← Taittiriya Samhita (Black Yajurveda) — Kanda 5

Taittiriya Samhita (Black Yajurveda) — Kanda 5 — Chapter 6

TS 5 6.1.1

हिरण्यवर्णाः शुचयः पावका यासु जातः कश्यपो यास्व् इन्द्रः । अग्निं गर्भं दधिरे विरूपास् ता न आपः शꣳ स्योना भवन्तु ॥ यासाꣳ राजा वरुणो याति मध्ये सत्यानृते अवपश्यञ् जनानाम् । मधुश्चुतः शुचयो याः पावकास् ता न आपः शꣳ स्योना भवन्तु ॥ यासां देवा दिवि कृण्वन्ति भक्षं या अन्तरिक्षे बहुधा भवन्ति । याः पृथिवीम् पयसोन्दन्ति

hiraṇyavarṇāḥ śucayaḥ pāvakā yāsu jātaḥ kaśyapo yāsv indraḥ | agniṃ garbhaṃ dadhire virūpās tā na āpaḥ śaṃ syonā bhavantu || yāsāṃ rājā varuṇo yāti madhye satyānṛte avapaśyañ janānām | madhuścutaḥ śucayo yāḥ pāvakās tā na āpaḥ śaṃ syonā bhavantu || yāsāṃ devā divi kṛṇvanti bhakṣaṃ yā antarikṣe bahudhā bhavanti | yāḥ pṛthivīm payasondanti

TS 5 6.1.2

शुक्रास् ता न आपः शꣳ स्योना भवन्तु ॥ शिवेन मा चक्षुषा पश्यतापः शिवया तनुवो ऽप स्पृशत त्वचम् मे । सर्वाꣳ अग्नीꣳ र् अप्सुषदो हुवे वो मयि वर्चो बलम् ओजो नि धत्त ॥ यद् अदः सम्प्रयतीर् अहाव् अनदता हते । तस्माद् आ नद्यो नाम स्थ ता वो नामानि सिन्धवः ॥ यत् प्रेषिता वरुणेन ताः शीभꣳ समवल्गत ।

śukrās tā na āpaḥ śaṃ syonā bhavantu || śivena mā cakṣuṣā paśyatāpaḥ śivayā tanuvo 'pa spṛśata tvacam me | sarvāṃ agnīṃ r apsuṣado huve vo mayi varco balam ojo ni dhatta || yad adaḥ samprayatīr ahāv anadatā hate | tasmād ā nadyo nāma stha tā vo nāmāni sindhavaḥ || yat preṣitā varuṇena tāḥ śībhaṃ samavalgata |

TS 5 6.1.3

तद् आप्नोद् इन्द्रो वो यतीस् तस्माद् आपो अनु स्थन ॥ अपकामꣳ स्यन्दमाना अवीवरत वो हिकम् । इन्द्रो वः शक्तिभिर् देवीस् तस्माद् वार् णाम वो हितम् ॥ एको देवो अप्य् अतिष्ठत् स्यन्दमाना यथावशम् । उद् आनिषुर् महीर् इति तस्माद् उदकम् उच्यते ॥ आपो भद्रा घृतम् इद् आप आसुर् अग्नीषोमौ बिभ्रत्य् आप इत् ताः । तीव्रो रसो मधुपृचाम् ॥

tad āpnod indro vo yatīs tasmād āpo anu sthana || apakāmaṃ syandamānā avīvarata vo hikam | indro vaḥ śaktibhir devīs tasmād vār ṇāma vo hitam || eko devo apy atiṣṭhat syandamānā yathāvaśam | ud āniṣur mahīr iti tasmād udakam ucyate || āpo bhadrā ghṛtam id āpa āsur agnīṣomau bibhraty āpa it tāḥ | tīvro raso madhupṛcām ||

TS 5 6.1.4

अरंगम आ मा प्राणेन सह वर्चसा गन् ॥ आद् इत् पश्याम्य् उत वा शृणोम्य् आ मा घोषो गच्छति वाङ् न आसाम् । मन्ये भेजानो अमृतस्य तर्हि हिरण्यवर्णा अतृपं यद् वः ॥ आपो हि ष्ठा मयोभुवस् ता न ऊर्जे दधातन । महे रणाय चक्षसे ॥ यो वः शिवतमो रसस् तस्य भाजयतेह नः । उशतीर् इव मातरः ॥ तस्मा अरं गमाम वो यस्य क्षयाय जिन्वथ । आपो जनयथा च नः ॥ दिवि श्रयस्वान्तरिक्षे यतस्व पृथिव्या सम् भव ब्रह्मवर्चसम् असि ब्रह्मवर्चसाय त्वा ॥

araṃgama ā mā prāṇena saha varcasā gan || ād it paśyāmy uta vā śṛṇomy ā mā ghoṣo gacchati vāṅ na āsām | manye bhejāno amṛtasya tarhi hiraṇyavarṇā atṛpaṃ yad vaḥ || āpo hi ṣṭhā mayobhuvas tā na ūrje dadhātana | mahe raṇāya cakṣase || yo vaḥ śivatamo rasas tasya bhājayateha naḥ | uśatīr iva mātaraḥ || tasmā araṃ gamāma vo yasya kṣayāya jinvatha | āpo janayathā ca naḥ || divi śrayasvāntarikṣe yatasva pṛthivyā sam bhava brahmavarcasam asi brahmavarcasāya tvā ||

TS 5 6.2.1

अपां ग्रहान् गृह्णाति । एतद् वाव राजसूयं यद् एते ग्रहाः सवो ऽग्निः । वरुणसवो राजसूयम् अग्निसवश् चित्यः ताभ्याम् एव सूयते । अथो उभाव् एव लोकाव् अभि जयति यश् च राजसूयेनेजानस्य यश् चाग्निचिते । आपो भवन्ति । आपो वा अग्नेर् भ्रातृव्याः । यद् अपो ऽग्नेर् अधस्ताद् उपदधाति भ्रातृव्याभिभूत्यै भवत्य् आत्मना परास्य भ्रातृव्यो भवति । अमृतम्

TS 5 6.2.2

वा आपः तस्माद् अद्भिर् अवतान्तम् अभि षिञ्चन्ति नार्तिम् आर्छति सर्वम् आयुर् एति यस्यैता उपधीयन्ते य उ चैना एवं वेद । अन्नं वा आपः पशव आपः । अन्नम् पशवः । अन्नादः पशुमान् भवति यस्यैता उपधीयन्ते य उ चैना एवं वेद द्वादश भवन्ति द्वादश मासाः संवत्सरः संवत्सरेनैवास्मै

vā āpaḥ tasmād adbhir avatāntam abhi ṣiñcanti nārtim ārchati sarvam āyur eti yasyaitā upadhīyante ya u cainā evaṃ veda | annaṃ vā āpaḥ paśava āpaḥ | annam paśavaḥ | annādaḥ paśumān bhavati yasyaitā upadhīyante ya u cainā evaṃ veda dvādaśa bhavanti dvādaśa māsāḥ saṃvatsaraḥ saṃvatsarenaivāsmai

TS 5 6.2.3

अन्नम् अव रुन्द्धे पात्राणि भवन्ति पात्रे वा अन्नम् अद्यते सयोन्य् एवान्नम् अव रुन्द्धे । आ द्वादशात् पुरुषाद् अन्नम् अत्त्य् अथो पात्रान् न छिद्यते यस्यैता उपधीयन्ते य उ चैना एवं वेद कुम्भाश् च कुम्भीश् च मिथुनानि भवन्ति मिथुनस्य प्रजात्यै प्र प्रजया पशुभिर् मिथुनैर् जायते यस्यैता उपधीयन्ते य उ

annam ava runddhe pātrāṇi bhavanti pātre vā annam adyate sayony evānnam ava runddhe | ā dvādaśāt puruṣād annam atty atho pātrān na chidyate yasyaitā upadhīyante ya u cainā evaṃ veda kumbhāś ca kumbhīś ca mithunāni bhavanti mithunasya prajātyai pra prajayā paśubhir mithunair jāyate yasyaitā upadhīyante ya u

TS 5 6.2.4

चैना एवं वेद शुग् वा अग्निः सो ऽध्वर्युं यजमानम् प्रजाः शुचार्पयति यद् अप उपदधाति शुचम् एवास्य शमयति नार्तिम् आर्छत्य् अध्वर्युर् न यजमानः शाम्यन्ति प्रजा यत्रैता उपधीयन्ते । अपां वा एतानि हृदयानि यद् एता आपः । यद् एता अप उपदधाति दिव्याभिर् एवैनाः सꣳ सृजति वषुकः पर्जन्यः

cainā evaṃ veda śug vā agniḥ so 'dhvaryuṃ yajamānam prajāḥ śucārpayati yad apa upadadhāti śucam evāsya śamayati nārtim ārchaty adhvaryur na yajamānaḥ śāmyanti prajā yatraitā upadhīyante | apāṃ vā etāni hṛdayāni yad etā āpaḥ | yad etā apa upadadhāti divyābhir evaināḥ saṃ sṛjati vaṣukaḥ parjanyaḥ

TS 5 6.2.5

भवति यो वा एतासाम् आयतनं क्लृप्तिं वेदायतनवान् भवति कल्पते ऽस्मै । अनुसीतम् उप दधाति । एतद् वा आसाम् आयतनम् एषा क्लृप्तिः । य एवं वेदायतनवान् भवति कल्पते ऽस्मै द्वंद्वम् अन्या उप दधाति चतस्रो मध्ये धृत्यै । अन्नं वा इष्टकाः । एतत् खलु वै साक्षाद् अन्नं यद् एष चरुः । यद् एतं चरुम् उपदधाति साक्षात्

bhavati yo vā etāsām āyatanaṃ klṛptiṃ vedāyatanavān bhavati kalpate 'smai | anusītam upa dadhāti | etad vā āsām āyatanam eṣā klṛptiḥ | ya evaṃ vedāyatanavān bhavati kalpate 'smai dvaṃdvam anyā upa dadhāti catasro madhye dhṛtyai | annaṃ vā iṣṭakāḥ | etat khalu vai sākṣād annaṃ yad eṣa caruḥ | yad etaṃ carum upadadhāti sākṣāt

TS 5 6.2.6

एवास्मा अन्नम् अव रुन्द्धे मध्यत उप दधाति मध्यत एवास्मा अन्नं दधाति तस्मान् मध्यतो ऽन्नम् अद्यते बार्हस्पत्यो भवति ब्रह्म वै देवानाम् बृहस्पतिः । ब्रह्मणैवास्मा अन्नम् अव रुन्द्धे ब्रह्मवर्चसम् असि ब्रह्मवर्चसाय त्वेत्य् आह तेजस्वी ब्रह्मवर्चसी भवति यस्यैष उपधीयते य उ चैनम् एवं वेद ॥

evāsmā annam ava runddhe madhyata upa dadhāti madhyata evāsmā annaṃ dadhāti tasmān madhyato 'nnam adyate bārhaspatyo bhavati brahma vai devānām bṛhaspatiḥ | brahmaṇaivāsmā annam ava runddhe brahmavarcasam asi brahmavarcasāya tvety āha tejasvī brahmavarcasī bhavati yasyaiṣa upadhīyate ya u cainam evaṃ veda ||

TS 5 6.3.1

भूतेष्टका उप दधाति । अत्रात्र वै मृत्युर् जायते यत्रयत्रैव मृत्युर् जायते तत एवैनम् अव यजते तस्माद् अग्निचित् सर्वम् आयु एति सर्वे ह्य् अस्य मृत्यवो ऽवेष्टाः तस्माद् अग्निचिन् नाभिचरितवै प्रत्यग् एनम् अभिचारः स्तृणुते सूयते वा एष यो ऽग्निं चिनुते देवसुवाम् एतानि हवीꣳ षि भवन्ति । एतावन्तो वै देवानाꣳ सवाः त एव

bhūteṣṭakā upa dadhāti | atrātra vai mṛtyur jāyate yatrayatraiva mṛtyur jāyate tata evainam ava yajate tasmād agnicit sarvam āyu eti sarve hy asya mṛtyavo 'veṣṭāḥ tasmād agnicin nābhicaritavai pratyag enam abhicāraḥ stṛṇute sūyate vā eṣa yo 'gniṃ cinute devasuvām etāni havīṃ ṣi bhavanti | etāvanto vai devānāṃ savāḥ ta eva

TS 5 6.3.2

अस्मै सवान् प्र यच्छन्ति त एनꣳ सुवन्ते सवो ऽग्निर् वरुणसवो राजसूयम् ब्रह्मसवश् चित्यः । देवस्य त्वा सवितुः प्रसव इत्य् आह सवितृप्रसूत एवैनम् ब्रह्मणा देवताभिर् अभि षिञ्चति । अन्नस्यान्नस्याभि षिञ्चति । अन्नस्यान्नस्यावरुद्ध्यै पुरस्तात् प्रत्यञ्चम् अभि षिञ्चति पुरस्ताद् धि प्रतीचीनम् अन्नम् अद्यते शीर्षतो ऽभि षिञ्चति शीर्षतो ह्य् अन्नम् अद्यते । आ मुखाद् अन्ववस्रावयति ॥

asmai savān pra yacchanti ta enaṃ suvante savo 'gnir varuṇasavo rājasūyam brahmasavaś cityaḥ | devasya tvā savituḥ prasava ity āha savitṛprasūta evainam brahmaṇā devatābhir abhi ṣiñcati | annasyānnasyābhi ṣiñcati | annasyānnasyāvaruddhyai purastāt pratyañcam abhi ṣiñcati purastād dhi pratīcīnam annam adyate śīrṣato 'bhi ṣiñcati śīrṣato hy annam adyate | ā mukhād anvavasrāvayati ||

TS 5 6.3.3

मुखत एवास्मा अन्नाद्यं दधाति । अग्नेस् त्वा साम्राज्येनाभि षिञ्चामीत्य् आह । एष वा अग्नेः सवः तेनैवैनम् अभि षिञ्चति बृहस्पतेस् त्वा साम्राज्येनाभि षिञ्चामीत्य् आह ब्रह्म वै देवानाम् बृहस्पतिः । ब्रह्मणैवैनम् अभि षिञ्चति । इन्द्रस्य त्वा साम्राज्येनाभि षिञ्चामीत्य् आह । इन्द्रियम् एवास्मिन्न् उपरिष्टाद् दधाति । एतत्

mukhata evāsmā annādyaṃ dadhāti | agnes tvā sāmrājyenābhi ṣiñcāmīty āha | eṣa vā agneḥ savaḥ tenaivainam abhi ṣiñcati bṛhaspates tvā sāmrājyenābhi ṣiñcāmīty āha brahma vai devānām bṛhaspatiḥ | brahmaṇaivainam abhi ṣiñcati | indrasya tvā sāmrājyenābhi ṣiñcāmīty āha | indriyam evāsminn upariṣṭād dadhāti | etat

TS 5 6.3.4

वै राजसूयस्य रूपम् । य एवं विद्वान् अग्निं चिनुत उभाव् एव लोकाव् अभि जयति यश् च राजसूयेनेजानस्य यश् चाग्निचितः । इन्द्रस्य सुषुवाणस्य दशधेन्द्रियं वीर्यम् परापतत् तद् देवाः सौत्रामण्या सम् अभरन् । सूयते वा एष यो ऽग्निं चिनुते । अग्निं चित्वा सौत्रामण्या यजेतेन्द्रियम् एव वीर्यꣳ सम्भृत्यात्मन् धत्ते ॥

vai rājasūyasya rūpam | ya evaṃ vidvān agniṃ cinuta ubhāv eva lokāv abhi jayati yaś ca rājasūyenejānasya yaś cāgnicitaḥ | indrasya suṣuvāṇasya daśadhendriyaṃ vīryam parāpatat tad devāḥ sautrāmaṇyā sam abharan | sūyate vā eṣa yo 'gniṃ cinute | agniṃ citvā sautrāmaṇyā yajetendriyam eva vīryaṃ sambhṛtyātman dhatte ||

TS 5 6.4.1

सजूर् अब्दो ऽयावभिः सजूर् उषा अरुणीभिः सजूः सूर्य एतशेन सजोषाव् अश्विना दꣳ सोभिः सजूर् अग्निर् वैश्वानर इडाभिः । घृतेन स्वाहा संवत्सरो वा अब्दः । मासा अयावाः । उषा अरुणी सूर्य एतशः । इमे अश्विना संवत्सरो ऽग्निर् वैश्वानरः पशव इडा पशवो घृतम् । संवत्सरम् पशवो ऽनु प्र जायन्ते संवत्सरेणैवास्मै पशून् प्र जनयति दर्भस्तम्बे जुहोति यत्

sajūr abdo 'yāvabhiḥ sajūr uṣā aruṇībhiḥ sajūḥ sūrya etaśena sajoṣāv aśvinā daṃ sobhiḥ sajūr agnir vaiśvānara iḍābhiḥ | ghṛtena svāhā saṃvatsaro vā abdaḥ | māsā ayāvāḥ | uṣā aruṇī sūrya etaśaḥ | ime aśvinā saṃvatsaro 'gnir vaiśvānaraḥ paśava iḍā paśavo ghṛtam | saṃvatsaram paśavo 'nu pra jāyante saṃvatsareṇaivāsmai paśūn pra janayati darbhastambe juhoti yat

TS 5 6.4.2

वा अस्या अमृतं यद् वीर्यं तद् दर्भाः तस्मिञ् जुहोति प्रैव जायते ऽन्नादो भवति यस्यैवं जुह्वति । एता वै देवता अग्नेः पुरस्ताद्भागाः ता एव प्रीणाति । अथो चक्षुर् एवाग्नेः पुरस्तात् प्रति दधाति । अनन्धो भवति य एवं वेद । आपो वा इदम् अग्रे सलिलम् आसीत् स प्रजापतिः पुष्करपर्णे वातो भूतो ऽलेलायत् सः

vā asyā amṛtaṃ yad vīryaṃ tad darbhāḥ tasmiñ juhoti praiva jāyate 'nnādo bhavati yasyaivaṃ juhvati | etā vai devatā agneḥ purastādbhāgāḥ tā eva prīṇāti | atho cakṣur evāgneḥ purastāt prati dadhāti | anandho bhavati ya evaṃ veda | āpo vā idam agre salilam āsīt sa prajāpatiḥ puṣkaraparṇe vāto bhūto 'lelāyat saḥ

TS 5 6.4.3

प्रतिष्ठां नाविन्दत स एतद् अपां कुलायम् अपश्यत् तस्मिन्न् अग्निम् अचिनुत तद् इयम् अभवत् ततो वै स प्रत्य् अतिष्ठत् । याम् पुरस्ताद् उपादधात् तच् छिरो ऽभवत् सा प्राची दिग् यां दक्षिणत उपादधात् स दक्षिणः पक्षो ऽभवत् सा दक्षिणा दिग् याम् पश्चाद् उपादधात् तत् पुच्छम् अभवत् सा प्रतीची दिग् याम् उत्तरत उपादधात्

pratiṣṭhāṃ nāvindata sa etad apāṃ kulāyam apaśyat tasminn agnim acinuta tad iyam abhavat tato vai sa praty atiṣṭhat | yām purastād upādadhāt tac chiro 'bhavat sā prācī dig yāṃ dakṣiṇata upādadhāt sa dakṣiṇaḥ pakṣo 'bhavat sā dakṣiṇā dig yām paścād upādadhāt tat puccham abhavat sā pratīcī dig yām uttarata upādadhāt

TS 5 6.4.4

स उत्तरः पक्षो ऽभवत् सोदीची दिग् याम् उपरिष्टाद् उपादधात् तत् पृष्ठम् अभवत् सोर्ध्वा दिग् इयम् वा अग्निः पञ्चेष्टकः तस्माद् यद् अस्यां खनन्त्य् अभीष्टकां तृन्दन्त्य् अभि शर्कराम् । सर्वा वा इयं वयोभ्यो नक्तं दृशे दीप्यते तस्माद् इमां वयाꣳ सि नक्तं नाध्य् आसते य एवं विद्वान् अग्निं चिनुते प्रत्य् एव

sa uttaraḥ pakṣo 'bhavat sodīcī dig yām upariṣṭād upādadhāt tat pṛṣṭham abhavat sordhvā dig iyam vā agniḥ pañceṣṭakaḥ tasmād yad asyāṃ khananty abhīṣṭakāṃ tṛndanty abhi śarkarām | sarvā vā iyaṃ vayobhyo naktaṃ dṛśe dīpyate tasmād imāṃ vayāṃ si naktaṃ nādhy āsate ya evaṃ vidvān agniṃ cinute praty eva

TS 5 6.4.5

तिष्ठत्य् अभि दिशो जयति । आग्नेयो वै ब्राह्मणः तस्माद् ब्राह्मणाय सर्वासु दिक्ष्व् अर्धुकम् । स्वाम् एव तद् दिशम् अन्व् एति । अपां वा अग्निः कुलायम् । तस्माद् आपो ऽग्निꣳ हारुकाः स्वाम् एव तद् योनिम् प्र विशन्ति ॥

tiṣṭhaty abhi diśo jayati | āgneyo vai brāhmaṇaḥ tasmād brāhmaṇāya sarvāsu dikṣv ardhukam | svām eva tad diśam anv eti | apāṃ vā agniḥ kulāyam | tasmād āpo 'gniṃ hārukāḥ svām eva tad yonim pra viśanti ||

TS 5 6.5.1

संवत्सरम् उख्यम् भृत्वा द्वितीये संवत्सर आग्नेयम् अष्टाकपालं निर् वपेद् ऐन्द्रम् एकादशकपालं वैश्वदेवं द्वादशकपालम् बार्हस्पत्यं चरुं वैष्णवं त्रिकपालम् । तृतीये संवत्सरे ऽभिजिता यजेत यद् अष्टाकपालो भवत्य् अष्टाक्षरा गायत्र्य् आग्नेयं गायत्रम् प्रातःसवनम् प्रातःसवनम् एव तेन दाधार गायत्रीं छन्दः । यद् एकादशकपालो भवत्य् एकादशाक्षरा त्रिष्टुग् ऐन्द्रं त्रैष्टुभम् माध्यंदिनꣳ सवनम् माध्यंदिनम् एव सवनं तेन दाधार त्रिष्टुभम्

saṃvatsaram ukhyam bhṛtvā dvitīye saṃvatsara āgneyam aṣṭākapālaṃ nir vaped aindram ekādaśakapālaṃ vaiśvadevaṃ dvādaśakapālam bārhaspatyaṃ caruṃ vaiṣṇavaṃ trikapālam | tṛtīye saṃvatsare 'bhijitā yajeta yad aṣṭākapālo bhavaty aṣṭākṣarā gāyatry āgneyaṃ gāyatram prātaḥsavanam prātaḥsavanam eva tena dādhāra gāyatrīṃ chandaḥ | yad ekādaśakapālo bhavaty ekādaśākṣarā triṣṭug aindraṃ traiṣṭubham mādhyaṃdinaṃ savanam mādhyaṃdinam eva savanaṃ tena dādhāra triṣṭubham

TS 5 6.5.2

छन्दः । यद् द्वादशकपालो भवति द्वादशाक्षरा जगती वैश्वदेवं जागतं तृतीयसवनम् । तृतीयसवनम् एव तेन दाधार जगतीं छन्दः । यद् बार्हस्पत्यश् चरुर् भवति ब्रह्म वै देवानाम् बृहस्पतिः । ब्रह्मैव तेन दाधार यद् वैष्णवस् त्रिकपालो भवति यज्ञो वै विष्णुः । यज्ञम् एव तेन दाधार यत् तृतीये संवत्सरे ऽभिजिता यजते ऽभिजित्यै यत् संवत्सरम् उख्यम् बिभर्तीमम् एव

chandaḥ | yad dvādaśakapālo bhavati dvādaśākṣarā jagatī vaiśvadevaṃ jāgataṃ tṛtīyasavanam | tṛtīyasavanam eva tena dādhāra jagatīṃ chandaḥ | yad bārhaspatyaś carur bhavati brahma vai devānām bṛhaspatiḥ | brahmaiva tena dādhāra yad vaiṣṇavas trikapālo bhavati yajño vai viṣṇuḥ | yajñam eva tena dādhāra yat tṛtīye saṃvatsare 'bhijitā yajate 'bhijityai yat saṃvatsaram ukhyam bibhartīmam eva

TS 5 6.5.3

तेन लोकꣳ स्पृणोति यद् द्वितीये संवत्सरे ऽग्निं चिनुते ऽन्तरिक्षम् एव तेन स्पृणोति यत् तृतीये संवत्सरे यजते ऽमुम् एव तेन लोकꣳ स्पृणोति । एतं वै पर आट्णारः कक्षीवाꣳ औशिजो वीतहव्यः श्रायसस् त्रसदस्युः पौरुकुत्स्यः प्रजाकामा अचिन्वत ततो वै ते सहस्रꣳ सहस्रम् पुत्रान् अविन्दन्त प्रथते प्रजया पशुभिस् ताम् मात्राम् आप्नोति यां ते ऽगच्छन् य एवं विद्वान् अग्निं चिनुते ॥

tena lokaṃ spṛṇoti yad dvitīye saṃvatsare 'gniṃ cinute 'ntarikṣam eva tena spṛṇoti yat tṛtīye saṃvatsare yajate 'mum eva tena lokaṃ spṛṇoti | etaṃ vai para āṭṇāraḥ kakṣīvāṃ auśijo vītahavyaḥ śrāyasas trasadasyuḥ paurukutsyaḥ prajākāmā acinvata tato vai te sahasraṃ sahasram putrān avindanta prathate prajayā paśubhis tām mātrām āpnoti yāṃ te 'gacchan ya evaṃ vidvān agniṃ cinute ||

TS 5 6.6.1

प्रजापतिर् अग्निम् अचिनुत स क्षुरपविर् भूत्वातिष्ठत् तं देवा बिभ्यतो नोपायन् ते छन्दोभिर् आत्मानं छादयित्वोपायन् तच् छन्दसां छन्दस्त्वम् ब्रह्म वै छन्दाꣳ सि ब्रह्मण एतद् रूपं यत् कृष्णाजिनम् । कार्ष्णी उपानहाव् उप मुञ्चते छन्दोभिर् एवात्मानं छादयित्वाग्निम् उप चरत्य् आत्मनो ऽहिꣳ सायै देवनिधिर् वा एष नि धीयते यद् अग्निः ॥

prajāpatir agnim acinuta sa kṣurapavir bhūtvātiṣṭhat taṃ devā bibhyato nopāyan te chandobhir ātmānaṃ chādayitvopāyan tac chandasāṃ chandastvam brahma vai chandāṃ si brahmaṇa etad rūpaṃ yat kṛṣṇājinam | kārṣṇī upānahāv upa muñcate chandobhir evātmānaṃ chādayitvāgnim upa caraty ātmano 'hiṃ sāyai devanidhir vā eṣa ni dhīyate yad agniḥ ||

TS 5 6.6.2

अन्ये वा वै निधिम् अगुप्तं विन्दन्ति न वा प्रति प्र जानाति । उखाम् आ क्रामत्य् आत्मानम् एवाधिपां कुरुते गुप्त्यै । अथो खल्व् आहुः । नाक्रम्येति नैर्ऋत्य् उखा यद् आक्रामेन् निर्ऋत्या आत्मानम् अपि दध्यात् तस्मान् नाक्रम्या पुरुषशीर्षम् उप दधाति गुप्त्यै । अथो यथा ब्रूयात् । एतन् मे गोपायेति तादृग् एव तत् ॥

anye vā vai nidhim aguptaṃ vindanti na vā prati pra jānāti | ukhām ā krāmaty ātmānam evādhipāṃ kurute guptyai | atho khalv āhuḥ | nākramyeti nairṛty ukhā yad ākrāmen nirṛtyā ātmānam api dadhyāt tasmān nākramyā puruṣaśīrṣam upa dadhāti guptyai | atho yathā brūyāt | etan me gopāyeti tādṛg eva tat ||

TS 5 6.6.3

प्रजापतिर् वा अथर्वा । अग्निर् एव दध्यङ्ङ् आथर्वणस् तस्येष्टका अस्थानि । एतꣳ ह वाव तद् ऋषिर् अभ्यनूवाच । इन्द्रो दधीचो अस्थभिर् इति यद् इष्टकाभिर् अग्निं चिनोति सात्मानम् एवाग्निं चिनुते सात्मामुष्मिँल्लोके भवति य एवं वेद शरीरं वा एतद् अग्नेर् यच् चित्य आत्मा वैश्वानरः । यच् चिते वैश्वानरं जुहोति शरीरम् एव सꣳ स्कृत्य

prajāpatir vā atharvā | agnir eva dadhyaṅṅ ātharvaṇas tasyeṣṭakā asthāni | etaṃ ha vāva tad ṛṣir abhyanūvāca | indro dadhīco asthabhir iti yad iṣṭakābhir agniṃ cinoti sātmānam evāgniṃ cinute sātmāmuṣmiṃlloke bhavati ya evaṃ veda śarīraṃ vā etad agner yac citya ātmā vaiśvānaraḥ | yac cite vaiśvānaraṃ juhoti śarīram eva saṃ skṛtya

TS 5 6.6.4

अभ्यारोहति शरीरं वा एतद् यजमानः सꣳ स् कुरुते यद् अग्निं चिनुते यच् चिते वैश्वानरं जुहोति शरीरम् एव सꣳ स्कृत्यात्मनाभ्यारोहति तस्मात् तस्य नावद्यन्ति जीवन्न् एव देवान् अप्य् एति वैश्वानर्यर्चा पुरीषम् उप दधाति । इयं वा अग्निर् वैश्वानरस् तस्यैषा चितिर् यत् पुरीषम् अग्निम् एव वैश्वानरं चिनुते । एषा वा अग्नेः प्रिया तनूर् यद् वैश्वानरः प्रियाम् एवास्य तनुवम् अव रुन्द्धे ॥

abhyārohati śarīraṃ vā etad yajamānaḥ saṃ s kurute yad agniṃ cinute yac cite vaiśvānaraṃ juhoti śarīram eva saṃ skṛtyātmanābhyārohati tasmāt tasya nāvadyanti jīvann eva devān apy eti vaiśvānaryarcā purīṣam upa dadhāti | iyaṃ vā agnir vaiśvānaras tasyaiṣā citir yat purīṣam agnim eva vaiśvānaraṃ cinute | eṣā vā agneḥ priyā tanūr yad vaiśvānaraḥ priyām evāsya tanuvam ava runddhe ||

TS 5 6.7.1

अग्नेर् वै दीक्षया देवा विराजम् आप्नुवन् तिस्रो रात्रीर् दीक्षितः स्यात् त्रिपदा विराट् विराजम् आप्नोति षड् रात्रीर् दीक्षितः स्यात् षड् वा ऋतवः संवत्सरः संवत्सरो विराड् विराजम् आप्नोति दश रात्रीर् दीक्षितः स्यात् । दशाक्षरा विराड् विराजम् आप्नोति द्वादश रात्रीर् दीक्षितः स्यात् । द्वादश मासाः संवत्सरः संवत्सरो विराड् विराजम् आप्नोति त्रयोदश रात्रीर् दीक्षितः स्यात् त्रयोदश

agner vai dīkṣayā devā virājam āpnuvan tisro rātrīr dīkṣitaḥ syāt tripadā virāṭ virājam āpnoti ṣaḍ rātrīr dīkṣitaḥ syāt ṣaḍ vā ṛtavaḥ saṃvatsaraḥ saṃvatsaro virāḍ virājam āpnoti daśa rātrīr dīkṣitaḥ syāt | daśākṣarā virāḍ virājam āpnoti dvādaśa rātrīr dīkṣitaḥ syāt | dvādaśa māsāḥ saṃvatsaraḥ saṃvatsaro virāḍ virājam āpnoti trayodaśa rātrīr dīkṣitaḥ syāt trayodaśa

TS 5 6.7.2

मासाः संवत्सरः॥ संवत्सरो विराड् पञ्चदश रात्रीर् दीक्षितः स्यात् पञ्चदश वा अर्धमासस्य रात्रयः । अर्धमासशः संवत्सर आप्यते संवत्सरो विराड् विराजम् आप्नोति सप्तदश रात्रीर् दीक्षितः स्यात् । द्वादश मासाः पञ्चर्तवः स संवत्सरः संवत्सरो विराड् विराजम् आप्नोति चतुर्विꣳ शतिꣳ रात्रीर् दीक्षितः स्यात् । चतुर्विꣳ शतिर् अर्धमासाः संवत्सरः संवत्सरो विराड् विराजम् आप्नोति त्रिꣳ शतꣳ रात्रीर् दीक्षितः स्यात् ॥

māsāḥ saṃvatsaraḥ|| saṃvatsaro virāḍ pañcadaśa rātrīr dīkṣitaḥ syāt pañcadaśa vā ardhamāsasya rātrayaḥ | ardhamāsaśaḥ saṃvatsara āpyate saṃvatsaro virāḍ virājam āpnoti saptadaśa rātrīr dīkṣitaḥ syāt | dvādaśa māsāḥ pañcartavaḥ sa saṃvatsaraḥ saṃvatsaro virāḍ virājam āpnoti caturviṃ śatiṃ rātrīr dīkṣitaḥ syāt | caturviṃ śatir ardhamāsāḥ saṃvatsaraḥ saṃvatsaro virāḍ virājam āpnoti triṃ śataṃ rātrīr dīkṣitaḥ syāt ||

TS 5 6.7.3

त्रिꣳ शदक्षरा विराड् विराजम् आप्नोति मासं दीक्षितः स्यात् । यो मासः स संवत्सरः संवत्सरो विराड् विराजम् आप्नोति चतुरो मासो दीक्षितः स्यात् । चतुरो वा एतम् मासो वसवो ऽबिभरुस् ते पृथिवीम् आऽजयन् गायत्रीं छन्दः । अष्टौ रुद्रास् ते ऽन्तरिक्षम् आऽजयन् त्रिष्टुभं छन्दः । द्वादशादित्यास् ते दिवम् आऽजयञ् जगतीं छन्दस् ततो वै ते व्यावृतम् अगच्छञ् छ्रैष्ठ्यं देवानाम् । तस्माद् द्वादश मासो भृत्वाग्निं चिन्वीत द्वादश मासाः संवत्सरः संवत्सरो ऽग्निश् चित्यस् तस्याहोरात्राणीष्टकाः । आप्तेष्टकम् एनं चिनुते ऽथो व्यावृतम् एव गच्छति श्रैष्ठ्यꣳ समानानाम् ॥

triṃ śadakṣarā virāḍ virājam āpnoti māsaṃ dīkṣitaḥ syāt | yo māsaḥ sa saṃvatsaraḥ saṃvatsaro virāḍ virājam āpnoti caturo māso dīkṣitaḥ syāt | caturo vā etam māso vasavo 'bibharus te pṛthivīm ā'jayan gāyatrīṃ chandaḥ | aṣṭau rudrās te 'ntarikṣam ā'jayan triṣṭubhaṃ chandaḥ | dvādaśādityās te divam ā'jayañ jagatīṃ chandas tato vai te vyāvṛtam agacchañ chraiṣṭhyaṃ devānām | tasmād dvādaśa māso bhṛtvāgniṃ cinvīta dvādaśa māsāḥ saṃvatsaraḥ saṃvatsaro 'gniś cityas tasyāhorātrāṇīṣṭakāḥ | āpteṣṭakam enaṃ cinute 'tho vyāvṛtam eva gacchati śraiṣṭhyaṃ samānānām ||

TS 5 6.8.1

सुवर्गाय वा एष लोकाय चीयते यद् अग्निस् तं यन् नान्वारोहेत् सुवर्गाल् लोकाद् यजमानो हीयेत पृथिवीम् आक्रमिषम् प्राणो मा मा हासीत् । अन्तरिक्षम् आक्रमिषम् प्रजा मा मा हासीत् । दिवम् आक्रमिषꣳ सुवर् अगन्म । इत्य् आह । एष वा अग्नेर् अन्वारोहस् तेनैवैनम् अन्वारोहति सुवर्गस्य लोकस्य समष्ट्यै यत् पक्षसम्मिताम् मिनुयात् ।

suvargāya vā eṣa lokāya cīyate yad agnis taṃ yan nānvārohet suvargāl lokād yajamāno hīyeta pṛthivīm ākramiṣam prāṇo mā mā hāsīt | antarikṣam ākramiṣam prajā mā mā hāsīt | divam ākramiṣaṃ suvar aganma | ity āha | eṣa vā agner anvārohas tenaivainam anvārohati suvargasya lokasya samaṣṭyai yat pakṣasammitām minuyāt |

TS 5 6.8.2

कनीयाꣳ सं यज्ञक्रतुम् उपेयात् पापीयस्य् अस्यात्मनः प्रजा स्यात् । वेदिसम्मिताम् मिनोति ज्यायाꣳ सम् एव यज्ञक्रतुम् उपैति नास्यात्मनः पापीयसी प्रजा भवति साहस्रं चिन्वीत प्रथमं चिन्वानः सहस्रसम्मितो वा अयं लोकः । इमम् एव लोकम् अभि जयति द्विषाहस्रं चिन्वीत द्वितीयं चिन्वानः । द्विषाहस्रं वा अन्तरिक्षम् अन्तरिक्षम् एवाभि जयति त्रिषाहस्रं चिन्वीत तृतीयं चिन्वानः ॥

kanīyāṃ saṃ yajñakratum upeyāt pāpīyasy asyātmanaḥ prajā syāt | vedisammitām minoti jyāyāṃ sam eva yajñakratum upaiti nāsyātmanaḥ pāpīyasī prajā bhavati sāhasraṃ cinvīta prathamaṃ cinvānaḥ sahasrasammito vā ayaṃ lokaḥ | imam eva lokam abhi jayati dviṣāhasraṃ cinvīta dvitīyaṃ cinvānaḥ | dviṣāhasraṃ vā antarikṣam antarikṣam evābhi jayati triṣāhasraṃ cinvīta tṛtīyaṃ cinvānaḥ ||

TS 5 6.8.3

त्रिषाहस्रो वा असौ लोको ऽमुम् एव लोकम् अभि जयति जानुदघ्नं चिन्वीत प्रथमं चिन्वानः । गायत्रियैवेमं लोकम् अभ्यारोहति नाभिदघ्नं चिन्वीत द्वितीयं चिन्वानस् त्रिष्टुभैवान्तरिक्षम् अभ्यारोहति ग्रीवदघ्नं चिन्वीत तृतीयं चिन्वानः । जगत्यैवामुं लोकम् अभ्यारोहति नाग्निं चित्वा रामाम् उपेयाद् अयोनौ रेतो धास्यामीति न द्वितीयं चित्वान्यस्य स्त्रियम्

triṣāhasro vā asau loko 'mum eva lokam abhi jayati jānudaghnaṃ cinvīta prathamaṃ cinvānaḥ | gāyatriyaivemaṃ lokam abhyārohati nābhidaghnaṃ cinvīta dvitīyaṃ cinvānas triṣṭubhaivāntarikṣam abhyārohati grīvadaghnaṃ cinvīta tṛtīyaṃ cinvānaḥ | jagatyaivāmuṃ lokam abhyārohati nāgniṃ citvā rāmām upeyād ayonau reto dhāsyāmīti na dvitīyaṃ citvānyasya striyam

TS 5 6.8.4

उपेयात् । न तृतीयं चित्वा कां चनोपेयात् । रेतो वा एतन् नि धत्ते यद् अग्निं चिनुते यद् उपेयाद् रेतसा व्यृध्येत । अथो खल्व् आहुः । अप्रजस्यं तद् यन् नोपेयाद् इति यद् रेतःसिचाव् उपदधाति ते एव यजमानस्य रेतो बिभृतस् तस्माद् उपेयाद् रेतसो ऽस्कन्दाय त्रीणि वाव रेताꣳ सि पिता पुत्रः पौत्रः ॥

upeyāt | na tṛtīyaṃ citvā kāṃ canopeyāt | reto vā etan ni dhatte yad agniṃ cinute yad upeyād retasā vyṛdhyeta | atho khalv āhuḥ | aprajasyaṃ tad yan nopeyād iti yad retaḥsicāv upadadhāti te eva yajamānasya reto bibhṛtas tasmād upeyād retaso 'skandāya trīṇi vāva retāṃ si pitā putraḥ pautraḥ ||

TS 5 6.8.5

यद् द्वे रेतःसिचाव् उपदध्याद् रेतो ऽस्य वि छिन्द्यात् तिस्र उप दधाति रेतसः संतत्यै । इयं वाव प्रथमा रेतःसिग् वाग् वा इयं तस्मात् पश्यन्तीमाम् पश्यन्ति वाचं वदन्तीम् अन्तरिक्षं द्वितीया प्राणो वा अन्तरिक्षं तस्मान् नान्तरिक्षम् पश्यन्ति न प्राणम् असौ तृतीया चक्षुर् वा असौ तस्मात् पश्यन्त्य् अमूम् पश्यन्ति चक्षुः । यजुषेमां च

yad dve retaḥsicāv upadadhyād reto 'sya vi chindyāt tisra upa dadhāti retasaḥ saṃtatyai | iyaṃ vāva prathamā retaḥsig vāg vā iyaṃ tasmāt paśyantīmām paśyanti vācaṃ vadantīm antarikṣaṃ dvitīyā prāṇo vā antarikṣaṃ tasmān nāntarikṣam paśyanti na prāṇam asau tṛtīyā cakṣur vā asau tasmāt paśyanty amūm paśyanti cakṣuḥ | yajuṣemāṃ ca

TS 5 6.8.6

अमूंचोप दधाति मनसा मध्यमाम् एषां लोकानां क्लृप्त्यै । अथो प्राणानाम् इष्टो यज्ञो भृगुभिर् आशीर्दा वसुभिस् तस्य त इष्टस्य वीतस्य द्रविणेह भक्षीयेत्य् आह स्तुतशस्त्रे एवैतेन दुहे पिता मातरिश्वाऽछिद्रा पदा धा अछिद्रा उशिजः पदाऽनु तक्षुः सोमो विश्वविन् नेता नेषद् बृहस्पतिर् उक्थामदानि शꣳ सिषद् इत्य् आह । एतद् वा अग्नेर् उक्थम् । तेनैवैनम् अनु शꣳ सति ॥

amūṃcopa dadhāti manasā madhyamām eṣāṃ lokānāṃ klṛptyai | atho prāṇānām iṣṭo yajño bhṛgubhir āśīrdā vasubhis tasya ta iṣṭasya vītasya draviṇeha bhakṣīyety āha stutaśastre evaitena duhe pitā mātariśvā'chidrā padā dhā achidrā uśijaḥ padā'nu takṣuḥ somo viśvavin netā neṣad bṛhaspatir ukthāmadāni śaṃ siṣad ity āha | etad vā agner uktham | tenaivainam anu śaṃ sati ||

TS 5 6.9.1

सूयते वा एषो ऽग्नीनां य उखायाम् भ्रियते यद् अधः सादयेद् गर्भाः प्रपादुकाः स्युः । अथो यथा सवात् प्रत्यवरोहति तादृग् एव तत् । आसन्दी सादयति गर्भाणां धृत्या अप्रपादाय । अथो सवम् एवैनं करोति गर्भो वा एष यद् उख्यो योनिः शिक्यम् । यच् छिक्याद् उखां निरूहेद् योनेर् गर्भं निर् हण्यात् षड्उद्यामꣳ शिक्यम् भवति षोढाविहितो वै

sūyate vā eṣo 'gnīnāṃ ya ukhāyām bhriyate yad adhaḥ sādayed garbhāḥ prapādukāḥ syuḥ | atho yathā savāt pratyavarohati tādṛg eva tat | āsandī sādayati garbhāṇāṃ dhṛtyā aprapādāya | atho savam evainaṃ karoti garbho vā eṣa yad ukhyo yoniḥ śikyam | yac chikyād ukhāṃ nirūhed yoner garbhaṃ nir haṇyāt ṣaḍudyāmaṃ śikyam bhavati ṣoḍhāvihito vai

TS 5 6.9.2

पुरुष आत्मा च शिरश् च चत्वार्य् अङ्गानि । आत्मन्न् एवैनम् बिभर्ति प्रजापतिर् वा एष यद् अग्निस् तस्योखा चोलूखलं च स्तनौ ताव् अस्य प्रजा उप जीवन्ति यद् उखां चोलूखलं चोपदधाति ताभ्याम् एव यजमानो ऽमुष्मिँल्लोके ऽग्निं दुहे संवत्सरो वा एष यद् अग्निस् तस्य त्रेधाविहिता इष्टकाः प्राजापत्या वैष्णवीः ॥

puruṣa ātmā ca śiraś ca catvāry aṅgāni | ātmann evainam bibharti prajāpatir vā eṣa yad agnis tasyokhā colūkhalaṃ ca stanau tāv asya prajā upa jīvanti yad ukhāṃ colūkhalaṃ copadadhāti tābhyām eva yajamāno 'muṣmiṃlloke 'gniṃ duhe saṃvatsaro vā eṣa yad agnis tasya tredhāvihitā iṣṭakāḥ prājāpatyā vaiṣṇavīḥ ||

TS 5 6.9.3

वैश्वकर्मणीः । अहोरात्राण्य् एवास्य प्राजापत्याः । यद् उख्यम् बिभर्ति प्राजापत्या एव तद् उप धत्ते यत् समिध आदधाति वैष्णवा वै वनस्पतयः । वैष्णवीर् एव तद् उप धत्ते यद् इष्टकाभिर् अग्निं चिनोतीयं वै विश्वकर्मा वैश्वकर्मणीर् एव तद् उप धत्ते तस्माद् आहुस् त्रिवृद् अग्निर् इति तं वा एतं यजमान एव चिन्वीत यद् अस्यान्यश् चिनुयाद् यत् तं दक्षिणाभिर् न राधयेद् अग्निम् अस्य वृञ्जीत यो ऽस्याग्निं चिनुयात् तं दक्षिणाभी राधयेत् । अग्निम् एव तत् स्पृणोति ॥

vaiśvakarmaṇīḥ | ahorātrāṇy evāsya prājāpatyāḥ | yad ukhyam bibharti prājāpatyā eva tad upa dhatte yat samidha ādadhāti vaiṣṇavā vai vanaspatayaḥ | vaiṣṇavīr eva tad upa dhatte yad iṣṭakābhir agniṃ cinotīyaṃ vai viśvakarmā vaiśvakarmaṇīr eva tad upa dhatte tasmād āhus trivṛd agnir iti taṃ vā etaṃ yajamāna eva cinvīta yad asyānyaś cinuyād yat taṃ dakṣiṇābhir na rādhayed agnim asya vṛñjīta yo 'syāgniṃ cinuyāt taṃ dakṣiṇābhī rādhayet | agnim eva tat spṛṇoti ||

TS 5 6.10.1

प्रजापतिर् अग्निम् अचिनुतर्तुभिः संवत्सरम् । वसन्तेनैवास्य पूर्वार्धम् अचिनुत ग्रीष्मेण दक्षिणम् पक्षम् । वर्षाभिः पुच्छम् । शरदोत्तरम् पक्षम् । हेमन्तेन मध्यम् ब्रह्मणा वा अस्य तत् पूर्वार्धम् अचिनुत क्षत्रेण दक्षिणम् पक्षम् पशुभिः पुच्छम् । विशोत्तरम् पक्षम् आशया मध्यम् । य एवं विद्वान् अग्निं चिनुत ऋतुभिर् एवैनं चिनुते । अथो एतद् एव सर्वम् अव

prajāpatir agnim acinutartubhiḥ saṃvatsaram | vasantenaivāsya pūrvārdham acinuta grīṣmeṇa dakṣiṇam pakṣam | varṣābhiḥ puccham | śaradottaram pakṣam | hemantena madhyam brahmaṇā vā asya tat pūrvārdham acinuta kṣatreṇa dakṣiṇam pakṣam paśubhiḥ puccham | viśottaram pakṣam āśayā madhyam | ya evaṃ vidvān agniṃ cinuta ṛtubhir evainaṃ cinute | atho etad eva sarvam ava

TS 5 6.10.2

रुन्द्धे शृण्वन्त्य् एनम् अग्निं चिक्यानम् अत्त्य् अन्नम् । रोचते । इयं वाव प्रथमा चितिर् ओषधयो वनस्पतयः पुरीषम् अन्तरिक्षं द्वितीया वयाꣳ सि पुरीषम् असौ तृतीया नक्षत्राणि पुरीषम् । यज्ञश् चतुर्थी दक्षिणा पुरीषम् । यजमानः पञ्चमी प्रजा पुरीषम् । यत् त्रिचितीकं चिन्वीत यज्ञं दक्षिणाम् आत्मानम् प्रजाम् अन्तर् इयात् तस्मात् पञ्चचितीकश् चेतव्यः । एतद् एव सर्वꣳ स्पृणोति यत् तिस्रश् चितयः ॥

runddhe śṛṇvanty enam agniṃ cikyānam atty annam | rocate | iyaṃ vāva prathamā citir oṣadhayo vanaspatayaḥ purīṣam antarikṣaṃ dvitīyā vayāṃ si purīṣam asau tṛtīyā nakṣatrāṇi purīṣam | yajñaś caturthī dakṣiṇā purīṣam | yajamānaḥ pañcamī prajā purīṣam | yat tricitīkaṃ cinvīta yajñaṃ dakṣiṇām ātmānam prajām antar iyāt tasmāt pañcacitīkaś cetavyaḥ | etad eva sarvaṃ spṛṇoti yat tisraś citayaḥ ||

TS 5 6.10.3

त्रिवृद् ध्य् अग्निः । यद् द्वे द्विपाद् यजमानः प्रतिष्ठित्यै पञ्च चितयो भवन्ति पाङ्क्तः पुरुषः । आत्मानम् एव स्पृणोति पञ्च चितयो भवन्ति पञ्चभिः पुरीषैर् अभ्य् ऊहति दश सम् पद्यन्ते दशाक्षरो वै पुरुषः । यावान् एव पुरुषस् तꣳ स्पृणोति । अथो दशाक्षरा विराड् अन्नं विराड् विराज्य् एवान्नाद्ये प्रति तिष्ठति संवत्सरो वै षष्ठी चितिः । ऋतवः पुरीषम् । षट् चितयो भवन्ति षट् पुरीषाणि द्वादश सम् पद्यन्ते द्वादश मासाः संवत्सरः संवत्सर एव प्रति तिष्ठति ॥

trivṛd dhy agniḥ | yad dve dvipād yajamānaḥ pratiṣṭhityai pañca citayo bhavanti pāṅktaḥ puruṣaḥ | ātmānam eva spṛṇoti pañca citayo bhavanti pañcabhiḥ purīṣair abhy ūhati daśa sam padyante daśākṣaro vai puruṣaḥ | yāvān eva puruṣas taṃ spṛṇoti | atho daśākṣarā virāḍ annaṃ virāḍ virājy evānnādye prati tiṣṭhati saṃvatsaro vai ṣaṣṭhī citiḥ | ṛtavaḥ purīṣam | ṣaṭ citayo bhavanti ṣaṭ purīṣāṇi dvādaśa sam padyante dvādaśa māsāḥ saṃvatsaraḥ saṃvatsara eva prati tiṣṭhati ||

TS 5 6.11.1

रोहितो धूम्ररोहितः कर्कन्धुरोहितस् ते प्राजापत्याः । बभ्रुर् अरुणबभ्रुः शुकबभ्रुस् ते रौद्राः श्येतः श्येताक्षः श्येतग्रीवस् ते पितृदेवत्यास् तिस्रः कृष्णा वशा वारुण्यस् तिस्रः श्वेता वशाः सौर्यः । मैत्राबार्हस्पत्या धूम्रललामास् तूपराः ॥

rohito dhūmrarohitaḥ karkandhurohitas te prājāpatyāḥ | babhrur aruṇababhruḥ śukababhrus te raudrāḥ śyetaḥ śyetākṣaḥ śyetagrīvas te pitṛdevatyās tisraḥ kṛṣṇā vaśā vāruṇyas tisraḥ śvetā vaśāḥ sauryaḥ | maitrābārhaspatyā dhūmralalāmās tūparāḥ ||

TS 5 6.12.1

पृश्निस् तिरश्चीनपृश्निर् ऊर्ध्वपृश्निस् ते मारुताः फल्गूर् लोहितोर्णी बलक्षी ताः सारस्वत्यः पृषती स्थूलपृषती क्षुद्रपृषती ता वैश्वदेव्यस् तिस्रः श्यामा वशाः पौष्णियस् तिस्रो रोहिणीर् वशा मैत्रियः । ऐन्द्राबार्हस्पत्या अरुणललामास् तूपराः ॥

pṛśnis tiraścīnapṛśnir ūrdhvapṛśnis te mārutāḥ phalgūr lohitorṇī balakṣī tāḥ sārasvatyaḥ pṛṣatī sthūlapṛṣatī kṣudrapṛṣatī tā vaiśvadevyas tisraḥ śyāmā vaśāḥ pauṣṇiyas tisro rohiṇīr vaśā maitriyaḥ | aindrābārhaspatyā aruṇalalāmās tūparāḥ ||

TS 5 6.13.1

शितिबाहुर् अन्यतःशितिबाहुः समन्तशितिबाहुस् त ऐन्द्रवायवाः शितिरन्ध्रो ऽन्यतःशितिरन्ध्रः समन्तशितिरन्ध्रस् ते मैत्रावरुणाः शुद्धवालः सर्वशुद्धवालो मणिवालस् त आश्विनास् तिस्रः शिल्पा वशा वैश्वदेव्यस् तिस्रः श्येनीः परमेष्ठिने सोमापौष्णाः श्यामललामास् तूपराः ॥

śitibāhur anyataḥśitibāhuḥ samantaśitibāhus ta aindravāyavāḥ śitirandhro 'nyataḥśitirandhraḥ samantaśitirandhras te maitrāvaruṇāḥ śuddhavālaḥ sarvaśuddhavālo maṇivālas ta āśvinās tisraḥ śilpā vaśā vaiśvadevyas tisraḥ śyenīḥ parameṣṭhine somāpauṣṇāḥ śyāmalalāmās tūparāḥ ||

TS 5 6.14.1

उन्नत ऋषभो वामनस् त ऐन्द्रावरुणाः शितिककुच् छितिपृष्ठः शितिभसत् त ऐन्द्राबार्हस्पत्याः शितिपाच् छित्योष्ठः शितिभ्रुस् त ऐन्द्रावैष्णवास् तिस्रः सिध्मा वशा वैश्वकर्मण्यस् तिस्रो धात्रे पृषोदरा ऐन्द्रापौष्णाः श्येतललामास् तूपराः ॥

unnata ṛṣabho vāmanas ta aindrāvaruṇāḥ śitikakuc chitipṛṣṭhaḥ śitibhasat ta aindrābārhaspatyāḥ śitipāc chityoṣṭhaḥ śitibhrus ta aindrāvaiṣṇavās tisraḥ sidhmā vaśā vaiśvakarmaṇyas tisro dhātre pṛṣodarā aindrāpauṣṇāḥ śyetalalāmās tūparāḥ ||

TS 5 6.15.1

कर्णास् त्रयो यामाः सौम्यास् त्रयः श्वितिंगा अग्नये यविष्ठाय त्रयो नकुलास् तिस्रो रोहिणीस् त्र्यव्यस् ता वसूनाम् । तिस्रो ऽरुणा दित्यौह्यस् ता रुद्राणाम् । सोमैन्द्रा बभ्रुललामास् तूपराः ॥

karṇās trayo yāmāḥ saumyās trayaḥ śvitiṃgā agnaye yaviṣṭhāya trayo nakulās tisro rohiṇīs tryavyas tā vasūnām | tisro 'ruṇā dityauhyas tā rudrāṇām | somaindrā babhrulalāmās tūparāḥ ||

TS 5 6.16.1

शुण्ठास् त्रयो वैष्णवाः । अधीलोधकर्णास् त्रयो विष्णव उरुक्रमाय लप्सुदिनस् त्रयो विष्णव उरुगायाय पञ्चावीस् तिस्र आदित्यानाम् । त्रिवत्सास् तिस्रो ऽङ्गिरसाम् ऐन्द्रावैष्णवा गौरललामास् तूपराः ॥

śuṇṭhās trayo vaiṣṇavāḥ | adhīlodhakarṇās trayo viṣṇava urukramāya lapsudinas trayo viṣṇava urugāyāya pañcāvīs tisra ādityānām | trivatsās tisro 'ṅgirasām aindrāvaiṣṇavā gauralalāmās tūparāḥ ||

TS 5 6.17.1

इन्द्राय राज्ञे त्रयः शितिपृष्ठाः । इन्द्रायाधिराजाय त्रयः शितिककुदः । इन्द्राय स्वराज्ञे त्रयः शितिभसदस् तिस्रस् तुर्यौह्यः साध्यानाम् । तिस्रः पष्ठौह्यो विश्वेषां देवानाम् आग्नेन्द्राः कृष्णललामास् तूपराः ॥

indrāya rājñe trayaḥ śitipṛṣṭhāḥ | indrāyādhirājāya trayaḥ śitikakudaḥ | indrāya svarājñe trayaḥ śitibhasadas tisras turyauhyaḥ sādhyānām | tisraḥ paṣṭhauhyo viśveṣāṃ devānām āgnendrāḥ kṛṣṇalalāmās tūparāḥ ||

TS 5 6.18.1

अदित्यै त्रयो रोहितैताः । इन्द्राण्यै त्रयः कृष्णैताः कुह्वै त्रयो ऽरुणैतास् तिस्रो धेनवो राकायै त्रयो ऽनड्वाहः सिनीवाल्याः । आग्नावैष्णवा रोहितललामास् तूपराः ॥

adityai trayo rohitaitāḥ | indrāṇyai trayaḥ kṛṣṇaitāḥ kuhvai trayo 'ruṇaitās tisro dhenavo rākāyai trayo 'naḍvāhaḥ sinīvālyāḥ | āgnāvaiṣṇavā rohitalalāmās tūparāḥ ||

TS 5 6.19.1

सौम्यास् त्रयः पिशंगाः सोमाय राज्ञे त्रयः सारंगाः पार्जन्या नभोरूपास् तिस्रो ऽजा मल्हा इन्द्राण्यै तिस्रो मेष्य आदित्याः । द्यावापृथिव्या मालंगास् तूपराः ॥

saumyās trayaḥ piśaṃgāḥ somāya rājñe trayaḥ sāraṃgāḥ pārjanyā nabhorūpās tisro 'jā malhā indrāṇyai tisro meṣya ādityāḥ | dyāvāpṛthivyā mālaṃgās tūparāḥ ||

TS 5 6.20.1

वारुणास् त्रयः कृष्णललामाः । वरुणाय राज्ञे त्रयो रोहितललामाः । वरुणाय रिशादसे त्रयो ऽरुणललामाः शिल्पास् त्रयो वैश्वदेवास् त्रयः पृश्नयः सर्वदेवत्याः । ऐन्द्रासूराः श्येतललामास् तूपराः ॥

vāruṇās trayaḥ kṛṣṇalalāmāḥ | varuṇāya rājñe trayo rohitalalāmāḥ | varuṇāya riśādase trayo 'ruṇalalāmāḥ śilpās trayo vaiśvadevās trayaḥ pṛśnayaḥ sarvadevatyāḥ | aindrāsūrāḥ śyetalalāmās tūparāḥ ||

TS 5 6.21.1

सोमाय स्वराज्ञे ऽनोवाहाव् अनड्वाहौ । इन्द्राग्निभ्याम् ओजोदाभ्याम् उष्टारौ । इन्द्राग्निभ्याम् बलदाभ्याꣳ सीरवाहाव् अवी द्वे धेनू भौमी दिग्भ्यो वडबे द्वे धेनू भौमी वैराजी पुरुषी द्वे धेनू भौमी वायव आरोहणवाहाव् अनड्वाहौ वारुणी कृष्णे वशे अराड्यौ दिव्याव् ऋषभौ परिमरौ ॥

somāya svarājñe 'novāhāv anaḍvāhau | indrāgnibhyām ojodābhyām uṣṭārau | indrāgnibhyām baladābhyāṃ sīravāhāv avī dve dhenū bhaumī digbhyo vaḍabe dve dhenū bhaumī vairājī puruṣī dve dhenū bhaumī vāyava ārohaṇavāhāv anaḍvāhau vāruṇī kṛṣṇe vaśe arāḍyau divyāv ṛṣabhau parimarau ||

TS 5 6.22.1

एकादश प्रातर् गव्याः पशव आ लभ्यन्ते छगलः कल्माषः किकिदीविर् विदीगयस् ते त्वाष्ट्राः सौरीर् नव श्वेता वशा अनूबन्ध्या भवन्ति । आग्नेय ऐन्द्राग्न आश्विनस् ते विशालयूप आ लभ्यन्ते ॥

ekādaśa prātar gavyāḥ paśava ā labhyante chagalaḥ kalmāṣaḥ kikidīvir vidīgayas te tvāṣṭrāḥ saurīr nava śvetā vaśā anūbandhyā bhavanti | āgneya aindrāgna āśvinas te viśālayūpa ā labhyante ||

TS 5 6.23.1

पिशंगास् त्रयो वासन्ताः सारंगास् त्रयो ग्रीष्माः पृषन्तस् त्रयो वार्षिकाः पृश्नयस् त्रयः शारदाः पृश्निसक्थास् त्रयो हैमन्तिकास् अवलिप्तास् त्रयः शैशिराः संवत्सराय निवक्षसः ॥

piśaṃgās trayo vāsantāḥ sāraṃgās trayo grīṣmāḥ pṛṣantas trayo vārṣikāḥ pṛśnayas trayaḥ śāradāḥ pṛśnisakthās trayo haimantikās avaliptās trayaḥ śaiśirāḥ saṃvatsarāya nivakṣasaḥ ||