Taittiriya Samhita (Black Yajurveda) — Kanda 4 — Chapter 2

TS 4 2.1.1

विष्णोः क्रमो ऽस्य् अभिमातिहा गायत्रं छन्द आ रोह पृथिवीम् अनु वि क्रमस्व निर्भक्तः स यं द्विष्मो विष्णोः क्रमो ऽस्य् अभिशस्तिहा त्रैष्टुभं छन्द आ रोहान्तरिक्षम् अनु वि क्रमस्व निर्भक्तः स यं द्विष्मो विष्णोः क्रमो ऽस्य् अरातीयतो हन्ता जागतं छन्द आ रोह दिवम् अनु वि क्रमस्व निर्भक्तः स यं द्विष्मो विष्णोः

viṣṇoḥ kramo 'sy abhimātihā gāyatraṃ chanda ā roha pṛthivīm anu vi kramasva nirbhaktaḥ sa yaṃ dviṣmo viṣṇoḥ kramo 'sy abhiśastihā traiṣṭubhaṃ chanda ā rohāntarikṣam anu vi kramasva nirbhaktaḥ sa yaṃ dviṣmo viṣṇoḥ kramo 'sy arātīyato hantā jāgataṃ chanda ā roha divam anu vi kramasva nirbhaktaḥ sa yaṃ dviṣmo viṣṇoḥ

TS 4 2.1.2

क्रमो ऽसि शत्रूयतो हन्ताऽऽनुष्टुभं छन्द आ रोह दिशो ऽनु वि क्रमस्व निर्भक्तः स यं द्विष्मः । अक्रन्दद् अग्निः स्तनयन्न् इव द्यौः क्षामा रेरिहद् वीरुधः समञ्जन् । सद्यो जज्ञानो वि हीम् इद्धो अख्यद् आ रोदसी भानुना भात्य् अन्तः ॥ अग्ने ऽभ्यावर्तिन्न् अभि न आ वर्तस्वाऽऽयुषा वर्चसा सन्या मेधया प्रजया धनेन ॥ अग्ने

kramo 'si śatrūyato hantā''nuṣṭubhaṃ chanda ā roha diśo 'nu vi kramasva nirbhaktaḥ sa yaṃ dviṣmaḥ | akrandad agniḥ stanayann iva dyauḥ kṣāmā rerihad vīrudhaḥ samañjan | sadyo jajñāno vi hīm iddho akhyad ā rodasī bhānunā bhāty antaḥ || agne 'bhyāvartinn abhi na ā vartasvā''yuṣā varcasā sanyā medhayā prajayā dhanena || agne

TS 4 2.1.3

अङ्गिरः शतं ते सन्त्व् आवृतः सहस्रं त उपावृतः । तासाम् पोषस्य पोषेण पुनर् नो नष्टम् आ कृधि पुनर् नो रयिम् आकृधि ॥ पुनर् ऊर्जा नि वर्तस्व पुनर् अग्न इषाऽऽयुषा । पुनर् नः पाहि विश्वतः ॥ सह रय्या नि वर्तस्वाग्ने पिन्वस्व धारया । विश्वप्स्निया विश्वतस् परि ॥ उद् उत्तमं वरुण पाशम् अस्मद् अवाधमम्

aṅgiraḥ śataṃ te santv āvṛtaḥ sahasraṃ ta upāvṛtaḥ | tāsām poṣasya poṣeṇa punar no naṣṭam ā kṛdhi punar no rayim ākṛdhi || punar ūrjā ni vartasva punar agna iṣā''yuṣā | punar naḥ pāhi viśvataḥ || saha rayyā ni vartasvāgne pinvasva dhārayā | viśvapsniyā viśvatas pari || ud uttamaṃ varuṇa pāśam asmad avādhamam

TS 4 2.1.4

वि मध्यमꣳ श्रथाय । अथा वयम् आदित्य व्रते तवानागसो अदितये स्याम ॥ आ त्वाऽहार्षम् अन्तर् अभूर् ध्रुवस् तिष्ठाविचाचलिः । विशस् त्वा सर्वा वाञ्छन्त्व् अस्मिन् राष्ट्रम् अधि श्रय ॥ अग्रे बृहन्न् उषसामूर्ध्वो अस्थान् निर्जग्मिवान् तमसो ज्योतिषाऽऽगात् । अग्निर् भानुना रुशता स्वङ्ग आ जातो विश्वा सद्मान्य् अप्राः ॥ सीद त्वम् मातुर् अस्याः ॥

vi madhyamaṃ śrathāya | athā vayam āditya vrate tavānāgaso aditaye syāma || ā tvā'hārṣam antar abhūr dhruvas tiṣṭhāvicācaliḥ | viśas tvā sarvā vāñchantv asmin rāṣṭram adhi śraya || agre bṛhann uṣasāmūrdhvo asthān nirjagmivān tamaso jyotiṣā''gāt | agnir bhānunā ruśatā svaṅga ā jāto viśvā sadmāny aprāḥ || sīda tvam mātur asyāḥ ||

TS 4 2.1.5

उपस्थे विश्वान्य् अग्ने वयुनानि विद्वान् । मैनाम् अर्चिषा मा तपसाभि शूशुचो ऽन्तर् अस्याꣳ शुक्रज्योतिर् वि भाहि ॥ अन्तर् अग्ने रुचा त्वम् उखायै सदने स्वे । तस्यास् त्वꣳ हरसा तपञ् जातवेदः शिवो भव ॥ शिवो भूत्वा मह्यम् अग्ने ऽथो सीद शिवस् त्वम् । शिवाः कृत्वा दिशः सर्वाः स्वां योनिम् इहासदः ॥ हꣳसः शुचिषद् वसुर् अन्तरिक्षसद् होता वेदिषद् अतिथिर् दुरोणसत् । नृषद् वरसद् व्योमसद् अब्जा गोजा ऋतजा अद्रिजा ऋतम् बृहत् ॥

upasthe viśvāny agne vayunāni vidvān | mainām arciṣā mā tapasābhi śūśuco 'ntar asyāṃ śukrajyotir vi bhāhi || antar agne rucā tvam ukhāyai sadane sve | tasyās tvaṃ harasā tapañ jātavedaḥ śivo bhava || śivo bhūtvā mahyam agne 'tho sīda śivas tvam | śivāḥ kṛtvā diśaḥ sarvāḥ svāṃ yonim ihāsadaḥ || haṃsaḥ śuciṣad vasur antarikṣasad hotā vediṣad atithir duroṇasat | nṛṣad varasad vyomasad abjā gojā ṛtajā adrijā ṛtam bṛhat ||

TS 4 2.2.1

दिवस् परि प्रथमं जज्ञे अग्निर् अस्मद् द्वितीयम् परि जातवेदाः । तृतीयम् अप्सु नृमणा अजस्रम् इन्धान एनं जरते स्वाधीः ॥ विद्मा ते अग्ने त्रेधा त्रयाणि विद्मा ते सद्म विभृतम् पुरुत्रा । विद्मा ते नाम परमं गुहा यद् विद्मा तम् उत्सं यत आजगन्थ ॥ समुद्रे त्वा नृमणा अप्स्व् अन्तर् नृचक्षा ईधे दिवो अग्न ऊधन् । तृतीये त्वा

divas pari prathamaṃ jajñe agnir asmad dvitīyam pari jātavedāḥ | tṛtīyam apsu nṛmaṇā ajasram indhāna enaṃ jarate svādhīḥ || vidmā te agne tredhā trayāṇi vidmā te sadma vibhṛtam purutrā | vidmā te nāma paramaṃ guhā yad vidmā tam utsaṃ yata ājagantha || samudre tvā nṛmaṇā apsv antar nṛcakṣā īdhe divo agna ūdhan | tṛtīye tvā

TS 4 2.2.2

रजसि तस्थिवाꣳसम् ऋतस्य योनौ महिषा अहिन्वन् ॥ अक्रन्दद् अग्निः स्तनयन्न् इव द्यौः क्षामा रेरिहद् वीरुधः समञ्जन् । सद्यो जज्ञानो वि हीम् इद्धो अख्यद् आ रोदसी भानुना भात्य् अन्तः ॥ उशिक् पावको अरतिः सुमेधा मर्तेष्व् अग्निर् अमृतो निधायि । इयर्ति धूमम् अरुषम् भरिभ्रद् उच् छुक्रेण शोचिषा द्याम् इनक्षत् ॥ विश्वस्य केतुर् भुवनस्य गर्भ आ

rajasi tasthivāṃsam ṛtasya yonau mahiṣā ahinvan || akrandad agniḥ stanayann iva dyauḥ kṣāmā rerihad vīrudhaḥ samañjan | sadyo jajñāno vi hīm iddho akhyad ā rodasī bhānunā bhāty antaḥ || uśik pāvako aratiḥ sumedhā marteṣv agnir amṛto nidhāyi | iyarti dhūmam aruṣam bharibhrad uc chukreṇa śociṣā dyām inakṣat || viśvasya ketur bhuvanasya garbha ā

TS 4 2.2.3

रोदसी अपृणाज् जायमानः । वीडुं चिद् अद्रिम् अभिनत् परायञ् जना यद् अग्निम् अयजन्त पञ्च ॥ श्रीणाम् उदारो धरुणो रयीणाम् मनीषाणाम् प्रार्पणः सोमगोपाः । वसोः सूनुः सहसो अप्सु राजा वि भात्य् अग्र उषसाम् इधानः ॥ यस् ते अद्य कृणवद् भद्रशोचे ऽपूपं देव घृतवन्तम् अग्ने । प्र तं नय प्रतरां वस्यो अच्छाभि द्युम्नं देवभक्तं यविष्ठ ॥ आ

rodasī apṛṇāj jāyamānaḥ | vīḍuṃ cid adrim abhinat parāyañ janā yad agnim ayajanta pañca || śrīṇām udāro dharuṇo rayīṇām manīṣāṇām prārpaṇaḥ somagopāḥ | vasoḥ sūnuḥ sahaso apsu rājā vi bhāty agra uṣasām idhānaḥ || yas te adya kṛṇavad bhadraśoce 'pūpaṃ deva ghṛtavantam agne | pra taṃ naya pratarāṃ vasyo acchābhi dyumnaṃ devabhaktaṃ yaviṣṭha || ā

TS 4 2.2.4

तम् भज सौश्रवसेष्व् अग्न उक्थउक्थ आ भज शस्यमाने । प्रियः सूर्ये प्रियो अग्ना भवात्य् उज् जातेन भिनदद् उज् जनित्वैः ॥ त्वाम् अग्ने यजमाना अनु द्यून् विश्वा वसूनि दधिरे वार्याणि । त्वया सह द्रविणम् इच्छमाना व्रजं गोमन्तम् उशिजो वि वव्रुः ॥ दृशानो रुक्म उर्व्या व्यद्यौद् दुर्मर्षम् आयुः श्रिये रुचानः । अग्निर् अमृतो अभवद् वयोभिर् यद् एनं द्यौर् अजनयत् सुरेताः ॥

tam bhaja sauśravaseṣv agna ukthauktha ā bhaja śasyamāne | priyaḥ sūrye priyo agnā bhavāty uj jātena bhinadad uj janitvaiḥ || tvām agne yajamānā anu dyūn viśvā vasūni dadhire vāryāṇi | tvayā saha draviṇam icchamānā vrajaṃ gomantam uśijo vi vavruḥ || dṛśāno rukma urvyā vyadyaud durmarṣam āyuḥ śriye rucānaḥ | agnir amṛto abhavad vayobhir yad enaṃ dyaur ajanayat suretāḥ ||

TS 4 2.3.1

अन्नपते ऽन्नस्य नो देह्य् अनमीवस्य शुष्मिणः । प्र प्रदातारं तारिष ऊर्जं नो धेहि द्विपदे चतुष्पदे ॥ उद् उ त्वा विश्वे देवा अग्ने भरन्तु चित्तिभिः । स नो भव शिवतमः सुप्रतीको विभावसुः ॥ प्रेद् अग्ने ज्योतिष्मान् याहि शिवेभिर् अर्चिभिस् त्वम् । बृहद्भिर् भानुभिर् भासन् मा हिꣳसीस् तनुवा प्रजाः ॥ समिधाग्निं दुवस्यत घृतैर् बोधयतातिथिम् । आ ॥

annapate 'nnasya no dehy anamīvasya śuṣmiṇaḥ | pra pradātāraṃ tāriṣa ūrjaṃ no dhehi dvipade catuṣpade || ud u tvā viśve devā agne bharantu cittibhiḥ | sa no bhava śivatamaḥ supratīko vibhāvasuḥ || pred agne jyotiṣmān yāhi śivebhir arcibhis tvam | bṛhadbhir bhānubhir bhāsan mā hiṃsīs tanuvā prajāḥ || samidhāgniṃ duvasyata ghṛtair bodhayatātithim | ā ||

TS 4 2.3.2

अस्मिन् हव्या जुहोतन ॥ प्रप्रायम् अग्निर् भरतस्य शृण्वे वि यत् सूर्यो न रोचते बृहद् भाः । अभि यः पूरुम् पृतनासु तस्थौ दीदाय दैव्यो अतिथिः शिवो नः ॥ आपो देवीः प्रति गृह्णीत भस्मैतत् स्योने कृणुध्वꣳ सुरभाव् उ लोके । तस्मै नमन्तां जनयः सुपत्नीर् मातेव पुत्रम् बिभृता स्व् एनम् ॥ अप्स्व् अग्ने सधिष्टव

asmin havyā juhotana || praprāyam agnir bharatasya śṛṇve vi yat sūryo na rocate bṛhad bhāḥ | abhi yaḥ pūrum pṛtanāsu tasthau dīdāya daivyo atithiḥ śivo naḥ || āpo devīḥ prati gṛhṇīta bhasmaitat syone kṛṇudhvaṃ surabhāv u loke | tasmai namantāṃ janayaḥ supatnīr māteva putram bibhṛtā sv enam || apsv agne sadhiṣṭava

TS 4 2.3.3

सौषधीर् अनु रुध्यसे । गर्भै सञ् जायसे पुनः ॥ गर्भो अस्य् ओषधीनां गर्भो वनस्पतीनां । गर्भो विश्वस्य भूतस्याग्ने गर्भो अपाम् असि ॥ प्रसद्य भस्मना योनिम् अपश् च पृथिवीम् अग्ने । सꣳसृज्य मातृभिस् त्वं ज्योतिष्मान् पुनर् आसदः ॥ पुनर् आसद्य सदनम् अपश् च पृथिवीम् अग्ने । शेषे मातुर् यथोपस्थे ऽन्तर् अस्याꣳ शिवतमः ॥ पुनर् ऊर्जा

sauṣadhīr anu rudhyase | garbhai sañ jāyase punaḥ || garbho asy oṣadhīnāṃ garbho vanaspatīnāṃ | garbho viśvasya bhūtasyāgne garbho apām asi || prasadya bhasmanā yonim apaś ca pṛthivīm agne | saṃsṛjya mātṛbhis tvaṃ jyotiṣmān punar āsadaḥ || punar āsadya sadanam apaś ca pṛthivīm agne | śeṣe mātur yathopasthe 'ntar asyāṃ śivatamaḥ || punar ūrjā

TS 4 2.3.4

नि वर्तस्व पुनर् अग्न इषायुषा । पुनर् नः पाहि विश्वतः ॥ सह रय्या नि वर्तस्वाग्ने पिन्वस्व धारया । विश्वप्स्निया विश्वतस् परि ॥ पुनस् त्वाऽऽदित्या रुद्रा वसवः सम् इन्धताम् पुनर् ब्रह्माणो वसुनीथ यज्ञैः । घृतेन त्वं तनुवो वर्धयस्व सत्याः सन्तु यजमानस्य कामाः ॥ बोधा नो अस्य वचसो यविष्ठ मꣳहिष्ठस्य प्रभृतस्य स्वधावः । पीयति त्वो अनु त्वो गृणाति वन्दारुस् ते तनुवं वन्दे अग्ने ॥ स बोधि सूरिर् मघवा वसुदावा वसुपतिः । युयोध्य् अस्मद् द्वेषाꣳसि ॥

ni vartasva punar agna iṣāyuṣā | punar naḥ pāhi viśvataḥ || saha rayyā ni vartasvāgne pinvasva dhārayā | viśvapsniyā viśvatas pari || punas tvā''dityā rudrā vasavaḥ sam indhatām punar brahmāṇo vasunītha yajñaiḥ | ghṛtena tvaṃ tanuvo vardhayasva satyāḥ santu yajamānasya kāmāḥ || bodhā no asya vacaso yaviṣṭha maṃhiṣṭhasya prabhṛtasya svadhāvaḥ | pīyati tvo anu tvo gṛṇāti vandārus te tanuvaṃ vande agne || sa bodhi sūrir maghavā vasudāvā vasupatiḥ | yuyodhy asmad dveṣāṃsi ||

TS 4 2.4.1

अपेत वीत वि च सर्पतातो ये ऽत्र स्थ पुराणा ये च नूतनाः । अदाद् इदं यमो ऽवसानम् पृथिव्या अक्रन्न् इमम् पितरो लोकम् अस्मै ॥ अग्नेर् भस्मास्य् अग्नेः पुरीषम् असि संज्ञानम् असि कामधरणम् मयि ते कामधरणम् भूयात् सं या वः प्रियास् तनुवः सम् प्रिया हृदयानि वः । आत्मा वो अस्तु

apeta vīta vi ca sarpatāto ye 'tra stha purāṇā ye ca nūtanāḥ | adād idaṃ yamo 'vasānam pṛthivyā akrann imam pitaro lokam asmai || agner bhasmāsy agneḥ purīṣam asi saṃjñānam asi kāmadharaṇam mayi te kāmadharaṇam bhūyāt saṃ yā vaḥ priyās tanuvaḥ sam priyā hṛdayāni vaḥ | ātmā vo astu

TS 4 2.4.2

सम्प्रियः सम्प्रियास् तनुवो मम ॥ अयꣳ सो अग्निर् यस्मिन्त् सोमम् इन्द्रः सुतं दधे जठरे वावशानः । सहस्रियं वाजम् अत्यं न सप्तिꣳ ससवान्त् सन्त् स्तूयसे जातवेदः ॥ अग्ने दिवो अर्णम् अच्छा जिगास्य् अच्छा देवाꣳ ऊचिषे धिष्णिया ये । याः परस्ताद् रोचने सूर्यस्य याश् चावस्ताद् उपतिष्ठन्त आपः ॥ अग्ने यत् ते दिवि वर्चः पृथिव्यां यद् ओषधीषु

sampriyaḥ sampriyās tanuvo mama || ayaṃ so agnir yasmint somam indraḥ sutaṃ dadhe jaṭhare vāvaśānaḥ | sahasriyaṃ vājam atyaṃ na saptiṃ sasavānt sant stūyase jātavedaḥ || agne divo arṇam acchā jigāsy acchā devāṃ ūciṣe dhiṣṇiyā ye | yāḥ parastād rocane sūryasya yāś cāvastād upatiṣṭhanta āpaḥ || agne yat te divi varcaḥ pṛthivyāṃ yad oṣadhīṣu

TS 4 2.4.3

अप्सु वा यजत्र । येनान्तरिक्षम् उर्व् आततन्थ त्वेषः स भानुर् अर्णवो नृचक्षाः ॥ पुरीष्यासो अग्नयः प्रावणेभिः सजोषसः । जुषन्ताꣳ हव्यम् आहुतम् अनमीवा इषो महीः ॥ इडाम् अग्ने पुरुदꣳसꣳ सनिं गोः शश्वत्तमꣳ हवमानाय साध । स्यान् नः सूनुस् तनयो विजावाग्ने सा ते सुमतिर् भूत्व् अस्मे ॥ अयं ते योनिर् ऋत्वियो यतो जातो अरोचथाः । तं जानन्

apsu vā yajatra | yenāntarikṣam urv ātatantha tveṣaḥ sa bhānur arṇavo nṛcakṣāḥ || purīṣyāso agnayaḥ prāvaṇebhiḥ sajoṣasaḥ | juṣantāṃ havyam āhutam anamīvā iṣo mahīḥ || iḍām agne purudaṃsaṃ saniṃ goḥ śaśvattamaṃ havamānāya sādha | syān naḥ sūnus tanayo vijāvāgne sā te sumatir bhūtv asme || ayaṃ te yonir ṛtviyo yato jāto arocathāḥ | taṃ jānan

TS 4 2.4.4

अग्न आ रोहाथा नो वर्धया रयिम् ॥ चिद् असि तया देवतयाङ्गिरवद् ध्रुवा सीद परिचिद् असि तया देवतयाङ्गिरस्वद् ध्रुवा सीद लोकम् पृण छिद्रम् पृणाथो सीद शिवा त्वम् । इन्द्राग्नी त्वा बृहस्पतिर् अस्मिन् योनाव् असीषदन् ॥ ता अस्य सूददोहसः सोमꣳ श्रीणन्ति पृश्नयः । जन्मन् देवानां विशस् त्रिष्व् आ रोचने दिवः

agna ā rohāthā no vardhayā rayim || cid asi tayā devatayāṅgiravad dhruvā sīda paricid asi tayā devatayāṅgirasvad dhruvā sīda lokam pṛṇa chidram pṛṇātho sīda śivā tvam | indrāgnī tvā bṛhaspatir asmin yonāv asīṣadan || tā asya sūdadohasaḥ somaṃ śrīṇanti pṛśnayaḥ | janman devānāṃ viśas triṣv ā rocane divaḥ

TS 4 2.5.1

सम् इतꣳ सं कल्पेथाꣳ सम्प्रियौ रोचिष्णू सुमनस्यमानौ । इषमूर्जम् अभि संवसानौ शं वाम् मनाꣳसि सं व्रता सम् उ चित्तान्य् आकरम् ॥ अग्ने पुरीष्याधिपा भवा त्वं नः । इषमूर्जं यजमानाय धेहि ॥ पुरीष्यस् त्वम् अग्ने रयिमान् पुष्टिमाꣳ असि । शिवाः कृत्वा दिशः सर्वाः स्वां योनिम् इहासदः ॥ भवतं नः समनसौ समोकसौ

sam itaṃ saṃ kalpethāṃ sampriyau rociṣṇū sumanasyamānau | iṣamūrjam abhi saṃvasānau śaṃ vām manāṃsi saṃ vratā sam u cittāny ākaram || agne purīṣyādhipā bhavā tvaṃ naḥ | iṣamūrjaṃ yajamānāya dhehi || purīṣyas tvam agne rayimān puṣṭimāṃ asi | śivāḥ kṛtvā diśaḥ sarvāḥ svāṃ yonim ihāsadaḥ || bhavataṃ naḥ samanasau samokasau

TS 4 2.5.2

अरेपसौ । मा यज्ञꣳ हिꣳसिष्टम् मा यज्ञपतिं जातवेदसौ शिवौ भवतम् अद्य नः ॥ मातेव पुत्रम् पृथिवी पुरीष्यम् अग्निꣳ स्वे योनाव् अभार् उखा । तां विश्वैर् देवैर् ऋतुभिः संविदानः प्रजापतिर् विश्वकर्मा वि मुञ्चतु ॥ यद् अस्य पारे रजसः शुक्रं ज्योतिर् अजायत । तन् नः पर्षद् अति द्विशो ऽग्ने वैश्वानर स्वाहा ॥ नमः सु ते निर्ऋते विश्वरूपे

arepasau | mā yajñaṃ hiṃsiṣṭam mā yajñapatiṃ jātavedasau śivau bhavatam adya naḥ || māteva putram pṛthivī purīṣyam agniṃ sve yonāv abhār ukhā | tāṃ viśvair devair ṛtubhiḥ saṃvidānaḥ prajāpatir viśvakarmā vi muñcatu || yad asya pāre rajasaḥ śukraṃ jyotir ajāyata | tan naḥ parṣad ati dviśo 'gne vaiśvānara svāhā || namaḥ su te nirṛte viśvarūpe

TS 4 2.5.3

अयस्मयं वि चृता बन्धम् एतम् । यमेन त्वं यम्या संविदानोत्तमं नाकम् अधि रोहयेमम् ॥ यत् ते देवी निर्ऋतिर् आबबन्ध दाम ग्रीवास्व् अविचर्त्यम् । इदं ते तद् वि ष्याम्य् आयुषो न मध्याद् अथा जीवः पितुम् अद्धि प्रमुक्तः ॥ यस्यास् ते अस्याः क्रूर आसञ् जुहोम्य् एषाम् बन्धानाम् अवसर्जनाय । भूमिर् इति त्वा जना विदुर् निर्ऋतिः

ayasmayaṃ vi cṛtā bandham etam | yamena tvaṃ yamyā saṃvidānottamaṃ nākam adhi rohayemam || yat te devī nirṛtir ābabandha dāma grīvāsv avicartyam | idaṃ te tad vi ṣyāmy āyuṣo na madhyād athā jīvaḥ pitum addhi pramuktaḥ || yasyās te asyāḥ krūra āsañ juhomy eṣām bandhānām avasarjanāya | bhūmir iti tvā janā vidur nirṛtiḥ

TS 4 2.5.4

इति त्वाहम् परि वेद विश्वतः ॥ असुन्वन्तम् अयजमानम् इच्छ स्तेनस्येत्यां तस्करस्यान्व् एषि । अन्यम् अस्मद् इच्छ सा त इत्या नमो देवि निर्ऋते तुभ्यम् अस्तु ॥ देवीम् अहं निर्ऋतिं वन्दमानः पितेव पुत्रं दसये वचोभिः । विश्वस्य या जायमानस्य वेद शिरःशिरः प्रति सूरी वि चष्टे ॥ निवेशनः संगमनो वसूनां विश्वा रूपाऽभि चष्टे

iti tvāham pari veda viśvataḥ || asunvantam ayajamānam iccha stenasyetyāṃ taskarasyānv eṣi | anyam asmad iccha sā ta ityā namo devi nirṛte tubhyam astu || devīm ahaṃ nirṛtiṃ vandamānaḥ piteva putraṃ dasaye vacobhiḥ | viśvasya yā jāyamānasya veda śiraḥśiraḥ prati sūrī vi caṣṭe || niveśanaḥ saṃgamano vasūnāṃ viśvā rūpā'bhi caṣṭe

TS 4 2.5.5

शचीभिः । देव इव सविता सत्यधर्मेन्द्रो न तस्थौ समरे पथीनाम् ॥ सं वरत्रा दधातन निर् आहावान् कृणोतन । सिञ्चामहा अवटम् उद्रिणं वयं विश्वाऽहाऽदस्तम् अक्षितम् ॥ निष्कृताहावम् अवटꣳ सुवरत्रꣳ सुषेचनम् । उद्रिणꣳ सिञ्चे अक्षितम् ॥ सीरा युञ्जन्ति कवयो युगा वि तन्वते पृथक् । धीरा देवेषु सुम्नया युनक्त सीरा वि युगा तनोत कृते योनौ वपतेह

śacībhiḥ | deva iva savitā satyadharmendro na tasthau samare pathīnām || saṃ varatrā dadhātana nir āhāvān kṛṇotana | siñcāmahā avaṭam udriṇaṃ vayaṃ viśvā'hā'dastam akṣitam || niṣkṛtāhāvam avaṭaṃ suvaratraṃ suṣecanam | udriṇaṃ siñce akṣitam || sīrā yuñjanti kavayo yugā vi tanvate pṛthak | dhīrā deveṣu sumnayā yunakta sīrā vi yugā tanota kṛte yonau vapateha

TS 4 2.5.6

बीजम् । गिरा च श्रुष्टिः सभरा असन् नो नेदीय इत् सृण्या पक्वम् आऽयत् ॥ लाङ्गलम् पवीरवꣳ सुशेवꣳ सुमतित्सरु । उद् इत् कृषति गाम् अविम् प्रफर्व्यं च पीवरीम् । प्रस्थावद् रथवाहनम् ॥ शुनं नः फाला वि तुदन्तु भूमिꣳ शुनं कीनाशा अभि यन्तु वाहान् । शुनम् पर्जन्यो मधुना पयोभिः शुनासीरा शुनम् अस्मासु धत्तम् ॥ कामं कामदुघे धुक्ष्व मित्राय वरुणाय च । इन्द्रायाग्नये पूष्ण ओषधीभ्यः प्रजाभ्यः ॥ घृतेन सीता मधुना समक्ता विश्वैर् देवैर् अनुमता मरुद्भिः । ऊर्जस्वती पयसा पिन्वमानास्मान्त् सीते पयसाऽभ्याववृत्स्व ॥

bījam | girā ca śruṣṭiḥ sabharā asan no nedīya it sṛṇyā pakvam ā'yat || lāṅgalam pavīravaṃ suśevaṃ sumatitsaru | ud it kṛṣati gām avim prapharvyaṃ ca pīvarīm | prasthāvad rathavāhanam || śunaṃ naḥ phālā vi tudantu bhūmiṃ śunaṃ kīnāśā abhi yantu vāhān | śunam parjanyo madhunā payobhiḥ śunāsīrā śunam asmāsu dhattam || kāmaṃ kāmadughe dhukṣva mitrāya varuṇāya ca | indrāyāgnaye pūṣṇa oṣadhībhyaḥ prajābhyaḥ || ghṛtena sītā madhunā samaktā viśvair devair anumatā marudbhiḥ | ūrjasvatī payasā pinvamānāsmānt sīte payasā'bhyāvavṛtsva ||

TS 4 2.6.1

या जाता ओषधयो देवेभ्यस् त्रियुगम् पुरा । मन्दामि बभ्रूणाम् अहꣳ शतं धामानि सप्त च ॥ शतं वो अम्ब धामानि सहस्रम् उत वो रुहः । अथा शतक्रत्वो यूयम् इमम् मे अगदं कृत ॥ पुष्पावतीः प्रसूवतीः फलिनीर् अफला उत । अश्वा इव सजित्वरीर् वीरुधः पारयिष्णवः ॥ ओषधीर् इति मातरस् तद् वो देवीर् उप ब्रुवे । रपाꣳसि विघ्नतीर् इत रपः

yā jātā oṣadhayo devebhyas triyugam purā | mandāmi babhrūṇām ahaṃ śataṃ dhāmāni sapta ca || śataṃ vo amba dhāmāni sahasram uta vo ruhaḥ | athā śatakratvo yūyam imam me agadaṃ kṛta || puṣpāvatīḥ prasūvatīḥ phalinīr aphalā uta | aśvā iva sajitvarīr vīrudhaḥ pārayiṣṇavaḥ || oṣadhīr iti mātaras tad vo devīr upa bruve | rapāṃsi vighnatīr ita rapaḥ

TS 4 2.6.2

चातयमानाः ॥ अश्वत्थे वो निषदनम् पर्णे वो वसतिः कृता । गोभाज इत् किलासथ यत् सनवथ पूरुषम् ॥ यद् अहं वाजयन्न् इमा ओषधीर् हस्त आदधे । आत्मा यक्ष्मस्य नश्यति पुरा जीवगृभो यथा ॥ यद् ओषधयः संगच्छन्ते राजानः समिताव् इव । विप्रः स उच्यते भिषग् रक्षोहाऽमीवचातनः ॥ निष्कृतिर् नाम वो माताऽथा यूयꣳ स्थ संकृतीः । सराः पतत्रिणीः

cātayamānāḥ || aśvatthe vo niṣadanam parṇe vo vasatiḥ kṛtā | gobhāja it kilāsatha yat sanavatha pūruṣam || yad ahaṃ vājayann imā oṣadhīr hasta ādadhe | ātmā yakṣmasya naśyati purā jīvagṛbho yathā || yad oṣadhayaḥ saṃgacchante rājānaḥ samitāv iva | vipraḥ sa ucyate bhiṣag rakṣohā'mīvacātanaḥ || niṣkṛtir nāma vo mātā'thā yūyaṃ stha saṃkṛtīḥ | sarāḥ patatriṇīḥ

TS 4 2.6.3

स्थन यद् आमयति निष् कृत ॥ अन्या वो अन्याम् अवत्व् अन्याऽन्यस्या उपावत । ताः सर्वा ओषधयः संविदाना इदम् मे प्रावता वचः ॥ उच् छुष्मा ओषधीनां गावो गोष्ठाद् इवेरते । धनꣳ सनिष्यन्तीनाम् आत्मानं तव पूरुष ॥ अति विश्वाः परिष्ठा स्तेन इव व्रजम् अक्रमुः । ओषधयः प्राचुच्यवुर् यत् किं च तनुवाꣳ रपः ॥ याः

sthana yad āmayati niṣ kṛta || anyā vo anyām avatv anyā'nyasyā upāvata | tāḥ sarvā oṣadhayaḥ saṃvidānā idam me prāvatā vacaḥ || uc chuṣmā oṣadhīnāṃ gāvo goṣṭhād iverate | dhanaṃ saniṣyantīnām ātmānaṃ tava pūruṣa || ati viśvāḥ pariṣṭhā stena iva vrajam akramuḥ | oṣadhayaḥ prācucyavur yat kiṃ ca tanuvāṃ rapaḥ || yāḥ

TS 4 2.6.4

त आतस्थुर् आत्मानं या आविविशुः परुःपरुः । तास् ते यक्ष्मं वि बाधन्ताम् उग्रो मध्यमशीर् इव ॥ साकं यक्ष्म प्र पत श्येनेन किकिदीविना । साकं वातस्य ध्राज्या साकं नश्य निहाकया ॥ अश्वावतीꣳ सोमवतीमूर्जयन्तीम् उदोजसम् । आ वित्सि सर्वा ओषधीर् अस्मा अरिष्टतातये ॥ याः फलिनीर् या अफला अपुष्पा याश् च पुष्पिणीः । बृहस्पतिप्रसूतास् ता नो मुञ्चन्त्व् अꣳहसः ॥ याः

ta ātasthur ātmānaṃ yā āviviśuḥ paruḥparuḥ | tās te yakṣmaṃ vi bādhantām ugro madhyamaśīr iva || sākaṃ yakṣma pra pata śyenena kikidīvinā | sākaṃ vātasya dhrājyā sākaṃ naśya nihākayā || aśvāvatīṃ somavatīmūrjayantīm udojasam | ā vitsi sarvā oṣadhīr asmā ariṣṭatātaye || yāḥ phalinīr yā aphalā apuṣpā yāś ca puṣpiṇīḥ | bṛhaspatiprasūtās tā no muñcantv aṃhasaḥ || yāḥ

TS 4 2.6.5

ओषधयः सोमराज्ञीः प्रविष्टाः पृथिवीम् अनु । तासां त्वम् अस्य् उत्तमा प्र णो जीवातवे सुव ॥ अवपतन्तीर् अवदन् दिव ओषधयः परि । यं जीवम् अश्नवामहै न स रिष्याति पूरुषः ॥ याश् चेदम् उपशृण्वन्ति याश् च दूरम् परागताः । इह संगत्य ताः सर्वा अस्मै सं दत्त भेषजम् ॥ मा वो रिषत् खनिता यस्मै चाहं खनामि वः । द्विपच् चतुष्पद् अस्माकꣳ सर्वम् अस्त्व् अनातुरम् ॥ ओषधयः सं वदन्ते सोमेन सह राज्ञा । यस्मै करोति ब्राह्मणस् तꣳ राजन् पारयामसि ॥

oṣadhayaḥ somarājñīḥ praviṣṭāḥ pṛthivīm anu | tāsāṃ tvam asy uttamā pra ṇo jīvātave suva || avapatantīr avadan diva oṣadhayaḥ pari | yaṃ jīvam aśnavāmahai na sa riṣyāti pūruṣaḥ || yāś cedam upaśṛṇvanti yāś ca dūram parāgatāḥ | iha saṃgatya tāḥ sarvā asmai saṃ datta bheṣajam || mā vo riṣat khanitā yasmai cāhaṃ khanāmi vaḥ | dvipac catuṣpad asmākaṃ sarvam astv anāturam || oṣadhayaḥ saṃ vadante somena saha rājñā | yasmai karoti brāhmaṇas taṃ rājan pārayāmasi ||

TS 4 2.7.1

मा नो हिꣳसीज् जनिता यः पृथिव्या यो वा दिवꣳ सत्यधर्मा जजान । यश् चापश् चन्द्रा बृहतीर् जजान कस्मै देवाय हविषा विधेम ॥ अभ्यावर्तस्व पृथिवि यज्ञेन पयसा सह । वपां ते अग्निर् इषितो ऽव सर्पतु ॥ अग्ने यत् ते शुक्रं यच् चन्द्रं यत् पूतं यद् यज्ञियम् । तद् देवेभ्यो भरामसि ॥ इषमूर्जम् अहम् इत आ

mā no hiṃsīj janitā yaḥ pṛthivyā yo vā divaṃ satyadharmā jajāna | yaś cāpaś candrā bṛhatīr jajāna kasmai devāya haviṣā vidhema || abhyāvartasva pṛthivi yajñena payasā saha | vapāṃ te agnir iṣito 'va sarpatu || agne yat te śukraṃ yac candraṃ yat pūtaṃ yad yajñiyam | tad devebhyo bharāmasi || iṣamūrjam aham ita ā

TS 4 2.7.2

दद ऋतस्य धाम्नो अमृतस्य योनेः । आ नो गोषु विशत्व् औषधीषु जहामि सेदिम् अनिराम् अमीवाम् ॥ अग्ने तव श्रवो वयो महि भ्राजन्त्य् अर्चयो विभावसो । बृहद्भानो शवसा वाजम् उक्थ्यं दधासि दाशुषे कवे ॥ इरज्यन्न् अग्ने प्रथयस्व जन्तुभिर् अस्मे रायो अमर्त्य । स दर्शतस्य वपुषो वि राजसि पृणक्षि सानसिꣳ रयिम् ॥ ऊर्जो नपाज् जातवेदः सुशस्तिभिर् मन्दस्व

dada ṛtasya dhāmno amṛtasya yoneḥ | ā no goṣu viśatv auṣadhīṣu jahāmi sedim anirām amīvām || agne tava śravo vayo mahi bhrājanty arcayo vibhāvaso | bṛhadbhāno śavasā vājam ukthyaṃ dadhāsi dāśuṣe kave || irajyann agne prathayasva jantubhir asme rāyo amartya | sa darśatasya vapuṣo vi rājasi pṛṇakṣi sānasiṃ rayim || ūrjo napāj jātavedaḥ suśastibhir mandasva

TS 4 2.7.3

धीतिभिर् हितः । त्वे इषः सं दधुर् भूरिरेतसश् चित्रोतयो वामजाताः ॥ पावकवर्चाः शुक्रवर्चा अनूनवर्चा उद् इयर्षि भानुना । पुत्रः पितरा विचरन्न् उपावस्य् उभे पृणक्षि रोदसी ॥ ऋतावानम् महिषं विश्वचर्षणिम् अग्निꣳ सुम्नाय दधिरे पुरो जनाः । श्रुत्कर्णꣳ सप्रथस्तमम् त्वा गिरा दैव्यम् मानुषा युगा ॥ निष्कर्तारम् अध्वरस्य प्रचेतसं क्षयन्तꣳ राधसे महे । रातिम् भृगूणाम् उशिजं कविक्रतुम् पृणक्षि सानसिम्

dhītibhir hitaḥ | tve iṣaḥ saṃ dadhur bhūriretasaś citrotayo vāmajātāḥ || pāvakavarcāḥ śukravarcā anūnavarcā ud iyarṣi bhānunā | putraḥ pitarā vicarann upāvasy ubhe pṛṇakṣi rodasī || ṛtāvānam mahiṣaṃ viśvacarṣaṇim agniṃ sumnāya dadhire puro janāḥ | śrutkarṇaṃ saprathastamam tvā girā daivyam mānuṣā yugā || niṣkartāram adhvarasya pracetasaṃ kṣayantaṃ rādhase mahe | rātim bhṛgūṇām uśijaṃ kavikratum pṛṇakṣi sānasim

TS 4 2.7.4

रयिम् ॥ चित स्थ परिचित ऊर्ध्वचितः श्रयध्वं तया देवतयाऽङ्गिरस्वद् ध्रुवाः सीदत ॥ आ प्यायस्व सम् एतु ते विश्वतः सोम वृष्णियम् । भवा वाजस्य संगथे ॥ सं ते पयाꣳसि सम् उ यन्तु वाजाः सं वृष्णियान्य् अभिमातिषाहः । आप्यायमानो अमृताय सोम दिवि श्रवाꣳसि उत्तमानि धिष्व ॥

rayim || cita stha paricita ūrdhvacitaḥ śrayadhvaṃ tayā devatayā'ṅgirasvad dhruvāḥ sīdata || ā pyāyasva sam etu te viśvataḥ soma vṛṣṇiyam | bhavā vājasya saṃgathe || saṃ te payāṃsi sam u yantu vājāḥ saṃ vṛṣṇiyāny abhimātiṣāhaḥ | āpyāyamāno amṛtāya soma divi śravāṃsi uttamāni dhiṣva ||

TS 4 2.8.1

अभ्य् अस्थाद् विश्वाः पृतना अरातीस् तद् अग्निर् आह तद् उ सोम आह । बृहस्पतिः सविता तन् म आह पूषा माधात् सुकृतस्य लोके ॥ यद् अक्रन्दः प्रथमं जायमान उद्यन्त् समुद्राद् उत वा पुरीषात् । श्येनस्य पक्षा हरिणस्य बाहू उपस्तुतं जनिम तत् ते अर्वन् ॥ अपाम् पृष्ठम् असि योनिर् अग्नेः समुद्रम् अभितः पिन्वमानम् । वर्धमानम् महः

abhy asthād viśvāḥ pṛtanā arātīs tad agnir āha tad u soma āha | bṛhaspatiḥ savitā tan ma āha pūṣā mādhāt sukṛtasya loke || yad akrandaḥ prathamaṃ jāyamāna udyant samudrād uta vā purīṣāt | śyenasya pakṣā hariṇasya bāhū upastutaṃ janima tat te arvan || apām pṛṣṭham asi yonir agneḥ samudram abhitaḥ pinvamānam | vardhamānam mahaḥ

TS 4 2.8.2

आ च पुष्करं दिवो मात्रया वरिणा प्रथस्व ॥ ब्रह्म जज्ञानम् प्रथमम् पुरस्ताद् वि सीमतः सुरुचो वेन आवः । स बुध्निया उपमा अस्य विष्ठाः सतश् च योनिम् असतश् च विवः ॥ हिरण्यगर्भः सम् अवर्तताग्रे भूतस्य जातः पतिर् एक आसीत् । स दाधार पृथिवीं द्याम् उतेमां कस्मै देवाय हविषा विधेम ॥ द्रप्सश् चस्कन्द पृथिवीम् अनु

ā ca puṣkaraṃ divo mātrayā variṇā prathasva || brahma jajñānam prathamam purastād vi sīmataḥ suruco vena āvaḥ | sa budhniyā upamā asya viṣṭhāḥ sataś ca yonim asataś ca vivaḥ || hiraṇyagarbhaḥ sam avartatāgre bhūtasya jātaḥ patir eka āsīt | sa dādhāra pṛthivīṃ dyām utemāṃ kasmai devāya haviṣā vidhema || drapsaś caskanda pṛthivīm anu

TS 4 2.8.3

द्याम् इमं च योनिम् अनु यश् च पूर्वः । तृतीयं योनिम् अनु संचरन्तं द्रप्सं जुहोम्य् अनु सप्त होत्राः ॥ नमो अस्तु सर्पेभ्यो ये के च पृथिवीम् अनु । ये अन्तरिक्षे ये दिवि तेभ्यः सर्पेभ्यो नमः ॥ ये ऽदो रोचने दिवो ये वा सूर्यस्य रश्मिषु । येषाम् अप्सु सदः कृतं तेभ्यः सर्पेभ्यो नमः ॥ या इषवो यातुधानानां ये वा वनस्पतीꣳर् अनु । ये वाऽवटषु शेरते तेभ्यः सर्पेभ्यो नमः ॥

dyām imaṃ ca yonim anu yaś ca pūrvaḥ | tṛtīyaṃ yonim anu saṃcarantaṃ drapsaṃ juhomy anu sapta hotrāḥ || namo astu sarpebhyo ye ke ca pṛthivīm anu | ye antarikṣe ye divi tebhyaḥ sarpebhyo namaḥ || ye 'do rocane divo ye vā sūryasya raśmiṣu | yeṣām apsu sadaḥ kṛtaṃ tebhyaḥ sarpebhyo namaḥ || yā iṣavo yātudhānānāṃ ye vā vanaspatīṃr anu | ye vā'vaṭaṣu śerate tebhyaḥ sarpebhyo namaḥ ||

TS 4 2.9.1

ध्रुवाऽसि धरुणाऽस्तृता विश्वकर्मणा सुकृता । मा त्वा समुद्र उद् वधीन् मा सुपर्णो ऽव्यथमाना पृथिवीं दृꣳह ॥ प्रजापतिस् त्वा सादयतु पृथिव्याः पृष्ठे व्यचस्वतीम् प्रथस्वतीम् प्रथो ऽसि पृथिव्यसि भूर् असि भूमिर् अस्य् अदितिर् असि विश्वधाया विश्वस्य भुवनस्य धर्त्री पृथिवीं यच्छ पृथिवीं दृꣳह पृथिवीम् मा हिꣳसीर् विश्वस्मै प्राणाय व्यानायोदानाय प्रतिष्ठायै

dhruvā'si dharuṇā'stṛtā viśvakarmaṇā sukṛtā | mā tvā samudra ud vadhīn mā suparṇo 'vyathamānā pṛthivīṃ dṛṃha || prajāpatis tvā sādayatu pṛthivyāḥ pṛṣṭhe vyacasvatīm prathasvatīm pratho 'si pṛthivyasi bhūr asi bhūmir asy aditir asi viśvadhāyā viśvasya bhuvanasya dhartrī pṛthivīṃ yaccha pṛthivīṃ dṛṃha pṛthivīm mā hiṃsīr viśvasmai prāṇāya vyānāyodānāya pratiṣṭhāyai

TS 4 2.9.2

चरित्रायाग्निस् त्वाऽभि पातु मह्या स्वस्त्या छर्दिषा शंतमेन तया देवतयाऽङ्गिरस्वद् ध्रुवा सीद काण्डात्काण्डात् प्ररोहन्ती परुषःपरुषः परि । एवा नो दूर्वे प्र तनु सहस्रेण शतेन च ॥ या शतेन प्रतनोषि सहस्रेण विरोहसि तस्यास् ते देवीष्टके विधेम हविषा वयम् ॥ अषाढाऽसि सहमाना सहस्वारातीः सहस्वारातीयतः सहस्व पृतनाः सहस्व पृतन्यतः सहस्रवीर्या

caritrāyāgnis tvā'bhi pātu mahyā svastyā chardiṣā śaṃtamena tayā devatayā'ṅgirasvad dhruvā sīda kāṇḍātkāṇḍāt prarohantī paruṣaḥparuṣaḥ pari | evā no dūrve pra tanu sahasreṇa śatena ca || yā śatena pratanoṣi sahasreṇa virohasi tasyās te devīṣṭake vidhema haviṣā vayam || aṣāḍhā'si sahamānā sahasvārātīḥ sahasvārātīyataḥ sahasva pṛtanāḥ sahasva pṛtanyataḥ sahasravīryā

TS 4 2.9.3

असि सा मा जिन्व ॥ मधु वाता ऋतायते मधु क्षरन्ति सिन्धवः । माध्वीर् नः सन्त्व् ओषधीः ॥ मधु नक्तम् उतोषसि मधुमत् पार्थिवꣳ रजः । मधु द्यौर् अस्तु नः पिता ॥ मधुमान् नो वनस्पतिर् मधुमाꣳ अस्तु सूर्यः । माध्वीर् गावो भवन्तु नः ॥ मही द्यौः पृथिवी च न इमं यज्ञम् मिमिक्षताम् । पिपृतां नो भरीमभिः ॥ तद् विष्णोः परमम्

asi sā mā jinva || madhu vātā ṛtāyate madhu kṣaranti sindhavaḥ | mādhvīr naḥ santv oṣadhīḥ || madhu naktam utoṣasi madhumat pārthivaṃ rajaḥ | madhu dyaur astu naḥ pitā || madhumān no vanaspatir madhumāṃ astu sūryaḥ | mādhvīr gāvo bhavantu naḥ || mahī dyauḥ pṛthivī ca na imaṃ yajñam mimikṣatām | pipṛtāṃ no bharīmabhiḥ || tad viṣṇoḥ paramam

TS 4 2.9.4

पदꣳ सदा पश्यन्ति सूरयः । दिवीव चक्षुर् आततम् ॥ ध्रुवाऽसि पृथिवि सहस्व पृतन्यतः । स्यूता देवेभिर् अमृतेऽनागाः ॥ यास् ते अग्ने सूर्ये रुच उद्यतो दिवम् आतन्वन्ति रश्मिभिः । ताभिः सर्वाभी रुचे जनाय नस् कृधि ॥ या वो देवाः सूर्ये रुचो गोष्व् अश्वेषु या रुचः । इन्द्राग्नी ताभिः सर्वाभी रुचं नो धत्त बृहस्पते विराट्

padaṃ sadā paśyanti sūrayaḥ | divīva cakṣur ātatam || dhruvā'si pṛthivi sahasva pṛtanyataḥ | syūtā devebhir amṛte'nāgāḥ || yās te agne sūrye ruca udyato divam ātanvanti raśmibhiḥ | tābhiḥ sarvābhī ruce janāya nas kṛdhi || yā vo devāḥ sūrye ruco goṣv aśveṣu yā rucaḥ | indrāgnī tābhiḥ sarvābhī rucaṃ no dhatta bṛhaspate virāṭ

TS 4 2.9.5

ज्योतिर् अधारयत् सम्राड् ज्योतिर् अधारयत् स्वराड् ज्योतिर् अधारयत् अग्ने युक्ष्वा हि ये तवाश्वासो देव साधवः । अरं वहन्त्य् आशवः ॥ युक्ष्वा हि देवहूतमाꣳ अश्वाꣳ अग्ने रथीर् इव । नि होता पूर्व्यः सदः ॥ द्रप्सश् चस्कन्द पृथिवीम् अनु द्याम् इमं च योनिम् अनु यश् च पूर्वः । तृतीयं योनिम् अनु संचरन्तं द्रप्सं जुहोम्य् अनु सप्त

jyotir adhārayat samrāḍ jyotir adhārayat svarāḍ jyotir adhārayat agne yukṣvā hi ye tavāśvāso deva sādhavaḥ | araṃ vahanty āśavaḥ || yukṣvā hi devahūtamāṃ aśvāṃ agne rathīr iva | ni hotā pūrvyaḥ sadaḥ || drapsaś caskanda pṛthivīm anu dyām imaṃ ca yonim anu yaś ca pūrvaḥ | tṛtīyaṃ yonim anu saṃcarantaṃ drapsaṃ juhomy anu sapta

TS 4 2.9.6

होत्राः ॥ अभूद् इदं विश्वस्य भुवनस्य वाजिनम् अग्नेर् वैश्वानरस्य च । अग्निर् ज्योतिषा ज्योतिष्मान् रुक्मो वर्चसा वर्चस्वान् ॥ ऋचे त्वा रुचे त्वा सम् इत् स्रवन्ति सरितो न धेनाः । अन्तर् हृदा मनसा पूयमानाः । घृतस्य धारा अभि चाकशीमि । हिरण्ययो वेतसो मध्य आसाम् ॥ तस्मिन्त् सुपर्णो मधुकृत् कुलायी भजन्न् आस्ते मधु देवताभ्यः । तस्याऽऽसते हरयः सप्त तीरे स्वधां दुहाना अमृतस्य धाराम् ॥

hotrāḥ || abhūd idaṃ viśvasya bhuvanasya vājinam agner vaiśvānarasya ca | agnir jyotiṣā jyotiṣmān rukmo varcasā varcasvān || ṛce tvā ruce tvā sam it sravanti sarito na dhenāḥ | antar hṛdā manasā pūyamānāḥ | ghṛtasya dhārā abhi cākaśīmi | hiraṇyayo vetaso madhya āsām || tasmint suparṇo madhukṛt kulāyī bhajann āste madhu devatābhyaḥ | tasyā''sate harayaḥ sapta tīre svadhāṃ duhānā amṛtasya dhārām ||

TS 4 2.10.1

आदित्यं गर्भम् पयसा समञ्जन्त् सहस्रस्य प्रतिमां विश्वरूपम् । परि वृङ्ग्धि हरसा माऽभि मृक्षः शतायुषं कृणुहि चीयमानः ॥ इमम् मा हिꣳसीर् द्विपादम् पशूनाꣳ सहस्राक्ष मेध आ चीयमानः । मयुम् आरण्यम् अनु ते दिशामि तेन चिन्वानस् तनुवो नि षीद ॥ वातस्य ध्राजिं वरुणस्य नाभिम् अश्वं जज्ञानꣳ सरिरस्य मध्ये । शिशुं नदीनाꣳ हरिम् अद्रिबुद्धम् अग्ने मा हिꣳसीः

ādityaṃ garbham payasā samañjant sahasrasya pratimāṃ viśvarūpam | pari vṛṅgdhi harasā mā'bhi mṛkṣaḥ śatāyuṣaṃ kṛṇuhi cīyamānaḥ || imam mā hiṃsīr dvipādam paśūnāṃ sahasrākṣa medha ā cīyamānaḥ | mayum āraṇyam anu te diśāmi tena cinvānas tanuvo ni ṣīda || vātasya dhrājiṃ varuṇasya nābhim aśvaṃ jajñānaṃ sarirasya madhye | śiśuṃ nadīnāṃ harim adribuddham agne mā hiṃsīḥ

TS 4 2.10.2

परमे व्योमन् ॥ इमम् मा हिꣳसीर् एकशफम् पशूनां कनिक्रदं वाजिनं वाजिनेषु । गौरम् आरण्यम् अनु ते दिशामि तेन चिन्वानस् तनुवो नि षीद ॥ अजस्रम् इन्दुम् अरुषम् भुरण्युम् अग्निम् ईडे पूर्वचित्तौ नमोभिः । स पर्वभिर् ऋतुशः कल्पमानो गाम् मा हिꣳसीर् अदितिं विराजम् ॥ इमꣳ समुद्रꣳ शतधारम् उत्सं व्यच्यमानम् भुवनस्य मध्ये । घृतं दुहानाम् अदितिं जनायाग्ने मा

parame vyoman || imam mā hiṃsīr ekaśapham paśūnāṃ kanikradaṃ vājinaṃ vājineṣu | gauram āraṇyam anu te diśāmi tena cinvānas tanuvo ni ṣīda || ajasram indum aruṣam bhuraṇyum agnim īḍe pūrvacittau namobhiḥ | sa parvabhir ṛtuśaḥ kalpamāno gām mā hiṃsīr aditiṃ virājam || imaṃ samudraṃ śatadhāram utsaṃ vyacyamānam bhuvanasya madhye | ghṛtaṃ duhānām aditiṃ janāyāgne mā

TS 4 2.10.3

हिꣳसीः परमे व्योमन् । गवयम् आरण्यम् अनु ते दिशामि तेन चिन्वानस् तनुवो नि षीद ॥ वरूत्रिं त्वष्टुर् वरुणस्य नाभिम् अविं जज्ञानाꣳ रजसः परस्मात् । महीꣳ सहस्रीम् असुरस्य मायाम् अग्ने मा हिꣳसीः परमे व्योमन् ॥ इमामूर्णायुं वरुणस्य मायां त्वचम् पशूनां द्विपदां चतुष्पदाम् । त्वष्टुः प्रजानाम् प्रथमं जनित्रम् अग्ने मा हिꣳसीः परमे व्योमन् । उष्ट्रम् आरण्यम् अनु

hiṃsīḥ parame vyoman | gavayam āraṇyam anu te diśāmi tena cinvānas tanuvo ni ṣīda || varūtriṃ tvaṣṭur varuṇasya nābhim aviṃ jajñānāṃ rajasaḥ parasmāt | mahīṃ sahasrīm asurasya māyām agne mā hiṃsīḥ parame vyoman || imāmūrṇāyuṃ varuṇasya māyāṃ tvacam paśūnāṃ dvipadāṃ catuṣpadām | tvaṣṭuḥ prajānām prathamaṃ janitram agne mā hiṃsīḥ parame vyoman | uṣṭram āraṇyam anu

TS 4 2.10.4

ते दिशामि तेन चिन्वानस् तनुवो नि षीद ॥ यो अग्निर् अग्नेस् तपसो ऽधि जातः शोचात् पृथिव्या उत वा दिवस् परि । येन प्रजा विश्वकर्मा व्यानट् तम् अग्ने हेडः परि ते वृणक्तु ॥ अजा ह्य् अग्नेर् अजनिष्ट गर्भात् सा वा अपश्यज् जनितारम् अग्रे । तया रोहम् आयन्न् उप मेध्यासः तया देवा देवताम् अग्र आयन् । शरभम् आरण्यम् अनु ते दिशामि तेन चिन्वानस् तनुवो नि षीद ॥

te diśāmi tena cinvānas tanuvo ni ṣīda || yo agnir agnes tapaso 'dhi jātaḥ śocāt pṛthivyā uta vā divas pari | yena prajā viśvakarmā vyānaṭ tam agne heḍaḥ pari te vṛṇaktu || ajā hy agner ajaniṣṭa garbhāt sā vā apaśyaj janitāram agre | tayā roham āyann upa medhyāsaḥ tayā devā devatām agra āyan | śarabham āraṇyam anu te diśāmi tena cinvānas tanuvo ni ṣīda ||

TS 4 2.11.1

इन्द्राग्नी रोचना दिवः परि वाजेषु भूषथः । तद् वां चेति प्र वीर्यम् ॥ श्नथद् वृत्रम् उत सनोति वाजम् इन्द्रा यो अग्नी सहुरी सपर्यात् । इरज्यन्ता वसव्यस्य भूरेः सहस्तमा सहसा वाजयन्ता ॥ प्र चर्षणिभ्यः पृतना हवेषु प्र पृथिव्या रिरिचाथे दिवश् च । प्र सिन्धुभ्यः प्र गिरिभ्यो महित्वा प्रेन्द्राग्नी विश्वा भुवनात्य् अन्या ॥ मरुतो यस्य हि

indrāgnī rocanā divaḥ pari vājeṣu bhūṣathaḥ | tad vāṃ ceti pra vīryam || śnathad vṛtram uta sanoti vājam indrā yo agnī sahurī saparyāt | irajyantā vasavyasya bhūreḥ sahastamā sahasā vājayantā || pra carṣaṇibhyaḥ pṛtanā haveṣu pra pṛthivyā riricāthe divaś ca | pra sindhubhyaḥ pra giribhyo mahitvā prendrāgnī viśvā bhuvanāty anyā || maruto yasya hi

TS 4 2.11.2

क्षये पाथा दिवो विमहसः । स सुगोपातमो जनः ॥ यज्ञैर् वा यज्ञवाहसो विप्रस्य वा मतीनाम् । मरुतः शृणुता हवम् ॥ श्रियसे कम् भानुभिः सम् मिमिक्षिरे ते रश्मिभिस् त ऋक्वभिः सुखादयः । ते वाशीमन्त इष्मिणो अभीरवो विद्रे प्रियस्य मारुतस्य धाम्नः ॥ अव ते हेड उद् उत्तमम् । कया नश् चित्र आ भुवद् ऊती सदावृधः सखा । कया शचिष्ठया वृता ॥

kṣaye pāthā divo vimahasaḥ | sa sugopātamo janaḥ || yajñair vā yajñavāhaso viprasya vā matīnām | marutaḥ śṛṇutā havam || śriyase kam bhānubhiḥ sam mimikṣire te raśmibhis ta ṛkvabhiḥ sukhādayaḥ | te vāśīmanta iṣmiṇo abhīravo vidre priyasya mārutasya dhāmnaḥ || ava te heḍa ud uttamam | kayā naś citra ā bhuvad ūtī sadāvṛdhaḥ sakhā | kayā śaciṣṭhayā vṛtā ||

TS 4 2.11.3

को अद्य युङ्क्ते धुरि गा ऋतस्य शिमीवतो भामिनो दुर्हृणायून् । आसन्निषून् हृत्स्वसो मयोभून् य एषाम् भृत्याम् ऋणधत् स जीवात् ॥ अग्ने नय । आ देवानाम् । शं नो भवन्तु वाजेवाजे अप्स्व् अग्ने सधिष् टव सौषधीर् अनु रुध्यसे गर्भै सञ् जायसे पुनः ॥ वृषा सोम द्युमाꣳ असि वृषा देव वृषव्रतः । वृषा धर्माणि दधिषे ॥ इमम् मे वरुण तत् त्वा यामि त्वं नो अग्ने स त्वं नो अग्ने ॥

ko adya yuṅkte dhuri gā ṛtasya śimīvato bhāmino durhṛṇāyūn | āsanniṣūn hṛtsvaso mayobhūn ya eṣām bhṛtyām ṛṇadhat sa jīvāt || agne naya | ā devānām | śaṃ no bhavantu vājevāje apsv agne sadhiṣ ṭava sauṣadhīr anu rudhyase garbhai sañ jāyase punaḥ || vṛṣā soma dyumāṃ asi vṛṣā deva vṛṣavrataḥ | vṛṣā dharmāṇi dadhiṣe || imam me varuṇa tat tvā yāmi tvaṃ no agne sa tvaṃ no agne ||