Mahabharata — Volume III (Dutt edition) — Chapter 72
MBh 3 72.1
विराट उवाच किमर्थं पाण्डवश्रेष्ठ भार्यां दुहितरं मम। प्रतिग्रहीतुं नेमां त्वं मया दत्तामिहेच्छसि॥
virāṭa uvāca kimarthaṃ pāṇḍavaśreṣṭha bhāryāṃ duhitaraṃ mama| pratigrahītuṃ nemāṃ tvaṃ mayā dattāmihecchasi||
Virata said O foremost of Pandavas, why do you not wish to accept, as your wife, my daughter whom I wish to confer upon you?
— tr. M.N. Dutt (1891–96) (public domain)
MBh 3 72.2
अर्जुन उवाच अन्तःपुरेऽहमुषितः सदा पश्यन् सुतां तव। रहस्यं च प्रकाशं च विश्वस्ता पितृवन्मयि॥
arjuna uvāca antaḥpure'hamuṣitaḥ sadā paśyan sutāṃ tava| rahasyaṃ ca prakāśaṃ ca viśvastā pitṛvanmayi||
Arjuna said Living in your inner apartment, I always saw your daughter. Alone or before all, she always used to confide in me as her father.
— tr. M.N. Dutt (1891–96) (public domain)
MBh 3 72.3
प्रियो बहुतमश्चासं नर्तको गीतकोविदः। आचार्यवच्च मां नित्यं मन्यते दुहिता तव॥
priyo bahutamaścāsaṃ nartako gītakovidaḥ| ācāryavacca māṃ nityaṃ manyate duhitā tava||
Well-versed in dancing and singing, I was always loved and much liked by her. Your daughter always regards me as her preceptor.
— tr. M.N. Dutt (1891–96) (public domain)
MBh 3 72.4
वयःस्थया तया राजन् सह संवत्सरोषितः। अतिशङ्का भवेत् स्थाने तव लोकस्य वा विभो॥
vayaḥsthayā tayā rājan saha saṃvatsaroṣitaḥ| atiśaṅkā bhavet sthāne tava lokasya vā vibho||
O king, I lived for one year with her who is youthful. O lord, you or your men may therefore suspect me.
— tr. M.N. Dutt (1891–96) (public domain)
MBh 3 72.5
तस्मान्निमन्त्रयेऽहं ते दुहितां मनुजाधिप। शुद्धो जितेन्द्रियो दान्तस्तस्याः शुद्धिः कृता मया।॥
tasmānnimantraye'haṃ te duhitāṃ manujādhipa| śuddho jitendriyo dāntastasyāḥ śuddhiḥ kṛtā mayā|||
O king, I, therefore, wish to have your daughter as my daughter-in-law-pure, selfcontrolled, I am. I thus prove her purity.
— tr. M.N. Dutt (1891–96) (public domain)
MBh 3 72.6
स्नुषायां दुहितुर्वापि पुत्रे चात्मनि वा पुनः। अत्र शङ्कां न पश्यामि तेन शुद्धिर्भविष्यति॥
snuṣāyāṃ duhiturvāpi putre cātmani vā punaḥ| atra śaṅkāṃ na paśyāmi tena śuddhirbhaviṣyati||
There is no difference between a daughter and a daughter-in-law as that between one's ownself and a son. I do not find any fear in it-for by it purity will be proved.
— tr. M.N. Dutt (1891–96) (public domain)
MBh 3 72.7
अभिशापादहं भीतो मिथ्यावादात् परंतप। स्नुषार्थमुत्तरां राजन् प्रतिगृह्णामि ते सुताम्॥
abhiśāpādahaṃ bhīto mithyāvādāt paraṃtapa| snuṣārthamuttarāṃ rājan pratigṛhṇāmi te sutām||
O king, I am afraid of curses and false accusation. O king, I shall therefore accept your daughter Uttara as my daughter-in-law.
— tr. M.N. Dutt (1891–96) (public domain)
MBh 3 72.8
स्वस्रीयो वासुदेवस्य साक्षाद् देवशिशुर्यथा। दयितश्चक्रहस्तस्य सर्वास्त्रेषु च कोविदः॥
svasrīyo vāsudevasya sākṣād devaśiśuryathā| dayitaścakrahastasya sarvāstreṣu ca kovidaḥ||
A nephew of Vasudeva, like a very celestials boy-my son, who has mastered all weapons, is the favourite of the holder of discus.
— tr. M.N. Dutt (1891–96) (public domain)
MBh 3 72.9
अभिमन्युर्महाबाहुः पुत्रो मम विशाम्पते। जामाता तव युक्तो वै भर्ता च दुहितुस्तव॥
abhimanyurmahābāhuḥ putro mama viśāmpate| jāmātā tava yukto vai bhartā ca duhitustava||
O king, my son is the mighty-armed Abhimanyu. He is a proper son-in-law for you and husband for you daughter.
— tr. M.N. Dutt (1891–96) (public domain)
MBh 3 72.10
विराट उवाच उपपन्नं कुरुश्रेष्ठे कुन्तीपुत्र धनंजये। य एवं धर्मनित्यश्च जातज्ञानश्च पाण्डवः॥
virāṭa uvāca upapannaṃ kuruśreṣṭhe kuntīputra dhanaṃjaye| ya evaṃ dharmanityaśca jātajñānaśca pāṇḍavaḥ||
Virata said It is indeed proper for the foremost of Kurus, Dhananjaya, the son of Kunti, always virtuous and wise, to say this.
— tr. M.N. Dutt (1891–96) (public domain)
MBh 3 72.11
यत् कृत्यं मन्यसे पार्थ क्रियतां तदनन्तरम्। सर्वे कामाः समृद्धा मे सम्बन्धी यस्य मेऽर्जुनः॥
yat kṛtyaṃ manyase pārtha kriyatāṃ tadanantaram| sarve kāmāḥ samṛddhā me sambandhī yasya me'rjunaḥ||
O Partha, do what you think proper after this. He, who has a relationship with Arjuna, has all his desires fulfilled.
— tr. M.N. Dutt (1891–96) (public domain)
MBh 3 72.12
वैशम्पायन उवाच एवं ब्रुवति राजेन्द्रे कुन्तीपुत्रो युधिष्ठिरः। अन्वशासत् स संयोगं समये मत्स्यपार्थयोः॥
vaiśampāyana uvāca evaṃ bruvati rājendre kuntīputro yudhiṣṭhiraḥ| anvaśāsat sa saṃyogaṃ samaye matsyapārthayoḥ||
Vaishampayana said After the king had said this, Yudhishthira, the son of Kunti, gave his assent to the alliance between Matsya and Partha.
— tr. M.N. Dutt (1891–96) (public domain)
MBh 3 72.13
ततो मित्रेषु सर्वेषु वासुदेवं च भारत। प्रेषयामास कौन्तेयो विराटश्च महीपतिः॥
tato mitreṣu sarveṣu vāsudevaṃ ca bhārata| preṣayāmāsa kaunteyo virāṭaśca mahīpatiḥ||
O descendant of Bharata, then the son of Kunti sent invitations to all his friends and Vasudeva, and so did the king Virata.
— tr. M.N. Dutt (1891–96) (public domain)
MBh 3 72.14
ततस्त्रयोदशे वर्षे निवृत्ते पञ्च पाण्डवाः। उपप्लव्यं विराटस्य समपद्यन्त सर्वशः॥
tatastrayodaśe varṣe nivṛtte pañca pāṇḍavāḥ| upaplavyaṃ virāṭasya samapadyanta sarvaśaḥ||
Thus after the expiration of the thirteenth year, the five Pandavas took up their quarters in Virata's town called Upaplavya.
— tr. M.N. Dutt (1891–96) (public domain)
MBh 3 72.15
अभिमन्युं च बीभत्सुरानिनाय जनार्दनम्। आनर्तेभ्योऽपि दाशार्हानानयामास पाण्डवः॥
abhimanyuṃ ca bībhatsurānināya janārdanam| ānartebhyo'pi dāśārhānānayāmāsa pāṇḍavaḥ||
Bibhatsu then brought over Abhimanyu, Janardana and many members of the Dasharha family from the Anarta country.
— tr. M.N. Dutt (1891–96) (public domain)
MBh 3 72.16
काशिराजश्च शैब्यश्च प्रीयमाणौ युधिष्ठिरे। अक्षौहिणीभ्यां सहितावागतौ पृथिवीपती॥
kāśirājaśca śaibyaśca prīyamāṇau yudhiṣṭhire| akṣauhiṇībhyāṃ sahitāvāgatau pṛthivīpatī||
The king of Kashi and Shaivya, who were great friends of Yudhishthira, came there, each accompanied by an Akshauhini of soldiers.
— tr. M.N. Dutt (1891–96) (public domain)
MBh 3 72.17
अक्षौहिण्या च सहितो यज्ञसेनो महाबलः। द्रौपद्याश्च सुता वीराः शिखण्डी चापराजितः॥
akṣauhiṇyā ca sahito yajñaseno mahābalaḥ| draupadyāśca sutā vīrāḥ śikhaṇḍī cāparājitaḥ||
There came as also the mighty powerful Yajnasena with an Akshauhini of soldiers, the heroic sons of Draupadi and the invincible Shikhandi.
— tr. M.N. Dutt (1891–96) (public domain)
MBh 3 72.18
धृष्टद्युम्नश्च दुर्धर्षः सर्वशस्त्रभृतां वरः। समस्ताक्षौहिणीपाला यज्वानो भूरिदक्षिणाः। वेदावभृथसम्पन्नाः सर्वे शूरास्तनुत्यजः॥
dhṛṣṭadyumnaśca durdharṣaḥ sarvaśastrabhṛtāṃ varaḥ| samastākṣauhiṇīpālā yajvāno bhūridakṣiṇāḥ| vedāvabhṛthasampannāḥ sarve śūrāstanutyajaḥ||
Chivalrous Dhrishtadyumna, the best weaponer and expert in war-craft were also with them. Apart from these, numerous other kings commanding one Akshauhini army each, observer of offering, generous in the matter of Dakshina for offerings arranged and ready to die for the cause of Pandavas.
— tr. M.N. Dutt (1891–96) (public domain)
MBh 3 72.19
तानागतानभिप्रेक्ष्य मत्स्यो धर्मभृतां वरः। पूजयामास विधिवत् सभृत्यबलवाहनान्॥ प्रीतोऽभवद् दुहितरं दत्त्वा तामभिमन्यवे।
tānāgatānabhiprekṣya matsyo dharmabhṛtāṃ varaḥ| pūjayāmāsa vidhivat sabhṛtyabalavāhanān|| prīto'bhavad duhitaraṃ dattvā tāmabhimanyave|
The king, the foremost of the virtuous, duly worshipped them all along with their servants and troops. And having given away his daughter, he was pleased.
— tr. M.N. Dutt (1891–96) (public domain)
MBh 3 72.20
ततः प्रत्युपयातेषु पार्थिवेषु ततस्ततः॥ तत्रागमद् वासुदेवो वनमाली हलायुधः। कृतवर्मा च हार्दिक्यो युयुधानश्च सात्यकिः॥ अनाधृष्टिस्तथाक्रूरः साम्बो निश एव च। अभिमन्युमुपादाय सह मात्रा परंतपाः॥ इन्द्रसेनादयश्चैव रथैस्तैः सुसमाहितैः। आययुः सहिताः सर्वे परिसंवत्सरोषिताः॥ दशनागसहस्राणि हयानां द्विगुणं तथा। रथानामयुतं पूर्णं नियुतं च पदातिनाम्॥ वृष्ण्यन्धकाश्च बहवो भोजाश्च परमौजसः। अन्वयुर्वृष्णिशार्दूलं वासुदेवं महाद्युतिम्॥
tataḥ pratyupayāteṣu pārthiveṣu tatastataḥ|| tatrāgamad vāsudevo vanamālī halāyudhaḥ| kṛtavarmā ca hārdikyo yuyudhānaśca sātyakiḥ|| anādhṛṣṭistathākrūraḥ sāmbo niśa eva ca| abhimanyumupādāya saha mātrā paraṃtapāḥ|| indrasenādayaścaiva rathaistaiḥ susamāhitaiḥ| āyayuḥ sahitāḥ sarve parisaṃvatsaroṣitāḥ|| daśanāgasahasrāṇi hayānāṃ dviguṇaṃ tathā| rathānāmayutaṃ pūrṇaṃ niyutaṃ ca padātinām|| vṛṣṇyandhakāśca bahavo bhojāśca paramaujasaḥ| anvayurvṛṣṇiśārdūlaṃ vāsudevaṃ mahādyutim||
There came Vasudeva, decked with garlands, Halayudha, Kritavarman, Hridika, Yuyudhana, the son of Satyaki, Anadhrishti, Akrura, Samba, Nishath-all these repressors of foes came there with Abhimanyu and his mother. Indrasena and others came with their cars-having lived there for one whole year. There came also ten thousand elephants and ten millions of horses, ten billions of cars and one Nikharva of infantry and many other highly energetic Vrishni, Andhaka and Bhoja heroes-following the highly effulgent Vasudeva-the foremost of Vrishnis.
— tr. M.N. Dutt (1891–96) (public domain)
MBh 3 72.21
पारिबर्ह ददौ कृष्णः पाण्डवानां महात्मनाम्। स्त्रियो रत्नानि वासांसि पृथक् पृथगनेकशः॥ ततो विवाहो विधिवद् ववृधे मत्स्यपार्थयोः।
pāribarha dadau kṛṣṇaḥ pāṇḍavānāṃ mahātmanām| striyo ratnāni vāsāṃsi pṛthak pṛthaganekaśaḥ|| tato vivāho vidhivad vavṛdhe matsyapārthayoḥ|
Lord Srikrishna made a gift of several maids, various type gems and a pile of garments separately in the form of dowry or invitation to great Pandavas. Then there took place duly the nuptial tie between the Matsya and the Pandu families.
— tr. M.N. Dutt (1891–96) (public domain)
MBh 3 72.22
ततः शङ्खाश्च भेर्यश्च गोमुखा डम्बरास्तथा॥ पार्थैः संयुज्यमानस्य नेदुर्मत्स्यस्य वेश्मनि। भक्ष्यान्नभोज्यपानानि प्रभूतान्यभ्यहारयन्॥ गायनाख्यानशीलाच नटवैतालिकास्तथा।
tataḥ śaṅkhāśca bheryaśca gomukhā ḍambarāstathā|| pārthaiḥ saṃyujyamānasya nedurmatsyasya veśmani| bhakṣyānnabhojyapānāni prabhūtānyabhyahārayan|| gāyanākhyānaśīlāca naṭavaitālikāstathā|
Then conchs, cymbals, drums, trumpets and various other musical instruments were played in the palace of Virata. Various deer and animals were slain. Wines and various celestials drinks were procured and there came also many songsters, panegyrists and actors.
— tr. M.N. Dutt (1891–96) (public domain)
MBh 3 72.23
स्तुवन्तस्तानुपातिष्ठान् सूताश्च सह मागधैः॥ सुदेष्णां च पुरस्कृत्य मत्स्यानां च वरस्त्रियः।
stuvantastānupātiṣṭhān sūtāśca saha māgadhaiḥ|| sudeṣṇāṃ ca puraskṛtya matsyānāṃ ca varastriyaḥ|
The singers, the fabulists, acrobats and the magic-mongers began chanting pray and psalms for Pandavas in company of soothsayers and Magadhas (clowns) there.
— tr. M.N. Dutt (1891–96) (public domain)
MBh 3 72.24
आजग्मुश्चारुसर्वाङ्गयः सुमृष्टमणिकुण्डलाः॥ वर्णोपपन्नास्ता नार्यो रूपवत्यः स्वलंकृताः। सर्वाश्चाभ्यभवन् कृष्णा रूपेण यशसा श्रिया॥ परिवार्योत्तरां तास्तु राजपुत्रीमलंकृताम्। सुतामिव महेन्द्रस्य पुरस्कृत्योपतस्थिरे॥ तां प्रत्यगृह्णात् कौन्तेयः सुतस्यार्थे धनंजयः। सौभद्रस्यानवद्याङ्गी विराटतनयां तदा॥ तत्रातिष्ठन्महाराजो रूपमिन्द्रस्य धारयन्। स्नुषां तां प्रतिजग्राह कुन्तीपुत्रो युधिष्ठिरः॥
ājagmuścārusarvāṅgayaḥ sumṛṣṭamaṇikuṇḍalāḥ|| varṇopapannāstā nāryo rūpavatyaḥ svalaṃkṛtāḥ| sarvāścābhyabhavan kṛṣṇā rūpeṇa yaśasā śriyā|| parivāryottarāṃ tāstu rājaputrīmalaṃkṛtām| sutāmiva mahendrasya puraskṛtyopatasthire|| tāṃ pratyagṛhṇāt kaunteyaḥ sutasyārthe dhanaṃjayaḥ| saubhadrasyānavadyāṅgī virāṭatanayāṃ tadā|| tatrātiṣṭhanmahārājo rūpamindrasya dhārayan| snuṣāṃ tāṃ pratijagrāha kuntīputro yudhiṣṭhiraḥ||
Many dainsel, beautiful and adorned, with jeweled ear-rings, of whom Draupadi was the foremost, came there leading the princess Uttara adorned with many ornaments and resembling the accepted that all-beautiful daughter of Virata for his son Abhimanyu, begotten on Subhadra. There stood the great king, in beauty-like Indra. Yudhishthira, the son of Kunti, accepted her for his daughter-inlaw.
— tr. M.N. Dutt (1891–96) (public domain)
MBh 3 72.25
प्रतिगृह्य च तां पार्थः पुरस्कृत्य जनार्दनम्। विवाहं कारयामास सौभद्रस्य महात्मनः॥
pratigṛhya ca tāṃ pārthaḥ puraskṛtya janārdanam| vivāhaṃ kārayāmāsa saubhadrasya mahātmanaḥ||
Thus, Partha accepted Uttara for his son Abhimanyu in the presence of lord Krishna and their marriage was solemnised.
— tr. M.N. Dutt (1891–96) (public domain)
MBh 3 72.26
तस्मै सप्त सहस्राणि हयानां वातरंहसाम्। द्वे च नागशते मुख्ये प्रादाद् बहुधनं तदा॥ हुत्वा सम्यक् समिद्धाग्निमर्चयित्वा द्विजन्मनः। राज्यं बलं च कोशं च सर्वमात्मानमेव च॥
tasmai sapta sahasrāṇi hayānāṃ vātaraṃhasām| dve ca nāgaśate mukhye prādād bahudhanaṃ tadā|| hutvā samyak samiddhāgnimarcayitvā dvijanmanaḥ| rājyaṃ balaṃ ca kośaṃ ca sarvamātmānameva ca||
The king Virata made a gift of seven thousand horses as speedy as the air, two hundred mighty elephants and considerable money in the form of dowry to bridegroom party when he duly honoured Brahmins and made offering in fire in course of solemnising the marriage of his daughter. He assigned with them the throne, army and everything including treasury as also surrendered himself for their service.
— tr. M.N. Dutt (1891–96) (public domain)
MBh 3 72.27
कृते विवाहे तु तदा धर्मपुत्रो युधिष्ठिरः। ब्राह्मणेभ्यो ददौ वित्तं यदुपाहरदच्युतः॥
kṛte vivāhe tu tadā dharmaputro yudhiṣṭhiraḥ| brāhmaṇebhyo dadau vittaṃ yadupāharadacyutaḥ||
On completion of the conjugal ceremony, Yudhishthira, an incarnate to Dharma, made a gift of the major part of money received from lord Krishna to Brahmanas.
— tr. M.N. Dutt (1891–96) (public domain)
MBh 3 72.28
गोसहस्राणि रत्नानि वस्त्राणि विविधानि च। भूषणानि च मुख्यानि यानानि शयनानि च॥ भोजनानि च हृद्यानि पानानि विविधानि च। तन्महोत्सवसंकाशं हृष्टपुष्टजनायुतम्। नगरं मत्स्यराजस्य शुशुभे भरतर्षभ।॥
gosahasrāṇi ratnāni vastrāṇi vividhāni ca| bhūṣaṇāni ca mukhyāni yānāni śayanāni ca|| bhojanāni ca hṛdyāni pānāni vividhāni ca| tanmahotsavasaṃkāśaṃ hṛṣṭapuṣṭajanāyutam| nagaraṃ matsyarājasya śuśubhe bharatarṣabha|||
He offered several thousand cows, gems, various type of garments, ornaments, cardinal vehicles, bed, eatables and several type of drinks also. O Janamejaya! The city of Matsyaraja crowded with thousands of lakhs hale and hearty people was being seen as a great festivity in live feature. Thus ends the seventy-second chapter, the marriage of Abhimanyu in the Vaivahika of the Virata Parva.
— tr. M.N. Dutt (1891–96) (public domain)