← Taittiriya Samhita (Black Yajurveda) — Kanda 4

Taittiriya Samhita (Black Yajurveda) — Kanda 4 — Chapter 5

TS 4 5.1.1

नमस् ते रुद्र मन्यव उतो त इषवे नमः । नमस् ते अस्तु धन्वने बाहुभ्याम् उत ते नमः ॥ या त इषुः शिवतमा शिवम् बभूव ते धनुः । शिवा शरव्या या तव तया नो रुद्र मृडय ॥ या ते रुद्र शिवा तनूर् अघोराऽपापकाशिनी । तया नस् तनुवा शंतमया गिरिशन्ताभि चाकशीहि ॥ याम् इषुं गिरिशन्त हस्ते

namas te rudra manyava uto ta iṣave namaḥ | namas te astu dhanvane bāhubhyām uta te namaḥ || yā ta iṣuḥ śivatamā śivam babhūva te dhanuḥ | śivā śaravyā yā tava tayā no rudra mṛḍaya || yā te rudra śivā tanūr aghorā'pāpakāśinī | tayā nas tanuvā śaṃtamayā giriśantābhi cākaśīhi || yām iṣuṃ giriśanta haste

TS 4 5.1.2

बिभर्ष्य् अस्तवे । शिवां गिरित्र तां कुरु मा हिꣳसीः पुरुषं जगत् ॥ शिवेन वचसा त्वा गिरिशाच्छा वदामसि । यथा नः सर्वम् इज् जगद् अयक्ष्मꣳ सुमना असत् ॥ अध्य् अवोचद् अधिवक्ता प्रथमो दैव्यो भिषक् । अहीꣳश् च सर्वाञ् जम्भयन्त् सर्वाश् च यातु धान्यः ॥ असौ यस् ताम्रो अरुण उत बभ्रुः सुमङ्गलः । ये चेमाꣳ रुद्रा अभितो दिक्षु

bibharṣy astave | śivāṃ giritra tāṃ kuru mā hiṃsīḥ puruṣaṃ jagat || śivena vacasā tvā giriśācchā vadāmasi | yathā naḥ sarvam ij jagad ayakṣmaṃ sumanā asat || adhy avocad adhivaktā prathamo daivyo bhiṣak | ahīṃś ca sarvāñ jambhayant sarvāś ca yātu dhānyaḥ || asau yas tāmro aruṇa uta babhruḥ sumaṅgalaḥ | ye cemāṃ rudrā abhito dikṣu

TS 4 5.1.3

श्रिताः सहस्रशो ऽवैषाꣳ हेड ईमहे ॥ असौ यो ऽवसर्पति नीलग्रीवो विलोहितः । उतैनं गोपा अदृशन्न् अदृशन्न् उदहार्यः । उतैनं विश्वा भूतानि स दृष्टो मृडयाति नः ॥ नमो अस्तु नीलग्रीवाय सहस्राक्षाय मीढुषे । अथो ये अस्य सत्वानो ऽहं तेभ्यो ऽकरं नमः ॥ प्र मुञ्च धन्वनस् त्वम् उभयोर् आर्त्नियोर् ज्याम् । याश् च ते हस्त इषवः

śritāḥ sahasraśo 'vaiṣāṃ heḍa īmahe || asau yo 'vasarpati nīlagrīvo vilohitaḥ | utainaṃ gopā adṛśann adṛśann udahāryaḥ | utainaṃ viśvā bhūtāni sa dṛṣṭo mṛḍayāti naḥ || namo astu nīlagrīvāya sahasrākṣāya mīḍhuṣe | atho ye asya satvāno 'haṃ tebhyo 'karaṃ namaḥ || pra muñca dhanvanas tvam ubhayor ārtniyor jyām | yāś ca te hasta iṣavaḥ

TS 4 5.1.4

परा ता भगवो वप ॥ अवतत्य धनुस् त्वꣳ सहस्राक्ष शतेषुधे । निशीर्य शल्यानाम् मुखा शिवो नः सुमना भव ॥ विज्यं धनुः कपर्दिनो विशल्यो बाणवाꣳ उत । अनेशन्न् अस्येषव आभुर् अस्य निषङ्गथिः ॥ या ते हेतिर् मीढुष्टम हस्ते बभूव ते धनुः । तयास्मान् विश्वतस् त्वम् अयक्ष्मया परि ब्भुज ॥ नमस् ते अस्त्व् आयुधायानातताय धृष्णवे । उभाभ्याम् उत ते नमो बाहुभ्यां तव धन्वने ॥ परि ते धन्वनो हेतिर् अस्मान् वृणक्तु विश्वतः । अथो य इषुधिस् तवारे अस्मन् नि धेहि तम् ॥

parā tā bhagavo vapa || avatatya dhanus tvaṃ sahasrākṣa śateṣudhe | niśīrya śalyānām mukhā śivo naḥ sumanā bhava || vijyaṃ dhanuḥ kapardino viśalyo bāṇavāṃ uta | aneśann asyeṣava ābhur asya niṣaṅgathiḥ || yā te hetir mīḍhuṣṭama haste babhūva te dhanuḥ | tayāsmān viśvatas tvam ayakṣmayā pari bbhuja || namas te astv āyudhāyānātatāya dhṛṣṇave | ubhābhyām uta te namo bāhubhyāṃ tava dhanvane || pari te dhanvano hetir asmān vṛṇaktu viśvataḥ | atho ya iṣudhis tavāre asman ni dhehi tam ||

TS 4 5.2.1

नमो हिरण्यबाहवे सेनान्ये दिशां च पतये नमः । नमो वृक्षेभ्यो हरिकेशेभ्यः पशूनाम् पतये नमः । नमः सस्पिञ्जराय त्विषीमते पथीनाम् पतये नमः । नमो बभ्लुशाय विव्याधिने ऽन्नानाम् पतये नमः । नमो हरिकेशायोपवीतिने पुष्टानाम् पतये नमः । नमो भवस्य हेत्यै जगताम् पतये नमः । नमो रुद्रायाऽऽतताविने क्षेत्राणाम् पतये नमः । नमः सूतायाहन्त्याय वनानाम् पतये नमः । नमो

namo hiraṇyabāhave senānye diśāṃ ca pataye namaḥ | namo vṛkṣebhyo harikeśebhyaḥ paśūnām pataye namaḥ | namaḥ saspiñjarāya tviṣīmate pathīnām pataye namaḥ | namo babhluśāya vivyādhine 'nnānām pataye namaḥ | namo harikeśāyopavītine puṣṭānām pataye namaḥ | namo bhavasya hetyai jagatām pataye namaḥ | namo rudrāyā''tatāvine kṣetrāṇām pataye namaḥ | namaḥ sūtāyāhantyāya vanānām pataye namaḥ | namo

TS 4 5.2.2

रोहिताय स्थपतये वृक्षाणाम् पतये नमः । नमो मन्त्रिणे वाणिजाय कक्षाणाम् पतये नमः । नमो भुवन्तये वारिवस्कृतायौषधीनाम् पतये नमः । नम उच्चैर्घोषायाक्रन्दयते पत्तीनाम् पतये नमः । नमः कृत्स्नवीताय धावते सत्वनाम् पतये नमः ॥

rohitāya sthapataye vṛkṣāṇām pataye namaḥ | namo mantriṇe vāṇijāya kakṣāṇām pataye namaḥ | namo bhuvantaye vārivaskṛtāyauṣadhīnām pataye namaḥ | nama uccairghoṣāyākrandayate pattīnām pataye namaḥ | namaḥ kṛtsnavītāya dhāvate satvanām pataye namaḥ ||

TS 4 5.3.1

नमः सहमानाय निव्याधिन आव्याधिनीनाम् पतये नमः । नमः ककुभाय निषङ्गिणे स्तेनानाम् पतये नमः । नमो निषङ्गिण इषुधिमते तस्कराणाम् पतये नमः । नमो वञ्चते परिवञ्चते स्तायूनाम् पतये नमः । नमो निचेरवे परिचरायारण्यानाम् पतये नमः । नमः सृकाविभ्यो जिघाꣳसद्भ्यो मुष्णताम् पतये नमः । नमो ऽसिमद्भ्यो नक्तं चरद्भ्यः प्रकृन्तानाम् पतये नमः । नम उष्णीषिणे गिरिचराय कुलुञ्चानाम् पतये नमः । नमः

namaḥ sahamānāya nivyādhina āvyādhinīnām pataye namaḥ | namaḥ kakubhāya niṣaṅgiṇe stenānām pataye namaḥ | namo niṣaṅgiṇa iṣudhimate taskarāṇām pataye namaḥ | namo vañcate parivañcate stāyūnām pataye namaḥ | namo nicerave paricarāyāraṇyānām pataye namaḥ | namaḥ sṛkāvibhyo jighāṃsadbhyo muṣṇatām pataye namaḥ | namo 'simadbhyo naktaṃ caradbhyaḥ prakṛntānām pataye namaḥ | nama uṣṇīṣiṇe giricarāya kuluñcānām pataye namaḥ | namaḥ

TS 4 5.3.2

इषुमद्भ्यो धन्वाविभ्यश् च वो नमः । नम आतन्वानेभ्यः प्रतिदधानेभ्यश् च वो नमः । नम आयच्छद्भ्यो विसृजद्भ्यश् च वो नमः । नमो ऽस्यद्भ्यो विध्यद्भ्यश् च वो नमः । नम आसीनेभ्यः शयानेभ्यश् च वो नमः । नमः स्वपद्भ्यो जाग्रद्भ्यश् च वो नमः । नमस् तिष्ठद्भ्यो धावद्भ्यश् च वो नमः । नमः सभाभ्यः सभापतिभ्यश् च वो नमः । नमो अश्वेभ्यो ऽश्वपतिभ्यश् च वो नमः ॥

iṣumadbhyo dhanvāvibhyaś ca vo namaḥ | nama ātanvānebhyaḥ pratidadhānebhyaś ca vo namaḥ | nama āyacchadbhyo visṛjadbhyaś ca vo namaḥ | namo 'syadbhyo vidhyadbhyaś ca vo namaḥ | nama āsīnebhyaḥ śayānebhyaś ca vo namaḥ | namaḥ svapadbhyo jāgradbhyaś ca vo namaḥ | namas tiṣṭhadbhyo dhāvadbhyaś ca vo namaḥ | namaḥ sabhābhyaḥ sabhāpatibhyaś ca vo namaḥ | namo aśvebhyo 'śvapatibhyaś ca vo namaḥ ||

TS 4 5.4.1

नम आव्याधिनीभ्यो विविध्यन्तीभ्यश् च वो नमः । नम उगणाभ्यस् तृꣳहतीभ्यश् च वो नमः । नमो गृत्सेभ्यो गृत्सपतिभ्यश् च वो नमः । नमो व्रातेभ्यो व्रातपतिभ्यश् च वो नमः । नमो गणेभ्यो गणपतिभ्यश् च वो नमः । नमो विरूपेभ्यो विश्वरूपेभ्यश् च वो नमः । नमो महद्भ्यः क्षुल्लकेभ्यश् च वो नमः । नमो रथिभ्यो ऽरथेभ्यश् च वो नमः । नमो रथेभ्यः

TS 4 5.4.2

रथपतिभ्यश् च वो नमः । नमः सेनाभ्यः सेनानिभ्यश् च वो नमः । नमः क्षत्तृभ्यः संग्रहीतृभ्यश् च वो नमः । नमस् तक्षभ्यो रथकारेभ्यश् च वो नमः । नमः कुलालेभ्यः कर्मारेभ्यश् च वो नमः । नमः पुञ्जिष्टेभ्यो निषादेभ्यश् च वो नमः । नम इषुकृद्भ्यो धन्वकृद्भ्यश् च वो नमः । नमो मृगयुभ्यः श्वनिभ्यश् च वो नमः । नमः श्वभ्यः श्वपतिभ्यश् च वो नमः ॥

rathapatibhyaś ca vo namaḥ | namaḥ senābhyaḥ senānibhyaś ca vo namaḥ | namaḥ kṣattṛbhyaḥ saṃgrahītṛbhyaś ca vo namaḥ | namas takṣabhyo rathakārebhyaś ca vo namaḥ | namaḥ kulālebhyaḥ karmārebhyaś ca vo namaḥ | namaḥ puñjiṣṭebhyo niṣādebhyaś ca vo namaḥ | nama iṣukṛdbhyo dhanvakṛdbhyaś ca vo namaḥ | namo mṛgayubhyaḥ śvanibhyaś ca vo namaḥ | namaḥ śvabhyaḥ śvapatibhyaś ca vo namaḥ ||

TS 4 5.5.1

नमो भवाय च रुद्राय च नमः शर्वाय च पशुपतये च नमो नीलग्रीवाय च शितिकण्ठाय च नमः कपर्दिने च व्युप्तकेशाय च नमः सहस्राक्षाय च शतधन्वने च नमो गिरिशाय च शिपिविष्टाय च नमो मीढुष्टमाय चेषुमते च नमो ह्रस्वाय च वामनाय च नमो बृहते च वर्षीयसे च नमो वृद्धाय च संवृध्वने च

namo bhavāya ca rudrāya ca namaḥ śarvāya ca paśupataye ca namo nīlagrīvāya ca śitikaṇṭhāya ca namaḥ kapardine ca vyuptakeśāya ca namaḥ sahasrākṣāya ca śatadhanvane ca namo giriśāya ca śipiviṣṭāya ca namo mīḍhuṣṭamāya ceṣumate ca namo hrasvāya ca vāmanāya ca namo bṛhate ca varṣīyase ca namo vṛddhāya ca saṃvṛdhvane ca

TS 4 5.5.2

नमो अग्रियाय च प्रथमाय च नम आशवे चाजिराय च नमः शीघ्रियाय च शीभ्याय च नम ऊर्म्याय चावस्वन्याय च नमः स्रोतस्याय च द्वीप्याय च ॥

namo agriyāya ca prathamāya ca nama āśave cājirāya ca namaḥ śīghriyāya ca śībhyāya ca nama ūrmyāya cāvasvanyāya ca namaḥ srotasyāya ca dvīpyāya ca ||

TS 4 5.6.1

नमो ज्येष्ठाय च कनिष्ठाय च नमः पूर्वजाय चापरजाय च नमो मध्यमाय चापगल्भाय च नमो जघन्याय च बुध्नियाय च नमः सोभ्याय च प्रतिसर्याय च नमो याम्याय च क्षेम्याय च नम उर्वर्याय च खल्याय च नमः श्लोक्याय चावसान्याय च नमो वन्याय च कक्ष्याय च नमः श्रवाय च प्रतिश्रवाय च ॥

namo jyeṣṭhāya ca kaniṣṭhāya ca namaḥ pūrvajāya cāparajāya ca namo madhyamāya cāpagalbhāya ca namo jaghanyāya ca budhniyāya ca namaḥ sobhyāya ca pratisaryāya ca namo yāmyāya ca kṣemyāya ca nama urvaryāya ca khalyāya ca namaḥ ślokyāya cāvasānyāya ca namo vanyāya ca kakṣyāya ca namaḥ śravāya ca pratiśravāya ca ||

TS 4 5.6.2

नम आशुषेणाय चाऽऽशुरथाय च नमः शूराय चावभिन्दते च नमो वर्मिणे च वरूथिने च नमो बिल्मिने च कवचिने च नमः श्रुताय च श्रुतसेनाय च ॥

nama āśuṣeṇāya cā''śurathāya ca namaḥ śūrāya cāvabhindate ca namo varmiṇe ca varūthine ca namo bilmine ca kavacine ca namaḥ śrutāya ca śrutasenāya ca ||

TS 4 5.7.1

नमो दुन्दुभ्याय चाऽऽहनन्याय च नमो धृष्णवे च प्रमृशाय च नमो दूताय च प्रहिताय च नमो निषङ्गिणे चेषुधिमते च नमस् तीक्ष्णेषवे चायुधिने च नमः स्वायुधाय च सुधन्वने च नमः स्रुत्याय च पथ्याय च नमः काट्याय च नीप्याय च नमः सूद्याय च सरस्याय च नमो नाद्याय च वैशन्ताय च

namo dundubhyāya cā''hananyāya ca namo dhṛṣṇave ca pramṛśāya ca namo dūtāya ca prahitāya ca namo niṣaṅgiṇe ceṣudhimate ca namas tīkṣṇeṣave cāyudhine ca namaḥ svāyudhāya ca sudhanvane ca namaḥ srutyāya ca pathyāya ca namaḥ kāṭyāya ca nīpyāya ca namaḥ sūdyāya ca sarasyāya ca namo nādyāya ca vaiśantāya ca

TS 4 5.7.2

नमः कूप्याय चावट्याय च नमो वर्ष्याय चावर्ष्याय च नमो मेघ्याय च विद्युत्याय च नम ईध्रियाय चाऽऽतप्याय च नमो वात्याय च रेष्मियाय च नमो वास्तव्याय च वास्तुपाय च ॥

namaḥ kūpyāya cāvaṭyāya ca namo varṣyāya cāvarṣyāya ca namo meghyāya ca vidyutyāya ca nama īdhriyāya cā''tapyāya ca namo vātyāya ca reṣmiyāya ca namo vāstavyāya ca vāstupāya ca ||

TS 4 5.8.1

नमः सोमाय च रुद्राय च नमस् ताम्राय चारुणाय च नमः शङ्गाय च पशुपतये च नम उग्राय च भीमाय च नमो अग्रेवधाय च दूरेवधाय च नमो हन्त्रे च हनीयसे च नमो वृक्षेभ्यो हरिकेशेभ्यः । नमस् ताराय नमः शम्भवे च मयोभवे च नमः शंकराय च मयस्कराय च नमः शिवाय च शिवतराय च

namaḥ somāya ca rudrāya ca namas tāmrāya cāruṇāya ca namaḥ śaṅgāya ca paśupataye ca nama ugrāya ca bhīmāya ca namo agrevadhāya ca dūrevadhāya ca namo hantre ca hanīyase ca namo vṛkṣebhyo harikeśebhyaḥ | namas tārāya namaḥ śambhave ca mayobhave ca namaḥ śaṃkarāya ca mayaskarāya ca namaḥ śivāya ca śivatarāya ca

TS 4 5.8.2

नमस् तीर्थ्याय च कूल्याय च नमः पार्याय चावार्याय च नमः प्रतरणाय चोत्तरणाय च नम आतार्याय चाऽऽलाद्याय च नमः शष्प्याय च फेन्याय च नमः सिकत्याय च प्रवाह्याय च ॥

namas tīrthyāya ca kūlyāya ca namaḥ pāryāya cāvāryāya ca namaḥ prataraṇāya cottaraṇāya ca nama ātāryāya cā''lādyāya ca namaḥ śaṣpyāya ca phenyāya ca namaḥ sikatyāya ca pravāhyāya ca ||

TS 4 5.9.1

नम इरिण्याय च प्रपथ्याय च नमः किꣳशिलाय च क्षयणाय च नमः कपर्दिने च पुलस्तये च नमो गोष्ठ्याय च गृह्याय च नमस् तल्प्याय च गेह्याय च नमः काट्याय च गह्वरेष्ठाय च नमो ह्रदय्याय च निवेष्प्याय च नमः पाꣳसव्याय च रजस्याय च नमः शुष्क्याय च हरित्याय च नमो लोप्याय चोलप्याय च

nama iriṇyāya ca prapathyāya ca namaḥ kiṃśilāya ca kṣayaṇāya ca namaḥ kapardine ca pulastaye ca namo goṣṭhyāya ca gṛhyāya ca namas talpyāya ca gehyāya ca namaḥ kāṭyāya ca gahvareṣṭhāya ca namo hradayyāya ca niveṣpyāya ca namaḥ pāṃsavyāya ca rajasyāya ca namaḥ śuṣkyāya ca harityāya ca namo lopyāya colapyāya ca

TS 4 5.9.2

नम ऊर्व्याय च सूर्म्याय च नमः पर्ण्याय च पर्णशद्याय च नमो ऽपगुरमाणाय चाभिघ्नते च नम आक्खिदते च प्रक्खिदते च नमो वः किरिकेभ्यो देवानाꣳ हृदयेभ्यः । नमो विक्षीणकेभ्यः । नमो विचिन्वत्केभ्यः । नम आनिर्हतेभ्यः । नम आमीवत्केभ्यः ॥

nama ūrvyāya ca sūrmyāya ca namaḥ parṇyāya ca parṇaśadyāya ca namo 'paguramāṇāya cābhighnate ca nama ākkhidate ca prakkhidate ca namo vaḥ kirikebhyo devānāṃ hṛdayebhyaḥ | namo vikṣīṇakebhyaḥ | namo vicinvatkebhyaḥ | nama ānirhatebhyaḥ | nama āmīvatkebhyaḥ ||

TS 4 5.10.1

द्रापे अन्धसस् पते दरिद्रन् नीललोहित । एषाम् पुरुषाणाम् एषाम् पशूनाम् मा भेर् माऽरो मो एषां किं चनाममत् ॥ या ते रुद्र शिवा तनूः शिवा विश्वाहभेषजी । शिवा रुद्रस्य भेषजी तया नो मृड जीवसे ॥ इमाꣳ रुद्राय तवसे कपर्दिने क्षयद्वीराय प्र भरामहे मतिम् । यथा नः शम् असद् द्विपदे चतुष्पदे विश्वम् पुष्टम् ग्रामे अस्मिन्

drāpe andhasas pate daridran nīlalohita | eṣām puruṣāṇām eṣām paśūnām mā bher mā'ro mo eṣāṃ kiṃ canāmamat || yā te rudra śivā tanūḥ śivā viśvāhabheṣajī | śivā rudrasya bheṣajī tayā no mṛḍa jīvase || imāṃ rudrāya tavase kapardine kṣayadvīrāya pra bharāmahe matim | yathā naḥ śam asad dvipade catuṣpade viśvam puṣṭam grāme asmin

TS 4 5.10.2

अनातुरम् ॥ मृडा नो रुद्रोत नो मयस् कृधि क्षयद्वीराय नमसा विधेम ते । यच् छं च योश् च मनुर् आयजे पिता तद् अश्याम तव रुद्र प्रणीतौ ॥ मा नो महान्तम् उत मा नो अर्भकम् मा न उक्षन्तम् उत मा न उक्षितम् । मा नो वधीः पितरम् मोत मातरम् प्रिया मा नस् तनुवः

anāturam || mṛḍā no rudrota no mayas kṛdhi kṣayadvīrāya namasā vidhema te | yac chaṃ ca yoś ca manur āyaje pitā tad aśyāma tava rudra praṇītau || mā no mahāntam uta mā no arbhakam mā na ukṣantam uta mā na ukṣitam | mā no vadhīḥ pitaram mota mātaram priyā mā nas tanuvaḥ

TS 4 5.10.3

रुद्र रीरिषः ॥ मा नस् तोके तनये मा न आयुषि मा नो गोषु मा नो अश्वेषु रीरिषः । वीरान् मा नो रुद्र भामितो वधीर् हविष्मन्तो नमसा विधेम ते ॥ आरात् ते गोघ्न उत पूरुषघ्ने क्षयद्वीराय सुम्नम् अस्मे ते अस्तु । रक्षा च नो अधि च देव ब्रूह्य् अधा च नः शर्म यच्छ द्विबर्हाः ॥ स्तुहि

rudra rīriṣaḥ || mā nas toke tanaye mā na āyuṣi mā no goṣu mā no aśveṣu rīriṣaḥ | vīrān mā no rudra bhāmito vadhīr haviṣmanto namasā vidhema te || ārāt te goghna uta pūruṣaghne kṣayadvīrāya sumnam asme te astu | rakṣā ca no adhi ca deva brūhy adhā ca naḥ śarma yaccha dvibarhāḥ || stuhi

TS 4 5.10.4

श्रुतं गर्तसदं युवानम् मृगं न भीमम् उपहत्नुम् उग्रम् । मृडा जरित्रे रुद्र स्तवानो अन्यं ते अस्मन् नि वपन्तु सेनाः ॥ परि णो रुद्रस्य हेतिर् वृणक्तु परि त्वेषस्य दुर्मतिर् अघायोः । अव स्थिरा मघवद्भ्यस् तनुष्व मीढ्वस् तोकाय तनयाय मृडय ॥ मीढुष्टम शिवतम शिवो नः सुमना भव । परमे वृक्ष आयुधं निधाय कृत्तिं वसान आ चर पिनाकम्

śrutaṃ gartasadaṃ yuvānam mṛgaṃ na bhīmam upahatnum ugram | mṛḍā jaritre rudra stavāno anyaṃ te asman ni vapantu senāḥ || pari ṇo rudrasya hetir vṛṇaktu pari tveṣasya durmatir aghāyoḥ | ava sthirā maghavadbhyas tanuṣva mīḍhvas tokāya tanayāya mṛḍaya || mīḍhuṣṭama śivatama śivo naḥ sumanā bhava | parame vṛkṣa āyudhaṃ nidhāya kṛttiṃ vasāna ā cara pinākam

TS 4 5.10.5

बिभ्रद् आ गहि ॥ विकिरिद विलोहित नमस् ते अस्तु भगवः । यास् ते सहस्रꣳ हेतयो ऽन्यम् अस्मन् नि वपन्तु ताः ॥ सहस्राणि सहस्रधाः बाहुवोस् तव हेतयः । तासाम् ईशानो भगवः पराचीना मुखा कृधि ॥

bibhrad ā gahi || vikirida vilohita namas te astu bhagavaḥ | yās te sahasraṃ hetayo 'nyam asman ni vapantu tāḥ || sahasrāṇi sahasradhāḥ bāhuvos tava hetayaḥ | tāsām īśāno bhagavaḥ parācīnā mukhā kṛdhi ||

TS 4 5.11.1

सहस्राणि सहस्रशो ये रुद्रा अधि भूम्याम् । तेषाꣳ सहस्रयोजने ऽव धन्वानि तन्मसि ॥ अस्मिन् महत्य् अर्णवे ऽन्तरिक्षे भवा अधि । नीलग्रीवाः शितिकण्ठाः शर्वा अधः क्षमाचराः ॥ नीलग्रीवाः शितिकण्ठा दिवꣳ रुद्रा उपश्रिताः । ये वृक्षेषु सस्पिञ्जरा नीलग्रीवा विलोहिताः । ये भूतानाम् अधिपतयो विशिखासः कपर्दिनः । ये अन्नेषु विविध्यन्ति पात्रेषु पिबतो जनान् । ये पथाम् पथिरक्षय ऐलबृदा यव्युधः । ये तीर्थानि

sahasrāṇi sahasraśo ye rudrā adhi bhūmyām | teṣāṃ sahasrayojane 'va dhanvāni tanmasi || asmin mahaty arṇave 'ntarikṣe bhavā adhi | nīlagrīvāḥ śitikaṇṭhāḥ śarvā adhaḥ kṣamācarāḥ || nīlagrīvāḥ śitikaṇṭhā divaṃ rudrā upaśritāḥ | ye vṛkṣeṣu saspiñjarā nīlagrīvā vilohitāḥ | ye bhūtānām adhipatayo viśikhāsaḥ kapardinaḥ | ye anneṣu vividhyanti pātreṣu pibato janān | ye pathām pathirakṣaya ailabṛdā yavyudhaḥ | ye tīrthāni

TS 4 5.11.2

प्रचरन्ति सृकावन्तो निषङ्गिणः । य एतावन्तश् च भूयाꣳसश् च दिशो रुद्रा वितस्थिरे । तेषाꣳ सहस्रयोजने ऽव धन्वानि तन्मसि ॥ नमो रुद्रेभ्यो ये पृथिव्यां ये ऽन्तरिक्षे ये दिवि येषाम् अन्नं वातो वर्षम् इषवस् तेभ्यो दश प्राचीर् दश दक्षिणा दश प्रतीचीर् दशोदीचीर् दशोर्ध्वास् तेभ्यो नमस् ते नो मृडयन्तु ते यं द्विष्मो यश् च नो द्वेष्टि तं वो जम्भे दधामि ॥

pracaranti sṛkāvanto niṣaṅgiṇaḥ | ya etāvantaś ca bhūyāṃsaś ca diśo rudrā vitasthire | teṣāṃ sahasrayojane 'va dhanvāni tanmasi || namo rudrebhyo ye pṛthivyāṃ ye 'ntarikṣe ye divi yeṣām annaṃ vāto varṣam iṣavas tebhyo daśa prācīr daśa dakṣiṇā daśa pratīcīr daśodīcīr daśordhvās tebhyo namas te no mṛḍayantu te yaṃ dviṣmo yaś ca no dveṣṭi taṃ vo jambhe dadhāmi ||