agniṣṭomasāmāny avastāc ca parastāc ca bhavanty ajāmitvāya trivṛd agniṣṭomo 'gniṣṭud āgneyīṣu bhavati teja evāva runddhe pañcadaśa ukthya aindrīṣu | indriyam evāva runddhe trivṛd agniṣṭomo vaiśvadevīṣu puṣṭim evāva runddhe saptadaśo 'gniṣṭomaḥ prājāpatyāsu tīvrasomaḥ | annādyasyāvaruddhyai | atho praiva tena jāyate ||

TS 7 2.5.6

एकविꣳश उक्थ्यः सौरीषु प्रतिष्ठित्यै । अथो रुचम् एवात्मन् धत्ते सप्तदशो ऽग्निष्टोमः प्राजापत्यासूपहव्यः । उपहवम् एव गच्छति त्रिणवाव् अग्निष्टोमाव् अभित ऐन्द्रीषु विजित्यै त्रयस्त्रिꣳश उक्थ्यो वैश्वदेवीषु प्रतिष्ठित्यै विश्वजित् सर्वपृष्ठो ऽतिरात्रो भवति सर्वस्याभिजित्यै ॥

ekaviṃśa ukthyaḥ saurīṣu pratiṣṭhityai | atho rucam evātman dhatte saptadaśo 'gniṣṭomaḥ prājāpatyāsūpahavyaḥ | upahavam eva gacchati triṇavāv agniṣṭomāv abhita aindrīṣu vijityai trayastriṃśa ukthyo vaiśvadevīṣu pratiṣṭhityai viśvajit sarvapṛṣṭho 'tirātro bhavati sarvasyābhijityai ||

TS 7 2.6.1

ऋतवो वै प्रजाकामाः प्रजां नाविन्दन्त ते ऽकामयन्त प्रजाꣳ सृजेमहि प्रजाम् अव रुन्धीमहि प्रजां विन्देमहि प्रजावन्तः स्यामेति त एतम् एकादशरात्रम् अपश्यन् तम् आहरन् तेनायजन्त ततो वै ते प्रजाम् असृजन्त प्रजाम् अवारुन्धत प्रजाम् अविन्दन्त प्रजावन्तो ऽभवन् त ऋतवो ऽभवन् तद् आर्तवानाम् आर्तवत्वम् ऋतूनां वा एते पुत्रास् तस्मात्

ṛtavo vai prajākāmāḥ prajāṃ nāvindanta te 'kāmayanta prajāṃ sṛjemahi prajām ava rundhīmahi prajāṃ vindemahi prajāvantaḥ syāmeti ta etam ekādaśarātram apaśyan tam āharan tenāyajanta tato vai te prajām asṛjanta prajām avārundhata prajām avindanta prajāvanto 'bhavan ta ṛtavo 'bhavan tad ārtavānām ārtavatvam ṛtūnāṃ vā ete putrās tasmāt

TS 7 2.6.2

आर्तवा उच्यन्ते य एवं विद्वाꣳस एकादशरात्रम् आसते प्रजाम् एव सृजन्ते प्रजाम् अव रुन्धते प्रजां विन्दन्ते प्रजावन्तो भवन्ति ज्योतिर् अतिरात्रो भवति ज्योतिर् एव पुरस्ताद् दधते सुवर्गस्य लोकस्यानुख्यात्यै पृष्ठ्यः षडहो भवति षड् वा ऋतवः षट् पृष्ठानि पृष्ठैर् एवर्तून् अन्वारोहन्त्य् ऋतुभिः संवत्सरम् । ते संवत्सर एव प्रति तिष्ठन्ति चतुर्विꣳशो भवति चतुर्विꣳशत्यक्षरा गायत्री

ārtavā ucyante ya evaṃ vidvāṃsa ekādaśarātram āsate prajām eva sṛjante prajām ava rundhate prajāṃ vindante prajāvanto bhavanti jyotir atirātro bhavati jyotir eva purastād dadhate suvargasya lokasyānukhyātyai pṛṣṭhyaḥ ṣaḍaho bhavati ṣaḍ vā ṛtavaḥ ṣaṭ pṛṣṭhāni pṛṣṭhair evartūn anvārohanty ṛtubhiḥ saṃvatsaram | te saṃvatsara eva prati tiṣṭhanti caturviṃśo bhavati caturviṃśatyakṣarā gāyatrī

TS 7 2.6.3

गायत्रम् ब्रह्मवर्चसम् । गायत्रियाम् एव ब्रह्मवर्चसे प्रति तिष्ठन्ति चतुश्चत्वारिꣳशो भवति चतुष्चत्वारिꣳशदक्षरा त्रिष्टुग् इन्द्रियं त्रिष्टुप् त्रिष्टुभ्य् एवेन्द्रिये प्रति तिष्ठन्ति । अष्टाचत्वारिꣳशो भवति । अष्टाचत्वारिꣳशदक्षरा जगती जागताः पशवः । जगत्याम् एव पशुषु प्रति तिष्ठन्ति । एकादशरात्रो भवति पञ्च वा ऋतव आर्तवाः पञ्च । ऋतुष्व् एवाऽऽर्तवेषु संवत्सरे प्रतिष्ठाय प्रजाम् अव रुन्धते । अतिरात्राव् अभितो भवतः प्रजायै परिगृहीत्यै ॥

gāyatram brahmavarcasam | gāyatriyām eva brahmavarcase prati tiṣṭhanti catuścatvāriṃśo bhavati catuṣcatvāriṃśadakṣarā triṣṭug indriyaṃ triṣṭup triṣṭubhy evendriye prati tiṣṭhanti | aṣṭācatvāriṃśo bhavati | aṣṭācatvāriṃśadakṣarā jagatī jāgatāḥ paśavaḥ | jagatyām eva paśuṣu prati tiṣṭhanti | ekādaśarātro bhavati pañca vā ṛtava ārtavāḥ pañca | ṛtuṣv evā''rtaveṣu saṃvatsare pratiṣṭhāya prajām ava rundhate | atirātrāv abhito bhavataḥ prajāyai parigṛhītyai ||

TS 7 2.7.1

ऐन्द्रवायवाग्रान् गृह्णीयाद् यः कामयेत यथापूर्वम् प्रजाः कल्पेरन्न् इति यज्ञस्य वै क्लृप्तिम् अनु प्रजाः कल्पन्ते यज्ञस्याक्लृप्तिम् अनु न कल्पन्ते यथापूर्वम् एव प्रजाः कल्पयति न ज्यायाꣳसं कनीयान् अति क्रामति । ऐन्द्रवायवाग्रान् गृह्णीयाद् आमयाविनः प्राणेन वा एष व्यृध्यते यस्याऽऽमयति प्राण ऐन्द्रवायवः प्राणेनैवैनꣳ सम् अर्धयति मैत्रावरुणाग्रान् गृह्णीरन् येषां दीक्षितानाम् प्रमीयेत ।

aindravāyavāgrān gṛhṇīyād yaḥ kāmayeta yathāpūrvam prajāḥ kalperann iti yajñasya vai klṛptim anu prajāḥ kalpante yajñasyāklṛptim anu na kalpante yathāpūrvam eva prajāḥ kalpayati na jyāyāṃsaṃ kanīyān ati krāmati | aindravāyavāgrān gṛhṇīyād āmayāvinaḥ prāṇena vā eṣa vyṛdhyate yasyā''mayati prāṇa aindravāyavaḥ prāṇenaivainaṃ sam ardhayati maitrāvaruṇāgrān gṛhṇīran yeṣāṃ dīkṣitānām pramīyeta |

TS 7 2.7.2

प्राणापानाभ्यां वा एते व्यृध्यन्ते येषां दीक्षितानाम् प्रमीयते प्राणापानौ मित्रावरुणौ प्राणापानाव् एव मुखतः परि हरन्ते । आश्विनाग्रान् गृह्णीताऽऽनुजावरः । अश्विनौ वै देवानाम् आनुजावरौ पश्चेवाग्रम् पर्य् ऐताम् अश्विनाव् एतस्या देवता य आनुजावरस् ताव् एवैनम् अग्रम् परि णयतः शुक्राग्रान् गृह्णीत गतश्रीः प्रतिष्ठाकामः । असौ वा आदित्यः शुक्र एषो ऽन्तः । अन्तम् मनुष्यः

prāṇāpānābhyāṃ vā ete vyṛdhyante yeṣāṃ dīkṣitānām pramīyate prāṇāpānau mitrāvaruṇau prāṇāpānāv eva mukhataḥ pari harante | āśvināgrān gṛhṇītā''nujāvaraḥ | aśvinau vai devānām ānujāvarau paścevāgram pary aitām aśvināv etasyā devatā ya ānujāvaras tāv evainam agram pari ṇayataḥ śukrāgrān gṛhṇīta gataśrīḥ pratiṣṭhākāmaḥ | asau vā ādityaḥ śukra eṣo 'ntaḥ | antam manuṣyaḥ

TS 7 2.7.3

श्रियै गत्त्वा नि वर्तते । अन्ताद् एवान्तम् आ रभते न ततः पापीयान् भवति मन्थ्यग्रान् गृह्णीताभिचरन् । आर्तपात्रं वा एतद् यन् मन्थिपात्रम् मृत्युनैवैनं ग्राहयति ताजग् आर्तिम् आर्छति । आग्रयणाग्रान् गृह्णीत यस्य पिता पितामहः पुण्यः स्याद् अथ तन् न प्राप्नुयात् । वाचा वा एष इन्द्रियेण व्यृध्यते यस्य पिता पितामहः पुण्यः

śriyai gattvā ni vartate | antād evāntam ā rabhate na tataḥ pāpīyān bhavati manthyagrān gṛhṇītābhicaran | ārtapātraṃ vā etad yan manthipātram mṛtyunaivainaṃ grāhayati tājag ārtim ārchati | āgrayaṇāgrān gṛhṇīta yasya pitā pitāmahaḥ puṇyaḥ syād atha tan na prāpnuyāt | vācā vā eṣa indriyeṇa vyṛdhyate yasya pitā pitāmahaḥ puṇyaḥ

TS 7 2.7.4

भवत्य् अथ तन् न प्राप्नोति । उर इवैतद् यज्ञस्य वाग् इव यद् आग्रयणः । वाचैवैनम् इन्द्रियेण सम् अर्धयति न ततः पापीयान् भवति । उक्थ्याग्रान् गृह्णीताभिचर्यमाणः सर्वेषां वा एतत् पात्राणाम् इन्द्रियं यद् उक्थ्यपात्रम् । सर्वेणैवैनम् इन्द्रियेणाति प्र युङ्क्ते सरस्वत्य् अभि नो नेषि वस्य इति पुरोरुचं कुर्यात् । वाग् वै

bhavaty atha tan na prāpnoti | ura ivaitad yajñasya vāg iva yad āgrayaṇaḥ | vācaivainam indriyeṇa sam ardhayati na tataḥ pāpīyān bhavati | ukthyāgrān gṛhṇītābhicaryamāṇaḥ sarveṣāṃ vā etat pātrāṇām indriyaṃ yad ukthyapātram | sarveṇaivainam indriyeṇāti pra yuṅkte sarasvaty abhi no neṣi vasya iti purorucaṃ kuryāt | vāg vai

TS 7 2.7.5

सरस्वती वाचैवैनम् अति प्र युङ्क्ते मा त्वत् क्षेत्राण्य् अरणानि गन्मेत्य् आह मृत्योर् वै क्षेत्राण्य् अरणानि तेनैव मृत्योः क्षेत्राणि न गच्छति पूर्णान् ग्रहान् गृह्णीयाद् आमयाविनः प्राणान् वा एतस्य शुग् ऋच्छति यस्यामयति प्राणा ग्रहाः प्राणान् एवास्य शुचो मुञ्चति । उत यदीतासुर् भवति जीवत्य् एव पूर्णान् ग्रहान् गृह्णीयाद् यर्हि पर्जन्यो न वर्षेत् प्राणान् वा एतर्हि प्रजानाꣳ शुग् ऋच्छति यर्हि पर्जन्यो न वर्षति प्राणा ग्रहाः प्राणान् एव प्रजानाꣳ शुचो मुञ्चति ताजक् प्र वर्षति ॥

sarasvatī vācaivainam ati pra yuṅkte mā tvat kṣetrāṇy araṇāni ganmety āha mṛtyor vai kṣetrāṇy araṇāni tenaiva mṛtyoḥ kṣetrāṇi na gacchati pūrṇān grahān gṛhṇīyād āmayāvinaḥ prāṇān vā etasya śug ṛcchati yasyāmayati prāṇā grahāḥ prāṇān evāsya śuco muñcati | uta yadītāsur bhavati jīvaty eva pūrṇān grahān gṛhṇīyād yarhi parjanyo na varṣet prāṇān vā etarhi prajānāṃ śug ṛcchati yarhi parjanyo na varṣati prāṇā grahāḥ prāṇān eva prajānāṃ śuco muñcati tājak pra varṣati ||

TS 7 2.8.1

गायत्रो वा ऐन्द्रवायवः । गायत्रम् प्रायणीयम् अहर् । तस्मात् प्रायणीये ऽहन्न् ऐन्द्रवायवो गृह्यते स्व एवैनम् आयतने गृह्णाति त्रैष्टुभो वै शुक्रस् त्रैष्टुभम् द्वितीयम् अहर् । तस्माद् द्वितीये ऽहञ् छुक्रो गृह्यते स्व एवैनम् आयतने गृह्णाति जागतो वा आग्रयणः । जागतं तृतीयम् अहर् । तस्मात् तृतीये ऽहन्न् आग्रयणो गृह्यते स्व एवैनम् आयतने गृह्णाति । एतद् वै

gāyatro vā aindravāyavaḥ | gāyatram prāyaṇīyam ahar | tasmāt prāyaṇīye 'hann aindravāyavo gṛhyate sva evainam āyatane gṛhṇāti traiṣṭubho vai śukras traiṣṭubham dvitīyam ahar | tasmād dvitīye 'hañ chukro gṛhyate sva evainam āyatane gṛhṇāti jāgato vā āgrayaṇaḥ | jāgataṃ tṛtīyam ahar | tasmāt tṛtīye 'hann āgrayaṇo gṛhyate sva evainam āyatane gṛhṇāti | etad vai

TS 7 2.8.2

यज्ञम् आपद् यच् छन्दाꣳस्य् आप्नोति यद् आग्रयणः श्वो गृह्यते यत्रैव यज्ञम् अदृशन् तत एवैनम् पुनः प्र युङ्क्ते जगन्मुखो वै द्वितीयस् त्रिरात्रः । जागत आग्रयणः । यच् चतुर्थे ऽहन्न् आग्रयणो गृह्यते स्व एवैनम् आयतने गृह्णाति । अथो स्वम् एव छन्दो ऽनु पर्यावर्तन्ते राथंतरो वा ऐन्द्रवायवः । राथंतरम् पञ्चमम् अहर् । तस्मात् पञ्चमे ऽहन्

yajñam āpad yac chandāṃsy āpnoti yad āgrayaṇaḥ śvo gṛhyate yatraiva yajñam adṛśan tata evainam punaḥ pra yuṅkte jaganmukho vai dvitīyas trirātraḥ | jāgata āgrayaṇaḥ | yac caturthe 'hann āgrayaṇo gṛhyate sva evainam āyatane gṛhṇāti | atho svam eva chando 'nu paryāvartante rāthaṃtaro vā aindravāyavaḥ | rāthaṃtaram pañcamam ahar | tasmāt pañcame 'han

TS 7 2.8.3

ऐन्द्रवायवो गृह्यते स्व एवैनम् आयतने गृह्णाति बार्हतो वै शुक्रः । बार्हतꣳ षष्ठम् अहर् । तस्मात् षष्ठे ऽहञ् छुक्रो गृह्यते स्व एवैनम् आयतने गृह्णाति । एतद् वै द्वितीयं यज्ञम् आपद् यच् छन्दाꣳस्य् आप्नोति यच् छुक्रः श्वो गृह्यते यत्रैव यज्ञम् अदृशन् तत एवैनम् पुनः प्र युङ्क्ते त्रिष्टुङ्मुखो वै तृतीयस् त्रिरात्रस् त्रैष्टुभः

aindravāyavo gṛhyate sva evainam āyatane gṛhṇāti bārhato vai śukraḥ | bārhataṃ ṣaṣṭham ahar | tasmāt ṣaṣṭhe 'hañ chukro gṛhyate sva evainam āyatane gṛhṇāti | etad vai dvitīyaṃ yajñam āpad yac chandāṃsy āpnoti yac chukraḥ śvo gṛhyate yatraiva yajñam adṛśan tata evainam punaḥ pra yuṅkte triṣṭuṅmukho vai tṛtīyas trirātras traiṣṭubhaḥ

TS 7 2.8.4

शुक्रः । यत् सप्तमे ऽहञ् छुक्रो गृह्यते स्व एवैनम् आयतने गृह्णाति । अथो स्वम् एव छन्दो ऽनु पर्यावर्तन्ते वाग् वा आग्रयणः । वाग् अष्टमम् अहर् । तस्माद् अष्टमे ऽहन्न् आग्रयणो गृह्यते स्व एवैनम् आयतने गृह्णाति प्राणो वा ऐन्द्रवायवः प्राणो नवमम् अहर् । तस्मान् नवमे ऽहन्न् ऐन्द्रवायवो गृह्यते स्व एवैनम् आयतने गृह्णाति । एतत्

śukraḥ | yat saptame 'hañ chukro gṛhyate sva evainam āyatane gṛhṇāti | atho svam eva chando 'nu paryāvartante vāg vā āgrayaṇaḥ | vāg aṣṭamam ahar | tasmād aṣṭame 'hann āgrayaṇo gṛhyate sva evainam āyatane gṛhṇāti prāṇo vā aindravāyavaḥ prāṇo navamam ahar | tasmān navame 'hann aindravāyavo gṛhyate sva evainam āyatane gṛhṇāti | etat

TS 7 2.8.5

वै तृतीयं यज्ञम् आपद् यच् छन्दाꣳस्य् आप्नोति यद् ऐन्द्रवायवः श्वो गृह्यते यत्रैव यज्ञम् अदृशन् तत एवैनम् पुनः प्र युङ्क्ते । अथो स्वम् एव छन्दो ऽनु पर्यावर्तन्ते पथो वा एते ऽध्य् अपथेन यन्ति ये ऽन्येनैन्द्रवायवात् प्रतिपद्यन्ते । अन्तः खलु वा एष यज्ञस्य यद् दशमम् अहर् दशमे ऽहन्न् ऐन्द्रवायवो गृह्यते यज्ञस्य

vai tṛtīyaṃ yajñam āpad yac chandāṃsy āpnoti yad aindravāyavaḥ śvo gṛhyate yatraiva yajñam adṛśan tata evainam punaḥ pra yuṅkte | atho svam eva chando 'nu paryāvartante patho vā ete 'dhy apathena yanti ye 'nyenaindravāyavāt pratipadyante | antaḥ khalu vā eṣa yajñasya yad daśamam ahar daśame 'hann aindravāyavo gṛhyate yajñasya

TS 7 2.8.6

एवान्तं गत्वा पथात् पन्थाम् अपि यन्ति । अथो यथा वहीयसा प्रतिसारं वहन्ति तादृग् एव तत् । छन्दाꣳस्य् अन्योऽन्यस्य लोकम् अभ्यध्यायन् तान्य् एतेनैव देवा व्यवाहयन् । ऐन्द्रवायवस्य वा एतद् आयतनं यच् चतुर्थम् अहर् । तस्मिन्न् आग्रयणो गृह्यते तस्माद् आग्रयणस्यायतने नवमे ऽहन्न् ऐन्द्रवायवो गृह्यते शुक्रस्य वा एतद् आयतनं यत् पञ्चमम्

evāntaṃ gatvā pathāt panthām api yanti | atho yathā vahīyasā pratisāraṃ vahanti tādṛg eva tat | chandāṃsy anyo'nyasya lokam abhyadhyāyan tāny etenaiva devā vyavāhayan | aindravāyavasya vā etad āyatanaṃ yac caturtham ahar | tasminn āgrayaṇo gṛhyate tasmād āgrayaṇasyāyatane navame 'hann aindravāyavo gṛhyate śukrasya vā etad āyatanaṃ yat pañcamam

TS 7 2.8.7

अहर् । तस्मिन्न् ऐन्द्रवायवो गृह्यते तस्माद् ऐन्द्रवायवस्याऽऽयतने सप्तमे ऽहञ् छुक्रो गृह्यते । आग्रयणस्य वा एतद् आयतनं यत् षष्ठम् अहर् । तस्मिञ् छुक्रो गृह्यते तस्माच् छुक्रस्यायतने ऽष्टमे ऽहन्न् आग्रयणो गृह्यते छन्दाꣳस्य् एव तद् वि वाहयति प्र वस्यसो विवाहम् आप्नोति य एवं वेद । अथो देवताभ्य एव यज्ञे संविदं दधाति तस्माद् इदम् अन्योऽन्यस्मै दधाति ॥

ahar | tasminn aindravāyavo gṛhyate tasmād aindravāyavasyā''yatane saptame 'hañ chukro gṛhyate | āgrayaṇasya vā etad āyatanaṃ yat ṣaṣṭham ahar | tasmiñ chukro gṛhyate tasmāc chukrasyāyatane 'ṣṭame 'hann āgrayaṇo gṛhyate chandāṃsy eva tad vi vāhayati pra vasyaso vivāham āpnoti ya evaṃ veda | atho devatābhya eva yajñe saṃvidaṃ dadhāti tasmād idam anyo'nyasmai dadhāti ||

TS 7 2.9.1

प्रजापतिर् अकामयत प्र जायेयेति स एतं द्वादशरात्रम् अपश्यत् तम् आहरत् तेनायजत ततो वै स प्राजायत यः कामयेत प्र जायेयेति स द्वादशरात्रेण यजेत प्रैव जायते ब्रह्मवादिनो वदन्ति । अग्निष्टोमप्रायणा यज्ञा अथ कस्माद् अतिरात्रः पूर्वः प्र युज्यत इति चक्षुषी वा एते यज्ञस्य यद् अतिरात्रौ कनीनिके अग्निष्टोमौ यत्

prajāpatir akāmayata pra jāyeyeti sa etaṃ dvādaśarātram apaśyat tam āharat tenāyajata tato vai sa prājāyata yaḥ kāmayeta pra jāyeyeti sa dvādaśarātreṇa yajeta praiva jāyate brahmavādino vadanti | agniṣṭomaprāyaṇā yajñā atha kasmād atirātraḥ pūrvaḥ pra yujyata iti cakṣuṣī vā ete yajñasya yad atirātrau kanīnike agniṣṭomau yat

TS 7 2.9.2

अग्निष्टोमं पूर्वम् प्रयुञ्जीरन् बहिर्धा कनीनिके दध्युस् तस्माद् अतिरात्रः पूर्वः प्र युज्यते चक्षुषी एव यज्ञे धित्वा मध्यतः कनीनिके प्रति दधति यो वै गायत्रीं ज्योतिःपक्षां वेद ज्योतिषा भासा सुवर्गं लोकम् एति याव् अग्निष्टोमौ तौ पक्षौ ये ऽन्तरे ऽष्टाव् उक्थ्याः स आत्मा । एषा वै गायत्री ज्योतिःपक्षा य एवं वेद ज्योतिषा भासा सुवर्गं लोकम्

agniṣṭomaṃ pūrvam prayuñjīran bahirdhā kanīnike dadhyus tasmād atirātraḥ pūrvaḥ pra yujyate cakṣuṣī eva yajñe dhitvā madhyataḥ kanīnike prati dadhati yo vai gāyatrīṃ jyotiḥpakṣāṃ veda jyotiṣā bhāsā suvargaṃ lokam eti yāv agniṣṭomau tau pakṣau ye 'ntare 'ṣṭāv ukthyāḥ sa ātmā | eṣā vai gāyatrī jyotiḥpakṣā ya evaṃ veda jyotiṣā bhāsā suvargaṃ lokam

TS 7 2.9.3

एति प्रजापतिर् वा एष द्वादशधा विहितो यद् द्वादशरात्रः । याव् अतिरात्रौ तौ पक्षौ ये ऽन्तरे ऽष्टाव् उक्थ्याः स आत्मा प्रजापतिर् वावैष सन्त् सद् ध वै सत्त्रेण स्पृणोति प्राणा वै सत् प्राणान् एव स्पृणोति सर्वासां वा एते प्रजानाम् प्राणैर् आसते ये सत्त्रम् आसते तस्मात् पृच्छन्ति किम् एते सत्त्रिण इति प्रियः प्रजानाम् उत्थितो भवति य एवं वेद ॥

eti prajāpatir vā eṣa dvādaśadhā vihito yad dvādaśarātraḥ | yāv atirātrau tau pakṣau ye 'ntare 'ṣṭāv ukthyāḥ sa ātmā prajāpatir vāvaiṣa sant sad dha vai sattreṇa spṛṇoti prāṇā vai sat prāṇān eva spṛṇoti sarvāsāṃ vā ete prajānām prāṇair āsate ye sattram āsate tasmāt pṛcchanti kim ete sattriṇa iti priyaḥ prajānām utthito bhavati ya evaṃ veda ||

TS 7 2.10.1

न वा एषो ऽन्यतोवैश्वानरः सुवर्गाय लोकाय प्राभवत् । ऊर्ध्वो ह वा एष आतत आसीत् ते देवा एतं वैश्वानरम् पर्य् औहन्त् सुवर्गस्य लोकस्य प्रभूत्यै । ऋतवो वा एतेन प्रजापतिम् अयाजयन् तेष्व् आर्ध्नोद् अधि तत् ऋध्नोति ह वा ऋत्विक्षु य एवं विद्वान् द्वादशाहेन यजते ते ऽस्मिन्न् ऐच्छन्त स रसम् अह वसन्ताय प्रायच्छत्

na vā eṣo 'nyatovaiśvānaraḥ suvargāya lokāya prābhavat | ūrdhvo ha vā eṣa ātata āsīt te devā etaṃ vaiśvānaram pary auhant suvargasya lokasya prabhūtyai | ṛtavo vā etena prajāpatim ayājayan teṣv ārdhnod adhi tat ṛdhnoti ha vā ṛtvikṣu ya evaṃ vidvān dvādaśāhena yajate te 'sminn aicchanta sa rasam aha vasantāya prāyacchat

TS 7 2.10.2

यवं ग्रीष्मायौषधीर् वर्षाभ्यो व्रीहीञ् छरदे माषतिलौ हेमन्तशिशिराभ्याम् । तेनेन्द्रम् प्रजापतिर् अयाजयत् ततो वा इन्द्र इन्द्रो ऽभवत् तस्माद् आहुः । आनुजावरस्य यज्ञ इति स ह्य् एतेनाग्रे ऽयजत । एष ह वै कुणपम् अत्ति यः सत्त्रे प्रतिगृह्णाति पुरुषकुणपम् अश्वकुणपम् । गौर् वा अन्नम् । येन पात्रेणान्नम् बिभ्रति यत् तन् न निर्णेनिजति ततो ऽधि

yavaṃ grīṣmāyauṣadhīr varṣābhyo vrīhīñ charade māṣatilau hemantaśiśirābhyām | tenendram prajāpatir ayājayat tato vā indra indro 'bhavat tasmād āhuḥ | ānujāvarasya yajña iti sa hy etenāgre 'yajata | eṣa ha vai kuṇapam atti yaḥ sattre pratigṛhṇāti puruṣakuṇapam aśvakuṇapam | gaur vā annam | yena pātreṇānnam bibhrati yat tan na nirṇenijati tato 'dhi

TS 7 2.10.3

मलं जायते । एक एव यजेत । एको हि प्रजापतिर् आर्ध्नोत् । द्वादश रात्रीर् दीक्षितः स्यात् । द्वादश मासाः संवत्सरः संवत्सरः प्रजापतिः प्रजापतिर् वावैष एष ह त्वै जायते यस् तपसो ऽधि जायते चतुर्धा वा एतास् तिस्रस्तिस्रो रात्रयो यद् द्वादशोपसदः । याः प्रथमा यज्ञं ताभिः सम् भरति या द्वितीया यज्ञं ताभिर् आ रभते

malaṃ jāyate | eka eva yajeta | eko hi prajāpatir ārdhnot | dvādaśa rātrīr dīkṣitaḥ syāt | dvādaśa māsāḥ saṃvatsaraḥ saṃvatsaraḥ prajāpatiḥ prajāpatir vāvaiṣa eṣa ha tvai jāyate yas tapaso 'dhi jāyate caturdhā vā etās tisrastisro rātrayo yad dvādaśopasadaḥ | yāḥ prathamā yajñaṃ tābhiḥ sam bharati yā dvitīyā yajñaṃ tābhir ā rabhate

TS 7 2.10.4

यास् तृतीयाः पात्राणि ताभिर् निर्णेनिक्ते याश् चतुर्थीर् अपि ताभिर् आत्मानम् अन्तरतः शुन्धते यो वा अस्य पशुम् अत्ति माꣳसꣳ सो ऽत्ति यः पुरोडाशम् मस्तिष्कꣳ स यः परिवापम् पुरीषꣳ स य आज्यम् मज्जानꣳ स यः सोमꣳ स्वेदꣳ सः । अपि ह वा अस्य शीर्षण्या निष्पदः प्रति गृह्णाति यो द्वादशाहे प्रतिगृह्णाति तस्माद् द्वादशाहेन न याज्यम् पाप्मनो व्यावृत्त्यै ॥

yās tṛtīyāḥ pātrāṇi tābhir nirṇenikte yāś caturthīr api tābhir ātmānam antarataḥ śundhate yo vā asya paśum atti māṃsaṃ so 'tti yaḥ puroḍāśam mastiṣkaṃ sa yaḥ parivāpam purīṣaṃ sa ya ājyam majjānaṃ sa yaḥ somaṃ svedaṃ saḥ | api ha vā asya śīrṣaṇyā niṣpadaḥ prati gṛhṇāti yo dvādaśāhe pratigṛhṇāti tasmād dvādaśāhena na yājyam pāpmano vyāvṛttyai ||

TS 7 2.11.1

एकस्मै स्वाहा द्वाभ्याꣳ स्वाहा त्रिभ्यः स्वाहा चतुर्भ्यः स्वाहा पञ्चभ्यः स्वाहा षड्भ्यः स्वाहा सप्तभ्यः स्वाहा । अष्टाभ्यः स्वाहा नवभ्यः स्वाहा दशभ्यः स्वाहा । एकादशभ्यः स्वाहा द्वादशभ्यः स्वाहा त्रयोदशभ्यः स्वाहा चतुर्दशभ्यः स्वाहा पञ्चदशभ्यः स्वाहा षोडशभ्यः स्वाहा सप्तदशभ्यः स्वाहा । अष्टादशभ्यः स्वाहा । एकान्न विꣳशत्यै स्वाहा नवविꣳशत्यै स्वाहा । एकान्न चत्वारिꣳशते स्वाहा नवचत्वारिꣳशते स्वाहा । एकान्न षष्ट्यै स्वाहा नवषष्ट्यै स्वाहा । एकान्नाशीत्यै स्वाहा नवाशीत्यै स्वाहा । एकान्न शताय स्वाहा शताय स्वाहा द्वाभ्याꣳ शताभ्याꣳ स्वाहा सर्वस्मै स्वाहा ॥

ekasmai svāhā dvābhyāṃ svāhā tribhyaḥ svāhā caturbhyaḥ svāhā pañcabhyaḥ svāhā ṣaḍbhyaḥ svāhā saptabhyaḥ svāhā | aṣṭābhyaḥ svāhā navabhyaḥ svāhā daśabhyaḥ svāhā | ekādaśabhyaḥ svāhā dvādaśabhyaḥ svāhā trayodaśabhyaḥ svāhā caturdaśabhyaḥ svāhā pañcadaśabhyaḥ svāhā ṣoḍaśabhyaḥ svāhā saptadaśabhyaḥ svāhā | aṣṭādaśabhyaḥ svāhā | ekānna viṃśatyai svāhā navaviṃśatyai svāhā | ekānna catvāriṃśate svāhā navacatvāriṃśate svāhā | ekānna ṣaṣṭyai svāhā navaṣaṣṭyai svāhā | ekānnāśītyai svāhā navāśītyai svāhā | ekānna śatāya svāhā śatāya svāhā dvābhyāṃ śatābhyāṃ svāhā sarvasmai svāhā ||

TS 7 2.12.1

एकस्मै स्वाहा त्रिभ्यः स्वाहा पञ्चभ्यः स्वाहा सप्तभ्यः स्वाहा नवभ्यः स्वाहा । एकादशभ्यः स्वाहा त्रयोदशभ्यः स्वाहा पञ्चदशभ्यः स्वाहा सप्तदशभ्यः स्वाहा । एकान्न विꣳशत्यै स्वाहा नवविꣳशत्यै स्वाहा । एकान्न चत्वारिꣳशते स्वाहा नवचत्वारिꣳशते स्वाहा । एकान्न षष्ट्यै स्वाहा नवषष्ट्यै स्वाहा । एकान्नाशीत्यै स्वाहा नवाशीत्यै स्वाहा । एकान्न शताय स्वाहा शताय स्वाहा सर्वस्मै स्वाहा ॥

ekasmai svāhā tribhyaḥ svāhā pañcabhyaḥ svāhā saptabhyaḥ svāhā navabhyaḥ svāhā | ekādaśabhyaḥ svāhā trayodaśabhyaḥ svāhā pañcadaśabhyaḥ svāhā saptadaśabhyaḥ svāhā | ekānna viṃśatyai svāhā navaviṃśatyai svāhā | ekānna catvāriṃśate svāhā navacatvāriṃśate svāhā | ekānna ṣaṣṭyai svāhā navaṣaṣṭyai svāhā | ekānnāśītyai svāhā navāśītyai svāhā | ekānna śatāya svāhā śatāya svāhā sarvasmai svāhā ||

TS 7 2.13.1

द्वाभ्याꣳ स्वाहा चतुर्भ्यः स्वाहा षड्भ्यः स्वाहा । अष्टाभ्यः स्वाहा दशभ्यः स्वाहा द्वादशभ्यः स्वाहा चतुर्दशभ्यः स्वाहा षोडशभ्यः स्वाहा । अष्टादशभ्यः स्वाहा विꣳशत्यै स्वाहा । अष्टानवत्यै स्वाहा शताय स्वाहा सर्वस्मै स्वाहा ॥

dvābhyāṃ svāhā caturbhyaḥ svāhā ṣaḍbhyaḥ svāhā | aṣṭābhyaḥ svāhā daśabhyaḥ svāhā dvādaśabhyaḥ svāhā caturdaśabhyaḥ svāhā ṣoḍaśabhyaḥ svāhā | aṣṭādaśabhyaḥ svāhā viṃśatyai svāhā | aṣṭānavatyai svāhā śatāya svāhā sarvasmai svāhā ||

TS 7 2.14.1

त्रिभ्यः स्वाहा पञ्चभ्यः स्वाहा सप्तभ्यः स्वाहा नवभ्यः स्वाहा । एकादशभ्यः स्वाहा त्रयोदशभ्यः स्वाहा पञ्चदशभ्यः स्वाहा सप्तदशभ्यः स्वाहा । एकान्न विꣳशत्यै स्वाहा नवविꣳशत्यै स्वाहा । एकान्न चत्वारिꣳशते स्वाहा नवचत्वारिꣳशते स्वाहा । एकान्न षष्ट्यै स्वाहा नवषष्ट्यै स्वाहा । एकान्नाशीत्यै स्वाहा नवाशीत्यै स्वाहा । एकान्न शताय स्वाहा शताय स्वाहा सर्वस्मै स्वाहा ॥

tribhyaḥ svāhā pañcabhyaḥ svāhā saptabhyaḥ svāhā navabhyaḥ svāhā | ekādaśabhyaḥ svāhā trayodaśabhyaḥ svāhā pañcadaśabhyaḥ svāhā saptadaśabhyaḥ svāhā | ekānna viṃśatyai svāhā navaviṃśatyai svāhā | ekānna catvāriṃśate svāhā navacatvāriṃśate svāhā | ekānna ṣaṣṭyai svāhā navaṣaṣṭyai svāhā | ekānnāśītyai svāhā navāśītyai svāhā | ekānna śatāya svāhā śatāya svāhā sarvasmai svāhā ||

TS 7 2.15.1

चतुर्भ्यः स्वाहा । अष्टाभ्यः स्वाहा द्वादशभ्यः स्वाहा षोडशभ्यः स्वाहा विꣳशत्यै स्वाहा षण्णवत्यै स्वाहा शताय स्वाहा सर्वस्मै स्वाहा ॥

caturbhyaḥ svāhā | aṣṭābhyaḥ svāhā dvādaśabhyaḥ svāhā ṣoḍaśabhyaḥ svāhā viṃśatyai svāhā ṣaṇṇavatyai svāhā śatāya svāhā sarvasmai svāhā ||

TS 7 2.16.1

पञ्चभ्यः स्वाहा दशभ्यः स्वाहा पञ्चदशभ्यः स्वाहा विꣳशत्यै स्वाहा पञ्चनवत्यै स्वाहा शताय स्वाहा सर्वस्मै स्वाहा ॥

pañcabhyaḥ svāhā daśabhyaḥ svāhā pañcadaśabhyaḥ svāhā viṃśatyai svāhā pañcanavatyai svāhā śatāya svāhā sarvasmai svāhā ||

TS 7 2.17.1

दशभ्यः स्वाहा विꣳशत्यै स्वाहा त्रिꣳशते स्वाहा चत्वारिꣳशते स्वाहा पञ्चाशते स्वाहा षष्ट्यै स्वाहा सप्तत्यै स्वाहा । अशीत्यै स्वाहा नवत्यै स्वाहा शताय स्वाहा सर्वस्मै स्वाहा ॥

daśabhyaḥ svāhā viṃśatyai svāhā triṃśate svāhā catvāriṃśate svāhā pañcāśate svāhā ṣaṣṭyai svāhā saptatyai svāhā | aśītyai svāhā navatyai svāhā śatāya svāhā sarvasmai svāhā ||

TS 7 2.18.1

विꣳशत्यै स्वाहा चत्वारिꣳशते स्वाहा षष्ट्यै स्वाहा । अशीत्यै स्वाहा शताय स्वाहा सर्वस्मै स्वाहा ॥

viṃśatyai svāhā catvāriṃśate svāhā ṣaṣṭyai svāhā | aśītyai svāhā śatāya svāhā sarvasmai svāhā ||

TS 7 2.19.1

पञ्चाशते स्वाहा शताय स्वाहा द्वाभ्याꣳ शताभ्याꣳ स्वाहा त्रिभ्यः शतेभ्यः स्वाहा चतुर्भ्यः शतेभ्यः स्वाहा पञ्चभ्यः शतेभ्यः स्वाहा षड्भ्यः शतेभ्यः स्वाहा सप्तभ्यः शतेभ्यः स्वाहा । अष्टाभ्यः शतेभ्यः स्वाहा नवभ्यः शतेभ्यः स्वाहा सहस्राय स्वाहा सर्वस्मै स्वाहा ॥

pañcāśate svāhā śatāya svāhā dvābhyāṃ śatābhyāṃ svāhā tribhyaḥ śatebhyaḥ svāhā caturbhyaḥ śatebhyaḥ svāhā pañcabhyaḥ śatebhyaḥ svāhā ṣaḍbhyaḥ śatebhyaḥ svāhā saptabhyaḥ śatebhyaḥ svāhā | aṣṭābhyaḥ śatebhyaḥ svāhā navabhyaḥ śatebhyaḥ svāhā sahasrāya svāhā sarvasmai svāhā ||

TS 7 2.20.1

शताय स्वाहा सहस्राय स्वाहा । अयुताय स्वाहा नियुताय स्वाहा प्रयुताय स्वाहा । अर्बुदाय स्वाहा न्यर्बुदाय स्वाहा समुद्राय स्वाहा मध्याय स्वाहा । अन्ताय स्वाहा परार्धाय स्वाहा । उषसे स्वाहा व्युष्ट्यै स्वाहा । उदेष्यते स्वाहा । उद्यते स्वाहा । उदिताय स्वाहा सुवर्गाय स्वाहा लोकाय स्वाहा सर्वस्मै स्वाहा ॥

śatāya svāhā sahasrāya svāhā | ayutāya svāhā niyutāya svāhā prayutāya svāhā | arbudāya svāhā nyarbudāya svāhā samudrāya svāhā madhyāya svāhā | antāya svāhā parārdhāya svāhā | uṣase svāhā vyuṣṭyai svāhā | udeṣyate svāhā | udyate svāhā | uditāya svāhā suvargāya svāhā lokāya svāhā sarvasmai svāhā ||