Mandukya Upanishad — Chapter 1

MaUp 1.1

omityetadakṣaramidaṃ sarvaṃ tasyopavyākhyānaṃ bhūtaṃ bhavadbhaviṣyaditi sarvamoṅkāra eva | yaccānyattrikālātītaṃ tadapyoṅkāra eva ||

MaUp 1.2

sarvaṃ hyetad brahmāyamātmā brahma so 'yamātmā catuṣpāt ||

MaUp 1.3

jāgaritasthāno bahiḥ prajñaḥ saptāṅgaḥ ekonaviṃśatimukhaḥ sthūlabhugvaiśvānaraḥ prathamaḥ pādaḥ ||

MaUp 1.4

svapnasthāno 'ntaḥ prajñaḥ saptāṅga ekonaviṃśatimukhaḥ praviviktabhuktaijaso dvitīyaḥ pādaḥ ||

MaUp 1.5

yatra supto na kañcana kāmaṃ kāmayate na kañcana svapnaṃ paśyati tatsuṣuptam | suṣuptasthāna ekībhūtaḥ prajñānaghana evānandamayo hyānandabhukcetomukhaḥ prājñastṛtīyaḥ pādah ||

MaUp 1.6

eṣa sarveśvara eṣa sarvajña eṣo 'ntaryāmyeṣa yoniḥ sarvasya prabhavāpyayau hi bhūtānām

MaUp 1.7

nāntaḥ prajñaṃ na bahiḥ prajñaṃ nobhayataḥ prajñaṃ na prajñānaghanaṃ na prajñaṃ nāprajñam | adṛśyamavyavahāryamagrāhyamalakṣaṇamacintyamavyapa deśyamekātmapratyayasāraṃ prapañcopaśamaṃ śāntaṃ śivamadvaitaṃ caturthaṃ manyante sa ātmā sa vijñeyaḥ ||

MaUp 1.8

so 'yamātmādhyakṣaramoṅkāro 'dhimātraṃ pādā mātrā mātrāśca pādā akāra ukāro makāra iti ||

MaUp 1.9

jāgaritasthāno vaiśvānaro 'kāraḥ prathamā mātrāpterādimattvādvāpnoti ha vai sarvān kāmānādiśca bhavati ya evaṃ veda ||

MaUp 1.10

svapnasthānastaijasa ukāro dvitīyā mātrotkarṣād ubhayatvādvotkarṣati ha vai jñānasantatiṃ samānaśca bhavati nāsyābrahmavitkule bhavati ya evaṃ veda ||

MaUp 1.11

suṣuptasthānaḥ prājño makārastṛtīyā mātrā miterapītervā minoti ha vā idaṃ sarvamapītiśca bhavati ya evaṃ veda ||

MaUp 1.12

amātraścaturtho 'vyavahāryaḥ prapañcopaśamaḥ śivo 'dvaita evamoṅkāra ātmaiva saṃviśatyātmanātmānaṃ ya evaṃ veda | ya evaṃ veda ||